Parau poro’i nā te mau tuahine hāhaere, fepuare 2017
’Ua riro te tāra’ehara a te Mesia ’ei fa’a’itera’a pāpū nō te here o te Atua
’A tuatāpapa nā roto i te pure i teie māteria ma te ’imi ’ia ’ite e aha te fa’a’ite atu.
Te Fa’aro’o, Te ’Utuāfare, Te Tōtauturu
Nā te māramaramara’a i te mea ē, ’ua hōro’a mai te Metua i te Ao ra i tāna Tamaiti Fānau Tahi, ’ia noa’a ia tātou te tāhuti ’ore ’e te rāve’a nō te ora mure ’ore, e tauturu ia tātou ’ia putapū i te here oti’a ’ore o te Atua nō tātou, te here e’ita e nehenehe e māramarama roa. ’Ua here ato’a tō tātou Fa’aora ia tātou.
« Nā te aha e fa’ata’a ’ē ia tātou i te aroha o te Mesia ra ? […]
’Ua ’ite mau ho’i au ē, e ’ore te pohe, e ’ore ho’i te ora, e ’ore te mau melahi, e ’ore ho’i te hui ari’i, e ’ore te mau mea mana, e ’ore te mau mea e vai nei, e ’ore ho’i te mau mea e tupu a muri atu,
« E ’ore te teitei, e ’ore ho’i te haeha’a, ’e e ’ore ato’a te mau mea i hāmanihia nei, e ti’a ia fa’ata’a ’ē ia tatou i te aroha o te Atua, i roto i tō tātou Fatu ia Iesu Mesia ra » (Roma 8:35, 38–39).
Nō ni’a i te tāra’ehara a Iesu Mesia, ’ua parau Elder D. Todd Christofferson nō te pupu nō te Tino ’Ahuru Ma Piti ’āpōsetolo : « Nā te mamae o te Fa’aora i Getesemane e tōna māuiui ’oto i ni’a i te satauro e fa’aora ia tātou i te hara nā roto i te fa’ati’ara’a i te mau tītaura’a a te parau ti’a i ni’a ia tātou. E fa’atae ’oia i te aroha ’e te fa’a’orera’a hara ia rātou ’o te tātarahapa. E fa’ati’a ato’a te tāra’ehara i te tārahu a te parau ti’a ia tātou nā roto i te rapa’aura’a ’e te fa’afāitora’a i te mau huru māuiui ato’a tā tātou i fāri’i ma te hapa ’ore. ‘Inaha ho’i, ’ua fa’a’oroma’i ’oia i te māuiui o te ta’ata ato’a, ’oia ïa, te māuiui o te mau ta’ata ato’a, te mau tāne ato’a, ’e te mau vahine ato’a, ’e te mau tamari’i ato’a ho’i, i roto i te fēti’i o Adamu ra’ (2 Nephi 9:21 ; hi’o ato’a Alama 7:11–12) ».1
« ’Ua ha’amau [te Mesia] ia [tātou] i ni’a i [tōna] ’apu rima » (Isaia 49:16). Tē parau nei Linda K. Burton, peresideni rahi nō te Sōtaiete Tauturu : « ’Ia riro taua ’ohipa ra nō te here ’ei fa’atūturira’a ia tātou i raro i roto i te pure ha’eha’a nō te ha’amāuruuru i tō tātou Metua i te Ao ra nō Tōna here ia tātou ’e ’ua tae roa i te tono mai i tāna Tamaiti Fānau Tahi ’e te maitai roa ho’i nō te mamae nō tā tātou mau hara, nō te māuiui o tō tātou ’ā’au, ’e nō te mau mea maita’i ’ore ato’a i roto i tō tātou orara’a ».2
Te tahi atu mau pāpa’ira’a mo’a ’e mau ha’amāramaramara’a
© 2017 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’Īritira’a nō Visiting Teaching Message, February 2017. Tahitian. 97922 895
’A feruri i teie
Nāhea tātou i te fa’a’ite i tō tātou māuruuru ’e tō tātou here, i te Atua ’e ia Iesu Mesia, nō te hōro’a o te tāra’ehara a tō tātou Fa’aora ?