Mensahe sang Unang Panguluhan, Pebrero 2017
“Subong Nga Ako Naghigugma sa Inyo”
Ni Pangulong Thomas S. Monson
Pila ka tuig ang nagligad isa ka abyan nga ginhingadlan kay Louis nagsugid sa akon sang isa ka makatalandog nga sugilanon parte sa iya iloy nga malulo kon maghambal. Sang magtaliwan sia, ginbilinan niya ang iya mga anak sang manggad nga indi pinansyal kundi isa ka palanublion sang manggad sa halimbawa, sa pagsakripisyo kag pagkamatinumanon.
Pagkatapos nga mahambal ang mga pagdayaw sa namatay kag ang masubo nga biyahe pakadto sa sementeryo, ang hamtong nga pamilya nagpanghimos sang diutay nga pagkabutang nga nabilin sang ila iloy. Kaupod sa mga ini, nadiskubrehan ni Louis ang isa ka sulat kag isa ka yabi. Ang sulat nagapanulin: “Sa may kanto nga kwarto, sa naidalom nga hunos-hunos sang akon kabinet, may isa ka magamay nga kahon. Nagaunod ini sang manggad sang akon tagipusuon. Ini nga yabi ang magabukas sang kahon.”
Ang tanan natingala kon ano may ara ang ila iloy nga kamahalalon nga ginkandadohan gid.
Ang kahon ginkuha kon sa diin ini nahamtang kag mahinalungon nga ginbuksan sa bulig sang yabi. Sang gin-usisa ni Louis kag sang iban ang mga unod sang kahon, nakita nila ang solo nga larawan sang tagsa ka anak, upod ang ngalan sang anak kag petsa sang pagkabun-ag. Dayon may nabunot si Louis nga isa ka Valentine card. Sa isa ka simple kag pangbata nga agi, nga iya nakilal-an nga iya agi, iya nga ginbasa ang mga pulong nga iya ginsulat 60 katuig na ang nagligad: “Mahal kong Nanay, palangga ko ikaw.”
Ang mga tagipusuon natandog, ang mga tingug naghinay, kag ang mga mata naglinumaw-lumaw. Ang manggad ni Nanay amo ang iya wala’y katapusan nga pamilya. Ang kabaskog sini naghalin sa kaidadalman nga pundasyon sang “Palangga ko ikaw.”
Sa karon nga kalibutan, wala sang iban pa nga lugar nga ang kaidadalman nga pundasyon labi nga ginakinahanglan sangsa panimalay. Kag wala na sang iban pa nga lugar nga ang kalibutan may makita nga mas maayo nga halimbawa sinang kaidadalman nga pundasyon sangsa sa mga puluy-an sang mga Santos sa Ulihing mga adlaw nga naghimo sang gugma nga sentro sang ila pang-pamilya nga pangabuhi.
Sa aton nga nagasugid nga mga sumulunod sang Manluluwas nga si Jesucristo, Iya ginhatag ining malayo-sing-malab-utan nga panulin:
“Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay.
“Sa sini ang tanan nga tawo makahibalo nga kamo mga gintutun-an ko, kon maghigugmaanay kamo.”1
Kon sundon naton ang kasuguan nga magpalanggaanay , kinahanglan naton kabigon ang kada isa sing may kalulo kag respeto nga nagapakita sang aton gugma sa adlaw-adlaw nga pagpakig-angot. Ang gugma nagatanyag sing malulo nga pulong, mapasensyahon nga sabat, isa ka indi maiyaiyahon nga buhat, isa ka mahinangpanon nga dulunggan, isa ka mapinatawaron nga tagipusuon. Sa tanan naton nga mga kaangtanan, ang mga ini kag ang iban pa nga mga kinaiya makabulig nga mangin athagon ang gugma nga yara sa aton mga tagipusuon.
Si Pangulong Gordon B. Hinckley (1910–2008) nakapanilag: “Ang gugma … amo ang tibod sang bulawan sa punta sang balangaw. Apang mas labi pa ini sa punta sang balangaw. Ang gugma yara man sa ginsuguran, kag gikan sa sini naggwa ang katahum nga nagakurba sa kalangitan sa mabagyuhon nga adlaw. Ang gugma amo ang kasiguruhan nga ginahibian sang mga bata, ang handum sang mga lamharon, ang panapik nga nagahugpong sang pag-asawahay, kag ang pangpadanlog nga amo ang nagapaiway sang makaguba nga pagbanggianay sa puluy-an; amo ini ang kalinong sang pagtigulang, ang kasanag sang paglaum nga nagasilak sa tunga sang kamatayon. Daw ano kamanggaran sa ila nga nagakalipay sini sa ila pag-inupdanay upod ang ila pamilya, mga kaabyanan, simbahan, kag mga kasilingan.”2
Ang gugma amo ang pinakakahulugan sang ebanghelyo, ang pinakadungganon nga kinaiya sa tawhanon nga kalag. Ang gugma amo ang kaumpawan sang nagaantos nga mga pamilya, nagabalatian nga mga kumunidad, kag masakiton nga mga pungsod. Ang gugma amo ang isa ka yuhum, isa ka kaway, isa ka maayo nga komento, kag isa ka pagdayaw. Ang gugma amo ang pagsakripisyo, pag-alagad, kag pagka-di-maiyaiyahon.
Mga bana, higugmaa ang inyo mga asawa. Tratoha sila nga may dignidad kag pagpasalamat. Mga kauturan nga babayi, higugmaa ang inyo mga bana. Tratoha sila nga may pagpasidungog kag may pagpaisog.
Mga ginikanan, palanggaa ang inyo mga kabataan. Magpangamuyo para sa ila, tudloi sila, kag magpanaksihon sa ila. Mga kabataan, palanggaa ang inyo mga ginikanan. Ipakita sa ila ang pagtahod, kapasalamatan, kag pagtuman.
Kon wala ang putli nga gugma ni Cristo, laygay ni Mormon,“wala-wala gid [kita].”3 Ang akon pangamuyo amo nga kabay nga sundon naton ang laygay ni Mormon nga “magpangamuyo sa Amay sa bug-os nga ikasarang sang tagipusuon, agud mapuno [kita] sa sining gugma, nga iya ginahatag sa tanan nga matuod nga mga sumulunod ang iya Anak nga si Jesucristo, agud mahimo [kita] nga mangin mga anak sang Dios, agud kon sia magapakita mangin subong kita sa iya.”4
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, February 2017. Hiligaynon. 97922 861
Pagtudlo gikan sa Sining Mensahe
Si Pangulong Monson nagatudlo sa aton sang kaimportante sang pagpakita sang matuodtuod nga Cristohanon nga gugma, ilabi na sa puluy-an. Binagbinaga ang pagpangabay sa ila nga inyo ginabisitahan nga magtipon bilang isa ka pamilya kag hambalan ang mga paagi nga sila sarang magpakita sang dugang pa nga pagpalangga sa isa kag isa. Ayhan mahimo ninyo sila paisugon sa pagpili sang isa sinang mga ideya kag magplano agud malab-ot ini bilang isa ka pamilya. Pareho abi, ang mga miyembro sang pamilya mahimo nga magtanyag sing isa ka sekreto nga pag-alagad sa lain nga miyembro sang pamilya sa tagsa ka semana. Mahimo ninyo sila pangabayon nga sa ulihi ila pamensaron kon paano ang pagtinguha sa paglab-ot sang ila lalab-uton nagpadugang sang pagpalangga sa ila puluy-an.