Mensahe iti Visiting Teaching, Pebrero 2017
Ti Pannubbot ni Cristo ket Pakakitaan iti Ayat ti Dios
Nainkararagan nga adalenyo daytoy a material ken kalikagumanyo nga ammuen no ania ti ibinglayyo.
Pammati, Pamilia, Tulong
Ti pannakaawat nga inted ti Nailangitan nga Amatayo ti Bugbugtong nga Anakna tapno maaddaantayo iti imortalidad ken potensial para iti biag nga agnanayon ket mangtulong kadatayo a makarikna ti awan patinggana nga ayat ti Dios kadatayo. Ay-ayatennatayo ti Mangisalakan.
“Siasino ti mangisinanto kadatayo iti ayat ni Cristo? …
“Ta diak duaduaen, nga uray ni patay, uray ti biag, uray dagiti anghel, uray dagiti pagturayan, uray dagiti banbanag nga agdama, uray dagiti banbanag nga umayto,
“Uray ti nangato, uray ti nababa, uray aniaman a sabsabali a parsua, didatayto mabalin nga isina iti ayat ti Dios, nga adda ken Cristo Jesus nga Apotayo” (Taga Roma 8:35, 38-39).
Maipapan ti Pannubbot ni Jesucristo, ni Elder D. Todd Christofferson iti Korum Dagiti Sangapulo-ket-dua nga Apostol kinunana: “Ti sinagaba ti Mangisalakan sadiay Getsemane, ken ti saem a nariknana iti krus ti mangsubbot kadatayo manipud iti basol babaen ti panangted kadagiti kiddaw nga ipaay ti hustisia kadatayo. Mangted Isuna iti kaasi ken pammakawan kadagiti agbabawi. Bayadan pay ti Pannubbot ni Cristo ti pautang ti hustisia kadatayo babaen ti panangpalaing ken panangsupapakna ti ania man a sagsagabaentayo. ‘Ta adtoy, inturedna ti rigat ti amin a tao, wen, ti rigat ti amin a sibibiag a naparsua, lallaki, babbai, ken ubbing a padapada, a kameng ti kaamaan ni Adan’ (2 Nephi 9:21; kitaen met iti Alma 7:11–12).”1
Ni Cristo ket “imburikna[tayo] iti dakulap dagiti Im-imana” (Isaias 49:16). Ni Linda K. Burton, Sapasap a Presidente ti Relief Society, kunana, “Ti kangatuan a tignay ti ayat ket tay mangiturong iti tunggal maysa kadatayo nga agparintumeng ken sipapakumbaba nga agkararag tapno agyaman iti Nailangitan nga Ama iti panangipategna unay kadatayo ta imbaonna ti Bugbugtong ken naan-anay nga Anakna tapno agsagaba para kadagiti basbasoltayo, dagiti ladingittayo, ken amin a di naimbag kadagiti bukodtayo a biag.”2
Mainayon a Nasantuan a Kasuratan ken Impormasion
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti Visiting Teaching Message, February 2017. Ilokano. 97922 864
Ibilang Daytoy
Kasano a mayebkastayo ti kinamanagyaman ken ayattayo iti Dios ken ni Jesucristo para iti sagut ti Pannubbot ti Mangisalakan?