ຂ່າວສານຈາກຝ່າຍປະທານສູງສຸດ, ເດືອນມັງກອນ 2017
ການແນໃສ່ ຈຸດໃຈກາງ
ໂດຍ ປະທານດີເດີ ແອັຟ ອຸກດອບ
ທີ່ປຶກສາທີສອງໃນຝ່າຍປະທານສູງສຸດ
ເມື່ອບໍ່ດົນມານີ້, ຂ້າພະເຈົ້າໄດ້ເບິ່ງຜູ້ຄົນກຸ່ມໜຶ່ງ ເຝິກຊ້ອມການຍິງທະນູ. ພຽງແຕ່ຂ້າພະເຈົ້າຫລຽວເບິ່ງ, ກໍເຫັນໄດ້ຢ່າງແຈ່ມແຈ້ງວ່າ ກ່ອນຈະເກັ່ງດ້ານການຍິງທະນູ, ຕ້ອງໃຊ້ເວລາ ແລະ ຕ້ອງເຝິກຝົນ.
ຂ້າພະເຈົ້າບໍ່ຄິດວ່າ ທ່ານສາມາດພັດທະນາຊື່ສຽງດ້ານການເປັນນັກຍິງທະນູທີ່ເກັ່ງກ້າໄດ້ ໂດຍການຍິງລູກສອນໄປໃສ່ຝາຜະໜັງເປົ່າເທົ່ານັ້ນ ແລະ ແລ້ວໄປຂີດວົງກົມອ້ອມໃສ່ລູກສອນ. ທ່ານຕ້ອງຮຽນຮູ້ວິທີຊອກຫາເປົ້າ ແລະ ຍິງໄປຖືກຈຸດໃຈກາງ.
ການແຕ້ມຮູບເປົ້າ
ການຍິງລູກສອນກ່ອນ ແລະ ໄປຂີດວົງກົມອ້ອມຮອບລູກສອນ ອາດເບິ່ງຄືວ່າ ເປັນເລື່ອງຕະຫລົກ, ແຕ່ບາງເທື່ອ ຕົວເຮົາເອງກໍປະພຶດຕົນແບບດຽວກັນນັ້ນ ໃນບາງສະຖານະການໃນຊີວິດ.
ໃນຖານະທີ່ເປັນສະມາຊິກຂອງສາດສະໜາຈັກ, ເຮົາມັກໂນ້ມອ່ຽງ ທີ່ຈະຕິດແທດຢູ່ກັບໂຄງການຂອງພຣະກິດຕິຄຸນ, ຫົວຂໍ້, ແລະ ແມ່ນແຕ່ຄຳສອນ ທີ່ເບິ່ງຄືວ່າ ເປັນໜ້າສົນໃຈ, ສຳຄັນ, ຫລື ມ່ວນຊື່ນສຳລັບເຮົາ. ເຮົາມັກພະຍາຍາມຂີດເສັ້ນອ້ອມສິ່ງດັ່ງກ່າວ, ເຮັດໃຫ້ເຮົາເຊື່ອວ່າ ເຮົາແນໄປໃສ່ຈຸດໃຈກາງຂອງພຣະກິດຕິຄຸນ.
ນັ້ນເປັນສິ່ງງ່າຍທີ່ຈະເຮັດ.
ຕະຫລອດຊົ່ວທຸກຍຸກທຸກສະໄໝ ເຮົາໄດ້ຮັບຄຳແນະນຳທີ່ດີເລີດ ແລະ ໄດ້ຮັບການດົນໃຈຈາກສາດສະດາຂອງພຣະເຈົ້າ. ເຮົາຍັງໄດ້ຮັບການຊີ້ນຳ ແລະ ໄດ້ຮັບຄວາມແຈ່ມແຈ້ງ ຈາກປຶ້ມ, ຄູ່ມື, ແລະ ຫລັກສຸດຕ່າງໆ ຂອງສາດສະໜາຈັກ. ເຮົາສາມາດເລືອກຫົວຂໍ້ພຣະກິດຕິຄຸນທີ່ເຮົາມັກໄດ້ຢ່າງງ່າຍດາຍ, ແຕ້ມຮູບວົງມົນໃສ່ອ້ອມມັນ, ແລະ ແຈ້ງບອກວ່າ ເຮົາໄດ້ພົບເຫັນຈຸດໃຈກາງຂອງພຣະກິດຕິຄຸນແລ້ວ.
