Cov Mus Saib Xyuas Tom Tsev tsab Xov, Ob Hlis Ntuj 2017
Khetos txoj Kev Theej Txhoj Yog Puav Pheej Qhia txog Vajtswv txoj Kev Hlub
Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi.
Kev Ntseeg, Tsev Neeg, Kev Pab
Qhov uas peb to taub tias peb Leej Txiv Saum Ntuj Ceeb Tsheej txib Nws Tib Leeg Tub kom peb thiaj yuav tsis txawj tuag thiab yuav txais tau txoj sia nyob mus ib txhis pab peb paub Vajtswv txoj kev hlub rau peb uas tsis paub kawg. Peb tus Cawm Seej yeej hlub peb thiab.
“Tsis muaj ib yam dab tsi yuav cais tau peb tawm ntawm Yexus Khetos txoj kev hlub? …
“Rau qhov kuv paub tseeb hais tias tsis muaj ib yam dab tsi yuav cais tau peb ntawm Vajtswv txoj kev hlub, tsis hais kev tuag los sis kev ua neej nyob, cov tim tswv los sis cov uas muaj hwj chim kav saum nruab ntug, nim no los sis yav tom ntej,
saum nruab ntug los sis hauv nruab tiv txwv, los sis ib puas tsav yam uas yog Vajtswv tsim yeej tsis muaj ib yam dab tsi cais tau peb ntawm Vajtswv txoj kev hlub uas nws pub Yexus Khetos uas yog peb tus Tswv los tuag theej peb lub txhoj” (Loos 8:35, 38–39).
Hais txog Yexus Khetos txoj Kev Theej Txhoj, Txwj Laug D. Todd Christofferson los ntawm Pawg Kaum Ob tug Thwj Tim hais tias: “Tus Cawm Seej txoj kev raug txom nyem hauv Khexamenes thiab Nws txoj kev nyuaj siab saum tus ntoo khaub lig txhiv peb dim vim nws them tus nqi ntawm kev txim lij. Nws muab kev siab hlub thiab zam txim rau cov uas hloov siab lees txim. Yexus Khetos txoj Kev Theej Txhoj kho thiab nplij peb lus siab kom them tus nqi uas kev txim lij yuav tsum them rau peb thaum peb raug txom nyem tiam sis tsis tau ua txhaum. ‘Vim saib seb, nws yuav nyiaj tej kev mob ntawm neeg sawv daws, muaj tseeb tiag, yuav nyiaj tej kev mob ntawm txhua tus neeg, tsis hais poj niam, txiv neej, los sis me nyuam yaus, uas yog Adas tsev neeg’ (2 Nifais 9:21; kuj saib Amas 7:11–12).”1
Khetos tau “muab [peb] txaug rau saum [Nws] tej xib teg” (Yaxayas 49:16). Linda K. Burton, Koom Haum Niam Tsev tus Tuam Thawj Tswj Hwm, hais tias, “Txoj kev hlub loj heev no yuav ua rau peb xav txhos caug ntua ua peb Leej Txiv Saum Ntuj Ceeb Tsheej tsaug uas Nws tau txib Nws Tib Leeg Tub uas zoo tag nrho los raug kev txom nyem rau peb tej kev txhaum, kev mob siab, thiab txhua yam uas zoo li tsis ncaj ncees hauv peb lub neej.”2
Vaj Lug Kub thiab tej Ntaub Ntawv Xov Xwm Ntxiv
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais Visiting Teaching Message, February 2017. Hmong. 97922 295
Xav Txog Qhov No
Peb yuav ua li cas kom qhia Vajtswv thiab Yexus Khetos tias peb hlub Nkawd thiab ris Nkawd txiaj vim peb muaj tus Cawm Seej txoj Kev Theej Txhoj?