Mensahe ti Umuna a Panguluen, Pebrero 2017
“Kas Panagayatko Kadakayo”
Ni Presidente Thomas S. Monson
Sumagmamanon a tawen iti napalabas maysa a gayyem nga agnagan iti Louis ti nangestoria kaniak maipapan ti pakasaritaan ti nadungngo ken naalumamay nga agsasao nga inana. Idi pimmusay ti inana, awan naibatina a kinabaknang a kuarta kadagiti babbaro ken babbalasangna ngem ketdi patawid a kinabaknang iti pagtuladan, iti panagsakripisio, iti panagtulnog.
Kalpasan a naibalikas dagiti pamunpon a pammadayaw ken ti naliday a pannagna a nagturong iti sementerio, inurnos ti pamilia dagiti sangkabassit a sanikua a nabati ti inada. Kadagitoy, natakuatan ni Louis ti surat ken tulbek. Inpatuldo ti surat: “Iti akinsuli a kuarto, iti kababaan a drawer ti dresserko, adda bassit a kahon. Linaon daytoy ti gameng ti pusok. Daytoy a tulbek ti manglukatto iti kahon.”
Nasdaawda amin no ania ti adda iti inada a napnuan pateg tapno idulin ken tulbekanna.
Naala ti kahon manipud iti talimengna ken naannad a naluktan babaen iti tulbek. Bayat ti panangusisa da Louis dagiti linaon ti kahon, nabirukanda ti retrato ti kada ubing nga adda ti nagan ken petsa ti pannakaiyanakna. Idi kuan inruar ni Louis ti maysa nga inaramidna a valentine card. Iti nalaad, a kasla surat ti ubing, a nailasinna a kukuana, nabasana dagiti balikas nga insuratna 60 a tawenen ti napalabas: “Patpatgek a Nanangko, Ay-ayatenka.”
Limmukneng dagiti puso, naalumamay dagiti timek, ken naglua dagiti mata. Gameng ti ina ti agnanayon a pamiliana. Ti tibkerna ket napundar iti pundasion ti “Ay-ayatenka.”
Ditoy lubong kadagitoy nga aldaw, awanen ti panagkasapulan ti pundasion ti nangnangruna nga ayat no di iti pagtaengan. Ken awanen ti rumbeng a pangbirokan ti lubong ti nasaysayaat a pagwadan kadayta a pundasion no di kadagiti pagtaengan dagiti Santo iti Ud-udina nga aldaw a namagbalin iti ayat a biag ti pamiliada.
Kadatayo nga agtakder a disipulo ti Mangisalakan a ni Jesucristo, intedna daytoy naiget a pangiturong:
“Maysa a bilin a baro ti itdek kadakayo, Tapno aggiinnayatkayo iti maysa ken maysa; kas iti panagayatko kadakayo, kasta met aggiinnayatkay koma iti maysa ken maysa.
“Gapu itoy mailasindanto a dakayo ti adalak, no adda ayatyo iti maysa ken maysa.”1
No agtungpaltayo iti bilin nga agayat iti maysa ken maysa, nasken a kalinnangentayo ti tunggal maysa nga addaan-asi ken respeto, ipakita ti ayattayo kadagiti innaldaw a pinaglilinnangen. Mangidiaya ti ayat iti naasi a balikas, naanus a sungbat, napudno nga aramid, lapayag a mannakaawat, mammakawan a puso. Iti amin a pannakilangentayo, dagitoy ken ti dadduma pay a kababalin ket makatulongto a maipakita iti dadduma ti ayat iti puspusotayo.
Ni Presidente Gordon B. Hinckley (1920-2008) napaliiwna: “Ti ayat … ket maysa a banga ti balitok iti murdong ti bullalayaw. Ngem nalablabes pay daytoy ngem iti murdong ti bullalayaw. Ti ayat ket adda pay iti pangrugian, ket dita ti pagtaudan ti kinapintas a naiyuntay iti tangatang iti agbagbagyo nga aldaw. Ti ayat ti talged dagiti agsangit nga ubbing, ti araraw dagiti agtutubo, ti pigket a mamagkappeng iti kallaysa, ken ti lana a manglapped ti riri iti pagtaengan, isu ti kappia iti panaglakay ken panagbaket, ti lawag ti namnama kalpasan ti ipapatay. Anian a kinabaknang dagiti agragsak iti denna dagiti pamilia, gagayyem, ti simbaan ken kakarruba.”2
Ti ayat ti kangrunaan a kaipapanan ti ebanghelio, ken kataknengan a kababalin ti kararua ti tao. Ti ayat ti sungbat dagiti agrigrigat a pamilia, dagit addaan sagubanit a komunidad, ken masaksakit a pagpagilian. Ti ayat ket maysa nga isem, maysa a payapay, maysa a napintas a masao, ken maysa a pammadayaw. Ti ayat ket maysa a sakripisio, serbisio ken di managimbubukod.
Lallaki, ayatenyo dagiti assawayo. Tratuenyo ida nga addaan dignidad ken panangbigbig iti pateg. Kakabsat a babbai, ayatenyo dagiti assawayo. Tratuenyo ida nga addaan dayaw ken pammaregta.
Nagannak, ayatenyo dagiti annakyo. Ikararaganyo ida, suruanyo ida, ken agpaneknekkayo kadakuada. Annak, ayatenyo dagiti nagannakyo. Pakitaanyo ida iti respeto, panagyaman, ken panagtulnog.
No awan ti natarnaw nga ayat ni Cristo, ibalakad ni Mormon, “awan pateg[tayo].”3 Ikararagko a sapay koma ta surotentayo ti balakad ni Mormon nga “agkararag iti Ama iti amin a kabaelan ti pusotayo, tapno maaddaan[tayo] iti daytoy nga ayat, nga impaayna iti amin a napudno a pasurot ti Anakna, ni Jesucristo; tapno agbalin[tayo] nga annak ti Dios; tapno inton agparang, agbalintayonto a kas kenkuana.”4
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, February 2017. Ilokano. 97922 864
Panangisuro manipud iti Daytoy a Mensahe
Isuronatayo ni Presidente Monson maipapan ti pateg ti panangipakita iti pudno a panagayat a kas ken Cristo, nangnangruna iti pagtaengan. Ibilangyo ti panangawis kadagiti sarungkaranyo tapno agguummong a kas pamilia ket paglilinnawagan dagiti wagas a pakaipakitaanda iti ad-adu pay nga ayat iti tunggal maysa. Mabalin nga allukoyendyo ida a pumili ti maysa kadagitoy a kapanunotan ken agaramid kadagiti plano a manggun-od kadagitoy a kas maysa a pamilia. Kas pagarigan, dagiti miembro ket makaipaay iti nalimed a panagserbi iti sabali a miembro ti pamilia tunggal lawas. Mabalin nga awisenyo ida a mangutobto no kasano a ti panangikalikagumda a mangragpat iti panggepda a tun-oyen ket mangpadur-as iti ayat iti pagtaenganda.