ພຣະຜູ້ຊ່ວຍໃຫ້ລອດໃຫ້ຄວາມແຈ່ມແຈ້ງ
ນີ້ບໍ່ແມ່ນບັນຫາສະເພາະສະໄໝຂອງເຮົາເທົ່ານັ້ນ. ໃນສະໄໝບູຮານ, ຜູ້ນຳຝ່າຍສາດສະໜາ ໄດ້ໃຊ້ເວລາຫລາຍສົມຄວນ ໃນການຮຽບຮຽງ, ຈັດອັນດັບ, ແລະ ໂຕ້ຖຽງກັນວ່າ ໃນພຣະບັນຍັດໜຶ່ງຮ້ອຍຂໍ້ ແມ່ນຂໍ້ໃດທີ່ສຳຄັນຫລາຍກວ່າໝູ່ໝົດ.
ມື້ໜຶ່ງ ມີນັກປາດອາຈານກຸ່ມໜຶ່ງ ໄດ້ພະຍາຍາມໃຫ້ພຣະຜູ້ຊ່ວຍໃຫ້ລອດເຂົ້າຮ່ວມໃນການໂຕ້ຖຽງກັນ. ເຂົາເຈົ້າໄດ້ຂໍໃຫ້ພຣະອົງລົງຄວາມຄິດຄວາມເຫັນ ກ່ຽວກັບຫົວຂໍ້ທີ່ໜ້ອຍຄົນລົງເອີ່ຍກັນໄດ້.
“ອາຈານເອີຍ,” ເຂົາເຈົ້າໄດ້ຖາມພຣະອົງ, “ໃນພຣະບັນຍັດ ແມ່ນຂໍ້ໃດ ທີ່ເປັນຂໍ້ໃຫຍ່ສຳຄັນທີ່ສຸດ?”
ເຮົາທຸກຄົນຮູ້ວ່າພຣະເຢຊູໄດ້ຕອບຢ່າງໃດ: “ຈົ່ງຮັກອົງພຣະຜູ້ເປັນເຈົ້າດ້ວຍສຸດໃຈ, ດ້ວຍສຸດຈິດ, ແລະ ດ້ວຍສຸດຄວາມຄິດຂອງເຈົ້າ.
“ນັ້ນແຫລະ ແມ່ນພຣະບັນຍັດຂໍ້ໃຫຍ່ ແລະ ຂໍ້ຕົ້ນ.
“ຂໍ້ທີສອງກໍເໝືອນກັນຄື, ຈົ່ງຮັກເພື່ອນບ້ານເໝືອນຮັກຕົນເອງ.
“ພຣະບັນຍັດທັງໝົດ ແລະ ບັນດາຖ້ອຍຄຳຂອງສາດສະດາ ກໍຂຶ້ນກັບພຣະບັນຍັດສອງຂໍ້ນີ້ແຫລະ.”1
ຂໍໃຫ້ພິຈາລະນາປະໂຫຍກສຸດທ້າຍ: “ພຣະບັນຍັດ ທັງໝົດ ແລະ ບັນດາຖ້ອຍຄຳຂອງສາດສະດາ ກໍຂຶ້ນຢູ່ກັບພຣະບັນຍັດສອງຂໍ້ນີ້ແຫລະ.”
ພຣະຜູ້ຊ່ວຍໃຫ້ລອດ ບໍ່ພຽງແຕ່ສະແດງໃຫ້ເຮົາເຫັນເປົ້າເທົ່ານັ້ນ, ແຕ່ພຣະອົງຍັງໄດ້ແຈ້ງບອກໃຫ້ຮູ້ວ່າຈຸດໃຈກາງນັ້ນຢູ່ໃສນຳອີກ.
