Mensahe sa Visiting Teaching, Pebrero 2017
Ang Pagpasag-uli ni Jesucristo Isa ka Ebidensya sang Gugma sang Dios
Tun-i sing mainampuon ining materyal kag magpangamuyo agud mahibaloan kon ano ang ipaambit.
Pagtuo, Pamilya, Bulig
Ang paghangop nga ang aton Amay nga Langitnon naghatag sang Iya Bugtong nga Inanak agud nga makaangkon kita sang kabuhi nga wala’y kamatayon kag sang potensyal para sa wala’y katapusan nga kabuhi nga nagabulig sa aton nga mabatyagan ang wala’y dulunan kag indi matungkad nga gugma sang Dios para sa aton. Ang aton Manluluwas nagahigugma man sa aton.
“Sin-o bala ang magapahamulag sa aton sa gugma ni Cristo? …
“Kay ginatalupangod ko nga bisan ang kamatayon ukon kabuhi, ukon mga manugtunda, ukon mga punoan, ukon mga gahum, ukon mga butang nga sa karon, ukon mga butang nga palaabuton,
“Ukon kataasan, ukon kadadalman, ukon bisan ano nga iban nga tinuga, indi sarang makapahamulag sa aton sa gugma sang Dios nga yara kay Cristo Jesus nga aton Ginuo”(Mga Taga-Roma 8:35, 38–39).
Parte sa Pagpasag-uli [Atonement] ni Jesucristo, si Elder D. Todd Christofferson sang Korum sang Napulo’g Duha ka mga Apostoles nagsiling: “Ang pag-antos sang Manluluwas sa Getsemani kag ang Iya kasakit sa krus nagatubos sa aton gikan sa sala paagi sa pagsabat sang mga ginapangayo sang hustisya sa aton. Iya ginadab-ot ang kaluoy kag ginapatawad sila nga nagahinulsol. Ang Pagpasag-uli ni Jesucristo nagasabat man sang utang nga ginapangayo sang hustisya sa aton paagi sa pag-ayo kag pagbayad sang kon ano man nga pag-antos nga aton inosente nga ginbatas. ‘Kay yari karon, pagaantuson niya ang mga kasakit sang tanan nga mga tawo, huo, ang mga kasakit sang tagsa ka nagakabuhi nga tinuga, alangay nga mga lalaki, mga babayi, kag mga kabataan nga katapo sang panimalay ni Adan’ (2 Nefi 9:21; tan-awa man sa Alma 7:11–12).”1
Si Cristo “nagtigib sa [aton] sa mga palad sang [Iya] mga kamot” (Isaias 49:16). Si Linda K. Burton, Pangkabilugan nga Pangulo sang Relief Society nagsiling, “Ang inang pinakamataas nga buhat sang gugma dapat nga magpaluhod sang aton sa mapainubuson nga pagpangamuyo sa pagpasalamat sa aton Amay nga Langitnon sa paghigugma sa aton sing husto sa bagay nga Iya ginpadala ang Iya Bugtong kag perpekto nga Inanak sa pag-antos para sa aton mga sala, aton mga kasakit sang balatyagon, kag sa tanan nga indi patas sa aton indibidwal nga mga kabuhi.”2
Dugang nga Balaan nga mga Kasulatan kag Impormasyon
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, February 2017. Hiligaynon. 97922 861
Binagbinaga Ini
Paano bala naton mapabutyag ang aton kapasalamatan kag paghigugma sa Dios kag kay Jesucristo para sa dulot sang Pagpasag-uli sang aton Manluluwas?