Agtutubo
Panagkararag para iti Kappia
Agnaed ti nagsurat iti Arizona, USA.
Masansan a dumar-ay dagiti nagannak kaniak kadagiti miting kalpasan ti misa, ket aywanak dagiti tallo nga addik a lallaki ken tulongak ida a mangisagana iti pangngaldaw—nupay masansan a managkuriro ken managbisbisinda. Masansan a no narugiandan ti agaapa, alisto a marisutko ti problema. Ngem no dadduma narigat ti mamagkappia no narugianen ti kinnabil gapu ta intulokko ti kinnabil.
Iti maysa a malem, napalalo a rigat dagiti addik ti agkakatunosan. Ti panangikalikagumko a mamagkakappia ket ad-adda ketdi a nagparikut kadagiti banag agsipud iti pannakaluksawko. Isu nga indatarkon ti bukodko a pangngaldaw ket insardengko ti panagsaok. Kamaudiananna, imbagak, “Agkararagak. Mabalin kadi nga agulimekkayo biit?” Idin a nagsardengda, dimmawatak iti pammendision para iti taraon. Sakbay a sinerraak ti kararag, innayonko, “Ket tulongannakami koma nga agbalin a mamagkakappia.”
Idi damona, kasla dida nangngeg ket rinugianda manen ti agkikinnabil. Masuronak ngem ammok a kasapulak ti agbalin a managayat ken natalna ta inkakaragak a maadaankami iti kappia. Kalpasan ti maysa a minuto, nariknak ti talna. Nanganak a di nagsasao iti ania man, ket in-inut a nagsardengda nga agkikinnabil. Ammok a ti kappia a nariknak ket ti sungbat ti simple a kararag. Inkararagko ti agbalin a mamagkakappia, ket ti Amak a Nailangitan tinulongannak nga agtalinaed a natalna idi masulisogak nga agbugkaw. Ammok a napudno Isuna a mangted iti kappia kadatayo.