Ennaan eo an Būreejtōnji eo Kein Kajuon, Pāpode 2017
“Āinwōt Iaar Iakwe Kom̧”
Jān Būreejtōn Thomas S. Monson
Jet iiō remootļo̧k juon m̧ōtta etan in Louis eaar kwaļo̧k n̄an eō juon bwebwenato ekaburom̧ōjm̧ōj kōn jinen, eo ejouj. Ke eaar mej, eaar likūt ippān ļōm̧aro nejin im lim̧aro nejin jab jeraam̧m̧an kōn jāān ak juon jolet in waanjon̄ok, ilo kijenmej, ilo pokake.
Ālkin ememļo̧kjeņ ko kōnono kaki ilo ilomej eo im an dedeļo̧k uleej eo, baam̧le eo ekar jino kōjenolo̧k men ko raorōk m̧weien jineer me ekar kakoņi. Ilubwilijin m̧weiuk kein, Louis eaar lo juon leta im juon kii. Meļeļe ko ilo peba eo rekar ba: “Ilo kona in ruum in kiki eo, ilo laļin jikin nuknuk eo aō, ewōr juon bo̧o̧k jidikdik. Epād ie aolepān men ko m̧weieō. Kii in enaaj kōpeļļo̧k bo̧o̧k en.”
Aolep rekar ļōmņak ta menin aorōk ko an jineer bwe emaron̄ kar likūt kii eo ium̧win bo̧o̧k eo eļak.
Rekar kōm̧akūt bo̧o̧k eo jān ijo jikin im kar kōpeļļo̧ke kōn kii eo. Ke Louis im ro jet raar etale kobban bo̧o̧k eo, raar lo pijain kajjojo ajri, etaer im raan in ļotak ko aer. Innām Louis eaar jibwe tok juon peba in valentine emōj kōm̧m̧ane im kainōknōke. N̄an loe, jeje in ajri, eaar kile eļtan pein make, eaar riiti naan ko eaar je 60 iiō remootļo̧k: “Iakwe jinō jitōn bōro, Ij iakwe eok.”
Bōro ko raar m̧ōņōņō, ainikien ko raar mera, im mej ko raar dānin kōm̧jaļaaļ. Men eo eaorōk ippān jinōm̧ eaar baam̧le eo an indeeo. Eaar jurake pedped eo an epen kōn “Ij iakwe eok.”
Ilo laļ in rainin, ijo pedped in iakwe eaikuj in ļapļo̧k ie ej ilo kapijuknen. Im ejjeļo̧k jikin ilo laļ in enaaj lo juon waanjon̄ok in pedped em̧m̧an ļo̧k jen kapijuknen ko an Armej ro Rekwojarjar ro ewōr iakwe ilo mour in baam̧le eo aer.
N̄an kōj ro rej kōņaan rikaļooraņ Rilo̧mo̧o̧r Jisōs Kraist, Eaar letok katak in:
“Kien ekāāl Ij lewōj n̄an kom̧, kom̧win yokwe doon; āinwōt Iar yokwe kom̧, kom̧win barāinwōt yokwe doon.
“Ilo men in armej otemjej renaaj jeļā bwe kom̧ij rikaļoora, eļan̄n̄e kom̧ij yokwe doon”1
Eļan̄n̄e jenaaj kōjparok kien eo n̄an iakwe doon, jej aikuj kōm̧m̧an n̄an doon kōn jouj im kautiej, kwaļo̧k ad iakwe kajjojo raan. Iakwe ej kwaļo̧k naan ko rem̧m̧an, juon uwaak etinkwadik, juon jerbal ejej uwaan, juon lo̧jiln̄i eron̄ ļo̧kjeņ, juon būruwōn eobrak kōn jeorļo̧k bōd. Ilo iien iaiaio ko ad aolep ippān ro jet, men kein im ko jet āinwōt kadkad ko renaaj jipan̄ kam̧ool iakwe eo ilo būruwōd.
Būreejtōn Gordon B. Hinckley (1910–2008) eaar ba: “Iakwe … ej āinwōt juon gold ilo jemļo̧kin juon iia. Aaet eļapļo̧k jen baj jem̧ļo̧kin juon iia. Iakwe ej barāinwōt jinoin, im jān e ej kwaļo̧k aiboojoj eo an ilo mejatoto ilo juon raan ekōdo̧do im nana. Iakwe ej juon jokne eo me ajri ro rej jan̄iti, me jodikdik ro rej jan̄uwaade, kūļu eo ej kapen m̧are ko, im ej weiļ eo ej mijaļ ejjo ko ilo kapijuknen; ej aenōm̧m̧an eo m̧okta, eo ej meram in kōjatdikdik eo ej romaak ilo iien mej. Ewi jon̄an an m̧weie ro rej m̧ōņōņō ilo baam̧le ko aer, ro m̧ōttāer, m̧ōnjar, im ro ipeļaakier.”2
Iakwe elukkuun aorōk ilo gospel in, ej kadkad eo ej make wōt an aolep armej. Iakwe ej unokan kinej ko an baam̧le eo, ej kemour jukjukinpād, im kōmour laļ ko rejorāān. Iakwe ej juon ettōn̄ dikdik, juon jeaļ, naan ejouj, naan in nōbar. Iakwe ej kijenmej, jerbal in jipan̄, im ejjab juwa.
Lōm̧aro pālele, iakwe lim̧aro pāleemi. Kōm̧m̧an n̄an er kōn iakwe im kam̧m̧oolol. Kōrā ro jeiū ak jatū, kom̧win iakwe ļōm̧aro pāleemi. Kōm̧m̧an n̄an er kōn kautiej im rōjan̄.
Mam̧a im baba, iakwe ajri ro nejemi. Jar kōn er, katakin er, im kam̧ool n̄an er. Ajri raņ, iakwe jinōm̧i im jem̧ōm̧i. Kautiej, kam̧m̧oolol, im pokake er.
N̄e ejjeļo̧k iakwe em̧ool an Kraist, Mormon ekar kapilōk, “[kom̧] jekdo̧o̧n.” Ej aō jar bwe jen maron̄ ļoor kapilōk eo an Mormon n̄an “jar n̄an Jemed kōn aolepān būruwōd, bwe [jen] maron̄ obrak kōn iakwe in, eo Ekar letok iood wōj aolep ro rej rikaļoor ro rem̧ool an Nejin, Jisōs Kraist; bwe [jen] maron̄ erom̧ ro nejin Anij, bwe n̄e eitok jenaaj āinwōt e.”4
© 2017 jen Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/16. Kōmālim an ukook: 6/16. Ukook eo an First Presidency Message, February 2017. Marshallese. 97922 874
Katakin jān Ennaan In
Būreejtōn Monson eaar katakin kōj kōn aorōk eo n̄an kwaļo̧k iakwe āinwōt an Kraist, eļaptata ilo kapijuknen. Ļōmņak in kakobaik ro kwoj loļo̧k er bwe ren kuk ippān doon āinwōt juon baam̧le im kōnono kōn wāween ko remaron̄ kwaļo̧k n̄an doon. Kwomaron̄ rōjan̄ er n̄an kālet juon iaan ļōmņak ko im kōm̧m̧ani karōk ko n̄an kōttōpraki āinwōt juon baam̧le. N̄an waanjon̄ok, ro uwaan baam̧le eo remaron̄ pukōt wāween leļo̧k jerbal in jipan̄ n̄an uwaan bar juon baam̧le kajjojo wiik. Innām kwomaron̄ lale ippāer kilen aer tōpar kōttōbar eo aer n̄an kōļapļo̧k iakwe ilo kapijuknen.