Cov Hluas
Thov Vajtswv Kom Nyob Kaj Siab Lug
Tus sau zaj no nyob hauv Arizona, USA.
Kuv niam kuv txiv pheej muaj kev sib ntsib tom qab lub sij hawm mus lub koom txoos, kuv thiaj li saib kuv peb tug nus thiab pab lawv ua su noj—ntshe lawv yeej siab luv thiab tshaib plab heev. Feem ntau yog lawv pib sib cav sib ceg, kuv kho tau ib qho teeb meem sai heev. Tiam sis tej lub sij hawm nyuaj rau kuv pab lawv kom kaj siab tom qab lawv pib sib cav vim kuv tab tom ntxhov siab heev.
Muaj ib zaug thaum tav su, nyuaj heev rau kuv cov nus sib raug zoo. Kuv kawm tias thaum kuv sim pab lawv nyob kaj siab lawv haj yam sib cav vim ntxhov siab heev. Yog li ntawd kuv ua su rau kuv tus kheej thiab tsum tsis hais lus ntxiv. Ces, kuv hais tias, “Kuv yuav thov Vajtswv. Nej puas kam nyob twj ywm tau ib me pliag?” Thaum lawv nyob tus me ntsis, kuv tau thov Vajtswv foom koob hmoov rau cov zaub mov. Ua ntej kuv xaus kuv zaj lus thov, kuv hais cov lus no, “Thiab pab peb ua kom lwm tus nyob kaj siab lug.”
Thaum xub thawj, zoo li lawv tsis mloog lus thiab lawv rov qab pib sib cav dua. Kuv nyuaj siab tiam sis kuv paub tias kuv yuav tsum hlub lawv thiab coj tus tus vim kuv nyuam qhuav thov Vajtswv kom nyob kaj siab lug. Ib me pliag tom qab ntawd, ua rau kuv nyob tus tus. Kuv noj mov es tsis hais dab tsi, thiab kuv cov nus tsum tsis sib cav ntxiv. Kuv kawm tias kev kaj siab lug yog Vajtswv tej lus teb rau kuv tej lus thov. Kuv tau thov Vajtswv kom pab lwm tus nyob kaj siab lug, thiab kuv Leej Txiv Saum Ntuj Ceeb Tsheej tau pab kuv nyob tus tus thaum kuv raug ntxias kom qw nrov. Kuv paub tias Nws yeej pab tau peb nyob kaj siab lug.