ຂ່າວສານການຢ້ຽມສອນ, ເດືອນມັງກອນ 2017

ຈຸດປະສົງຂອງສະມາຄົມສະຕີສົງເຄາະ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ.

ສັດທາ, ຄອບຄົວ, ສົງເຄາະ

ຈຸດປະສົງຂອງສະມາຄົມສະຕີສົງເຄາະ ແມ່ນທີ່ຈະ “ຕຽມສະຕີສຳລັບພອນຂອງຊີວິດນິລັນດອນ,” ລິນດາ ເຄ ເບີຕັນ, ປະທານສະມາຄົມສະຕີສົງເຄາະສາມັນ ໄດ້ກ່າວ.¹ ມັນແມ່ນຜ່ານທາງສັດທາ, ຄອບຄົວ, ແລະ ສົງເຄາະ ທີ່ເຮົາມີສ່ວນຮ່ວມ ໃນ “ພາກສ່ວນທີ່ສຳຄັນ ໃນວຽກງານຂອງເຮົາ.”²

ສະມາຄົມສະຕີສົງເຄາະ “ເປັນວຽກງານທາງໂລກ ແລະ ທາງວິນຍານ,” ແຄໂຣ ເອັມ ສະຕີບເວັນສ໌, ທີ່ປຶກສາທີໜຶ່ງໃນຝ່າຍປະທານສະມາຄົມສະຕີສົງເຄາະສາມັນ ໄດ້ກ່າວ. “ນັ້ນຄືສິ່ງທີ່ສະຕີໄດ້ເຮັດ ໃນວັນເວລາຂອງພຣະຜູ້ຊ່ວຍໃຫ້ລອດ, ແລະ ນັ້ນຄືສິ່ງທີ່ເຮົາເຮັດສືບຕໍ່.”³

ເມື່ອເຮົາເບິ່ງຜູ້ຍິງໄທຊາມາເຣຍຢູ່ທີ່ນ້ຳສ້າງ, ຜູ້ໄດ້ປະໄຫນ້ຳຂອງນາງ ແລະ ໄດ້ແລ່ນໄປບອກຄົນອື່ນໆ ວ່າພຣະເຢຊູເປັນສາດສະດາ (ເບິ່ງ ໂຢຮັນ 4:6–42), ຫລື ເມື່ອເຮົາເບິ່ງ ນາງຟອຍເບ, ຜູ້ໄດ້ຮັບໃຊ້ຄົນອື່ນດ້ວຍຄວາມຊື່ນຊົມຕະຫລອດຊີວິດຂອງນາງ (ເບິ່ງ ໂຣມ 16:1–2), ແລ້ວເຮົາຈະເຫັນຕົວຢ່າງຂອງສະຕີໃນວັນເວລາຂອງພຣະຜູ້ຊ່ວຍໃຫ້ລອດ ຜູ້ໄດ້ມີສ່ວນຮ່ວມຢ່າງເຂັ້ມແຂງ ໃນການມາຫາພຣະຄຣິດ. ແມ່ນພຣະອົງທີ່ເປັນຜູ້ເປີດທາງຂອງເຮົາ ໄປສູ່ຊີວິດນິລັນດອນ (ເບິ່ງ ໂຢຮັນ 3:16).

ເມື່ອເຮົາເບິ່ງເອື້ອຍນ້ອງຜູ້ບຸກເບີກຂອງເຮົາ ໃນເມືອງນາວູ, ລັດອິລິນອຍ, ຜູ້ໄດ້ເຕົ້າໂຮມກັນຢູ່ບ້ານຂອງນາງແຊຣາ ຄິມໂບ ໃນປີ 1842 ເພື່ອຈັດຕັ້ງອົງການຂອງເຂົາເຈົ້າເອງຂຶ້ນ, ເຮົາເຫັນແຜນຂອງພຣະເຈົ້າ ສຳລັບການນຳສະມາຄົມສະຕີສົງເຄາະໃຫ້ມາຕັ້ງຢູ່ ແລະ ໃຫ້ສອດຄ່ອງກັບຖານະປະໂລຫິດ. ຫລັງຈາກອີລາຍຊາ ອາ ສະໂນ ໄດ້ຂຽນກົດຂຶ້ນ, ສາດສະດາໂຈເຊັບ ສະມິດ ໄດ້ທົບທວນເບິ່ງ. ເພິ່ນໄດ້ຮັບຮູ້ວ່າ ສາດສະໜາຈັກບໍ່ໄດ້ຖືກຈັດຕັ້ງຂຶ້ນຢ່າງສົມບູນ ຈົນກວ່າ ກຸ່ມສະຕີໄດ້ຖືກຈັດຕັ້ງຂຶ້ນ. ເພິ່ນໄດ້ກ່າວວ່າ ພຣະຜູ້ເປັນເຈົ້າໄດ້ຮັບເອົາການຖວາຍຂອງເຂົາເຈົ້າ ແຕ່ມີສິ່ງອື່ນອີກທີ່ດີກວ່ານັ້ນ. “ຈະຈັດຕັ້ງກຸ່ມສະຕີພາຍໃຕ້ຖານະປະໂລຫິດ ຕາມແບບແຜນຂອງຖານະປະໂລຫິດ,” ເພິ່ນໄດ້ກ່າວ.⁴

“ສະມາຄົມສະຕີສົງເຄາະ ບໍ່ພຽງແຕ່ເປັນກຸ່ມສະຕີກຸ່ມໜຶ່ງອີກເທົ່ານັ້ນ ທີ່ພະຍາຍາມເຮັດຄວາມດີຢູ່ໃນໂລກ. ມັນແຕກຕ່າງ. ມັນເປັນ ‘ບາງສິ່ງທີ່ດີກວ່າ’ ເພາະວ່າ ມັນໄດ້ຖືກຈັດຕັ້ງຂຶ້ນພາຍໃຕ້ສິດອຳນາດຂອງຖານະປະໂລຫິດ. ການຈັດຕັ້ງຂອງມັນເປັນຂັ້ນຕອນທີ່ຈຳເປັນ ໃນການເປີດວຽກງານຂອງພຣະເຈົ້າຢູ່ໃນໂລກ.”⁵

ຂໍ້ພຣະຄຳພີ ແລະ ຂໍ້ມູນເພີ່ມເຕີມ

Doctrine and Covenants 25:2–3, 10; 88:73; reliefsociety.lds.org

© 2017 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ Visiting Teaching Message, January 2017. Laotian. 97921 331

ໃຫ້ພິຈາລະນາສິ່ງນີ້

ສະມາຄົມສະຕີສົງເຄາະຊ່ວຍສະຕີໃຫ້ບັນລຸບົດບາດແຫ່ງສະຫວັນຂອງພຣະບິດາເທິງສະຫວັນສຳລັບເຂົາເຈົ້າ ແລະ ນຳພາເຂົາເຈົ້າໄປສູ່ຊີວິດນິລັນດອນ ໄດ້ແນວໃດ?