Feiā ’Āpī

’Ua fa’aoti a’ena vau

Nā Madison Thompson

Tē ora nei te ta’ata pāpa’i i Utah, i Marite.

Hō’ē taime, ’ua fāri’i au i te ha’api’ira’a maita’i i roto i te piha a te Feiā ’Āpī Tamāhine nō ni’a i te vi’ivi’i ’ore i te pae nō te ’āpeni—hō’ē tumu parau tei fa’ahā’uti’uti i te feiā ’āpī i ni’a i tō rātou pārahira’a. ’Aita vau i ha’amana’o i te mau mea ato’a tā’u i ha’api’i mai i taua mahana ra, ’ua ha’amana’o ra vau i tō’u ti’a fa’atere i te paraura’a nō ni’a i tāna iho mau fa’aturera’a—’ia vai vi’ivi’i ’ore noa i te pae nō te ’āpeni. ’Ua vai noa tāna mau parau i roto iā’u, ’e nō reira ’ua rave au i te fa’aotira’a feruri pāpū ’ia rave i te reira mai te hō’ē o tā’u mau fa’aturera’a faufa’a roa.

I te hō’ē mahana ’a fa’aho’i ai te pere’o’o uta ta’ata iā’u i te fare nā te hō’ē ’ohipa tū’aro mai, ’ua ha’amata te hō’ē ta’ata i roto i te pere’o’o i te hō’ē ha’uti tei pi’ihia te parau mau ’aore rā te ravera’a. ’Ua fiu mātou i te fa’aea noa nō reira ’ua ’āmui atu vau ’e te tahi mau tamari’i i roto i te ha’uti. I te taera’a mai i ni’a iā’u, ’ua tītauhia vau e rave i te hō’ē ’ohipa tā’u i ’ite e ’ere i te mea tano. E riro te reira i te hō’ē fa’aotira’a fifi mau nō’u, ’ua tae mai rā te mau parau a tō’u ti’a fa’atere Feiā ’Āpī Tamāhine i tō’u ferurira’a, e ’ua ’ōhie te mā’itira’a. ’Oi’oi au i te parau atu ’aita. ’Ua feruri a’ena vau i teie fa’aotira’a ’ia tae noa atu vau i mua i teie huru anira’a.

’Ua ’ite au ē ’ia haere ana’e tātou i te purera’a, ’e ’ia vaiiho i te hō’ē vāhi nō te mau mea tā tātou i ha’api’i mai, e ha’amaita’ihia tātou ma te hō’ē pūai rahi mau i te pae vārua ’e te pārurura’a i mua i te mau tāmatara’a o te ao nei.