ການຍິງຖືກເປົ້າ
ໃນຖານະທີ່ເປັນສະມາຊິກຂອງສາດສະໜາຈັກ, ເຮົາເຮັດພັນທະສັນຍາທີ່ຈະຮັບເອົາພຣະນາມຂອງພຣະເຢຊູຄຣິດ. ຄວາມແນ່ນອນໃຈໃນພັນທະສັນຍານັ້ນ ຄືຄວາມເຂົ້າໃຈວ່າ ເຮົາຈະພະຍາຍາມຮຽນຮູ້ກ່ຽວກັບພຣະເຈົ້າ, ຮັກພຣະອົງ, ເພີ່ມສັດທາຂອງເຮົາໃນພຣະອົງ, ໃຫ້ກຽດພຣະອົງ, ເດີນໄປໃນເສັ້ນທາງຂອງພຣະອົງ, ແລະ ຢືນຢູ່ຢ່າງໝັ້ນຄົງເປັນພະຍານຂອງພຣະອົງ.
ເມື່ອເຮົາຮຽນຮູ້ກ່ຽວກັບພຣະເຈົ້າ ແລະ ຮູ້ສຶກເຖິງຄວາມຮັກຂອງພຣະອົງທີ່ມີຕໍ່ເຮົາຫລາຍຂຶ້ນເທົ່າໃດ, ເຮົາຍິ່ງຈະຮູ້ວ່າ ການເສຍສະລະອັນເປັນນິດຂອງພຣະເຢຊູຄຣິດ ເປັນຂອງປະທານອັນສູງສົ່ງຈາກພຣະເຈົ້າຫລາຍຂຶ້ນເທົ່ານັ້ນ. ຄວາມຮັກຂອງພຣະເຈົ້າດົນໃຈເຮົາໃຫ້ໃຊ້ເສັ້ນທາງແຫ່ງການກັບໃຈທີ່ແທ້ຈິງ, ຊຶ່ງຈະນຳການມະຫັດສະຈັນແຫ່ງການໃຫ້ອະໄພມາໃຫ້ເຮົາ. ຂັ້ນຕອນດັ່ງກ່າວ ຈະຊ່ວຍເຮົາໃຫ້ມີຄວາມຮັກ ແລະ ມີຄວາມເຫັນອົກເຫັນໃຈຫລາຍກວ່າເກົ່າ ຕໍ່ຄົນທີ່ຢູ່ອ້ອມຮອບເຮົາ. ເຮົາຈະຮຽນຮູ້ທີ່ຈະຫລຽວເຫັນຜ່ານຂ້າມຊື່ສຽງ. ເຮົາຈະຕ້ານທານກັບການລໍ້ລວງ ໃນການກ່າວຫາ ຫລື ຕັດສິນຄົນອື່ນ ເພາະການບາບ, ຈຸດອ່ອນ, ຄວາມບົກພ່ອງ, ຄວາມເອ່ນອຽງເລື່ອງການເມືອງ, ຄວາມເຊື່ອຖືເລື່ອງສາດສະໜາ, ສັນຊາດ, ຫລື ຜິວພັນຂອງເຂົາເຈົ້າ.
ເຮົາຈະເຫັນທຸກຄົນທີ່ເຮົາພົບເຫັນ ວ່າເປັນລູກຂອງພຣະບິດາເທິງສະຫວັນຂອງເຮົາ—ເປັນອ້າຍເອື້ອຍນ້ອງຂອງເຮົາ.
ເຮົາຈະເອື້ອມອອກໄປຫາຄົນອື່ນ ໃນຄວາມເຂົ້າໃຈ ແລະ ໃນຄວາມຮັກ—ແມ່ນແຕ່ຄົນທີ່ເຮົາອາດຮັກໄດ້ຍາກ. ເຮົາຈະໂສກເສົ້າກັບຄົນທີ່ໂສກເສົ້າ ແລະ ປອບໂຍນຄົນທີ່ຕ້ອງການ ການປອບໂຍນ.2
ແລະ ເຮົາຈະຮັບຮູ້ວ່າ ບໍ່ຈຳເປັນສຳລັບເຮົາທີ່ຈະກັງວົນກ່ຽວກັບຈຸດເປົ້າໝາຍທີ່ຖືກຕ້ອງຂອງພຣະກິດຕິຄຸນ.
