Feiā ’Āpī

Pure nō te hau

Nā Sarah T.

Tē ora nei te ta’ata pāpa’i i Arizona, i Marite.

Pinepine tō’u nā metua i roto i te mau ’āpo’ora’a i muri iho i te purera’a, ’e nā’u e hi’o i tō’u nā taea’e e toru, tauturu ia rātou ’e te mā’a—pinepine roa rā rātou i te vai hau noa nō te po’ia. Te rahira’a taime, ’ia taputō rātou, e roa’a iā’u i te fa’a’āfaro ’oi’oi i te mau fifi na’ina’i. Tē vai ra rā te taime, ’ua fifi au i te fa’atupu i te hau i roto i teie taputōra’a, nō te mea e riri ato’a vau.

I te hō’ē avatea, ’ua fa’ariri haere tō’u nau taea’e ’e ’aita iho ā rātou e ’āfaro. ’Ua tāmata haere au i te fa’atupu i te hau terā rā ’ua ino roa mai, ’ua riri ato’a vau. ’Ua fa’aineine a’era vau i ta’u mā’a ’e ’ua fa’aea vau i te parau ia rātou. ’E ’ua parau a’era vau : « Tē pure ra vau. Fa’aea na i te māniania i te tahi taime ? » ’Ua fa’aea mai rātou ’e ’ua pure atura vau e ha’amaita’i mai i te mā’a. Hou vau ’a fa’aoti ai i te pure, ’ua parau vau : « Ha’amaita’i ato’a mai na ia mātou ’ia riro ’ei ta’ata fa’atupu hau ».

Nā mua roa, mai te huru ra ē, ’aita rātou i fa’aro’o ’e ’ua ha’amata fa’ahou i te taputō. ’Ua huru ’īria ri’i au, i ’ite ato’a rā vau ē, tītauhia iā’u ’ia fa’aitoito i te fa’a’ite atu i te here ’e te marū, nō pure noa iho nei ho’i au nō te hau. Hō’ē minuti i muri iho, ’ua marū maita’i tō’u ’ā’au. ’Ua tāmā’a noa vau ’aita hō’ē a’e parau, ē fa’aea ato’a mai nei te mau tamāroa i te taputō. ’Ua puta maira i roto iā’u ē, te hau i roto i tō’u ’ā’au, e pāhonora’a ïa nō te hō’ē pure ’ōhie. I pure ho’i au nō te riro ’ei ta’ata fa’atupu hau, ’e ’ua tauturu mai te Metua i te Ao ra iā’u ’ia vai hau noa ’eiaha rā ’ia topa i roto i te ’ohipa tūtuōra’a. ’Ua ’ite au ē, e nehenehe mau tāna e hōro’a mai i te hau.