Lamharon

Nagapangamuyo para sa Kalinong

Ni Sarah T.

Ang tagsulat nagaistar sa Arizona, Estados Unidos sang Amerika.

Ang akon mga ginikanan pirme nagatambong sa mga miting tapos simba, kag ginabantayan ko ang akon tatlo ka mga manghod nga lalaki kag ginabuligan sila nga maghimo sang ila panyaga—bisan nga masami sila madali maakig kag ginagutom. Sa masami kon nagasugod na sila inaway, madali ko lang masolbar ang magamay nga problema. Apang kon kaisa mabudlay magpatuga sang kalinong kon ang pag-inaway nagsugod na tungod kay nagakairitar ako.

Isa ka hapon, ang akon mga utod nabudlayan gid magpakigbagay sa isa kag isa. Natalupangdan ko nga ang akon pagtinguha nga magpatuga sang kalinong nagpalala pa gid sang sitwasyon tungod akig na ako. Gani naghimo lang ko sang akon kaugalingon nga palanyagahon kag nag-untat sa paghambal. Sang ulihi, naghambal ako, “Mangamuyo ako. Pwede kita maghipos sing makadali?” Sang nagpahimuyong na sila, nagpangamuyo ako nga bendisyunan ang pagkaon. Antes ko gintapos ang pangamuyo, gindugang ko, “Kag palihog buligi kami nga mangin manugtuga sing kalinong.”

Sang primero, dawsa wala lang sila nakabati kag nagsugod naman sing inaway. Natak-an ako apang nahibaloan ko nga kinahanglan ko nga mangin mapinalanggaon kag kalmado kutob sa akon masarangan tungod bag-o lang ako nagpangamuyo para sa kalinong. Pagkatapos sang isa ka minuto, nakabatyag ako sing tuman nga kakalma. Nagkaon ako nga wala sing huluhambal kag ang mga bata sang ulihi nag-untat sing ilinaway. Akon natukiban nga ang kalinong nga akon nabatyagan amo ang sabat sa isa ka simple nga pangamuyo. Nagpangamuyo ako nga mangin tagtuga sing kalinong, kag ang Amay nga Langitnon nagbulig sa akon nga magpabilin nga kalmado sang tinion nga daw masinggit na ako. Nakahibalo ako nga matuod gid nga Iya kita hatagan sing kalinong.