ພຣະບັນຍັດຂໍ້ໃຫຍ່ ແລະ ຂໍ້ຕົ້ນສອງຂໍ້ ຄືເປົ້າ. ພຣະບັນຍັດທັງໝົດ ແລະ ບັນດາຖ້ອຍຄຳຂອງສາດສະດາ ກໍຂຶ້ນກັບພຣະບັນຍັດສອງຂໍ້ນີ້ແຫລະ.3 ເມື່ອເຮົາຮັບຮູ້ພຣະບັນຍັດຂໍ້ນີ້, ແລ້ວສິ່ງອື່ນໆທີ່ດີ ຈະເຂົ້າທີ່ເຂົ້າທາງຂອງມັນ.
ຖ້າຫາກຄວາມຕັ້ງໃຈ, ຄວາມຄິດ, ແລະ ຄວາມພະຍາຍາມຂອງເຮົາ ຈົດຈໍ່ຢູ່ທີ່ການເພີ່ມຄວາມຮັກຂອງເຮົາ ຕໍ່ພຣະເຈົ້າຜູ້ຊົງລິດອຳນາດຍິ່ງໃຫຍ່ ແລະ ມີໃຈເພື່ອແຜ່ຕໍ່ຄົນອື່ນ, ແລ້ວເຮົາຈະສາມາດຮູ້ວ່າ ເຮົາໄດ້ພົບເຫັນເປົ້າທີ່ຖືກຕ້ອງແລ້ວ ແລະ ກຳລັງແນໃສ່ຈຸດໃຈກາງ—ຄືການກາຍເປັນສານຸສິດທີ່ແທ້ຈິງຂອງພຣະເຢຊູຄຣິດ.
© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ First Presidency Message, January 2017. Laotian. 97921 331
ການສອນຈາກຂ່າວສານນີ້
ກ່ອນທີ່ຈະແບ່ງປັນຂ່າວສານນີ້, ທ່ານສາມາດຮ້ອງເພງ “Our Savior’s Love” (Hymns, no. 113). ແລ້ວໃຫ້ຊຸກຍູ້ຄົນທີ່ທ່ານຢ້ຽມຢາມ ໃຫ້ໄຕ່ຕອງເຖິງ “ເປົ້າ” ໃນຊີວິດຂອງເຂົາເຈົ້າ. ທ່ານສາມາດສົນທະນາເຖິງວິທີທີ່ຈະໃຫ້ແນ່ໃຈວ່າ ພຣະບັນຍັດຂໍ້ໃຫຍ່ ແລະ ຂໍ້ຕົ້ນສອງຂໍ້—ຄືທີ່ຈະ “ຮັກອົງພຣະຜູ້ເປັນເຈົ້າ” ແລະ ທີ່ຈະ “ຮັກເພື່ອນບ້ານເໝືອນຮັກຕົນເອງ” (ເບິ່ງ ມັດທາຍ 22:37, 39)—ຈະນຳພາການກະທຳທັງໝົດຂອງເຂົາເຈົ້າຕະຫລອດໄປ. ທ່ານກໍສາມາດແບ່ງປັນວິທີໃດໜຶ່ງໂດຍສະເພາະຕື່ມອີກ ຊຶ່ງໃນນັ້ນ ທ່ານໄດ້ຈົດຈໍ່ຢູ່ທີ່ພຣະຄຣິດ ແລະ ແບ່ງປັນປະຈັກພະຍານຂອງທ່ານ ເຖິງວິທີທີ່ສິ່ງດັ່ງກ່າວໄດ້ເປັນພອນໃຫ້ແກ່ທ່ານແນວໃດ.