Parau poro’i a te Peresidenira’a Mātāmua, Māti 2017
Fa’atarahia i te parau ti’a
Nā te peresideni Henry B.Eyring
Tauturu mātāmua i roto i te Peresidenira’a Mātāmua
’Ua parau te peropheta a te Atua i ni’a i te fenua nei, te peresideni Thomas S. Monson ē : « I teie mahana, ’ua pātia tātou i te ti’ahapa i mua i te fa’a’ite’itera’a rahi roa a’e nō te hara, te hāmani ’ino ’e te ’ino rahi ’aita roa i ha’aputuputu a’enei i mua i tō tātou mata ».1
E māere ānei ’outou ’ia parau atu vau ē, ’ua fa’ahiti te peresideni Monson i teie mau parau ’a 50 matahiti i teienei ? Mai te peu i terā rā tau tē pātia ra tātou i te ti’ahapa i mua i te fa’a’ite’itera’a nō te ’ino ’aita i ’itehia a’enei, e aha atu ā ïa te ri’ari’a o te ’ino i teie mahana ? E tumu iho ā tō te Fatu paraura’a nō tō tātou nei tau tu’ura’a ē, « inaha, ’ua ’āmuihia te ’enemi ra » (PH&PF 38:12).
Te tama’i « tei roto tātou i te nu’u fa’ehau »2 ’ua ha’amata nā mua a’e tō tātou fānaura’ahia mai i te fenua nei. ’Ua ha’amata te reira nā mua a’e i te poietera’ahia te fenua nei. ’Ua ha’amata te reira e rave rahi tauatini matahiti i teienei i roto i te ao hou te tāhuti nei, i reira tō sātane ’ōrurehaura’a ’e « ’ua tītau ’ia ha’amou i te ti’amāra’a o te ta’ata » (Mose 4:3).
’Ua pau ’o sātane i roto i taua ’arora’a ra ’e ’ua « hurihia ’oia i rāpae i ni’a iho i te fenua nei » (Apokalupo 12:9) i reira ’ua tāmau noa ’oia i tāna tama’i i teie mahana. I’ō nei i ni’a i te fenua « tē fa’atupu mai nei ’oia i te tama’i i te feiā mo’a nō te Atua ’e tē fa’a’ati nei ’oia ia rātou » (PH&PF 76:29) i te ha’avare, te fa’ahemara’a ’e te mau tāmatara’a.
Tē ’aro nei ’oia i te mau peropheta ’e te mau ’āpōsetolo. Tē ’aro nei ’oia i te ture nō te vi’ivi’i-’ore ’e te mo’ara’a o te fa’aipoipora’a. Tē ’aro nei ’oia i te ’utuāfare ’e te hiero. Tē ’aro nei ’oia i te mea maita’i, te mo’a ’e te hanahana.
Nāhea tātou i te ’aro atu i teie huru ’enemi ? Nāhea tātou i te ’aro atu i te ’ino e au ē, tē horomi’i ra i tō tātou ao ? E aha tō tātou ha’ana tama’i ? ’O vai tō tātou mau hoa tā’ati ?
Te mana o te ’Ārenio
’Ua ha’api’i mai te peropheta Iosepha Semita ē e mana tō sātane i ni’a ia tātou i te fāito noa e fa’ati’a tātou iāna.3
’Ua hi’o ’o Nephi i tō tātou tau « ’ua ’ite i te mana o te ’Ārenio a te Atua i te poura’a mai i ni’a iho i te feiā mo’a o te ’ēkālesia a te ’Ārenio ra, ’e i ni’a iho ho’i i te feiā i mā’itihia e te Fatu ra, ’o tei purara i te mau fenua o te ao ato’a nei ; ’e ’o te parau ti’a ’e te mana o te Atua i te hanahana rahi ra, ’o tā rātou ïa mauha’a » (1 Nephi 14:14 ; reta tei fa’ahuru-’ē-hia).
Nāhea tātou i te fa’atara ia tātou iho i te parau ti’a ’e te mana ? Tē ha’amo’a nei tātou i te mahana sābati ’e tē fa’atura ra i te autahu’ara’a. Tē rave nei ’e tē ha’apa’o nei tātou i te mau fafaura’a mo’a, tē ’ohipa nei i tō tātou ’ā’amu ’utuāfare ’e tē haere nei i te hiero. Tē tūtava tāmau nei tātou ’ia tātarahapa ’e ’ia tāhopu i te Atua ’ia « tu’u mai i te toto tāra’ehara o te Mesia, ’ia fa’a’orehia tā [tātou] nei mau hara » (Mosia 4:2). Tē pure nei tātou ’e tē tāvini nei ’e tē fa’a’ite pāpū nei ’e tē fa’a’ohipa nei i te fa’aro’o i te Mesia.
Tē fa’atara ato’a nei tātou ia tātou iho i te parau ti’a ’e i te mana ’a « ha’aputu noa [ai tātou] i roto i tō [tātou] mau ferurira’a i te mau taime ato’a i te mau parau nō te ora » (PH&PF 84:85). Tē ha’aputu nei tātou i teie mau parau ’a utuhi ai ia tātou iho i roto i te pāpa’ira’a mo’a ’e i roto i te mau parau a te mau tāvini mā’itihia a te Fatu, ’o te fa’a’ite mai i tōna hina’aro, te mana’o ’e te parau (hi’o PH&PF 68:4) i roto i te ’āmuira’a rahi nō te ’āva’e i muri nei.
I roto i tā tātou ’arora’a i te ’ino, ’ia ha’amana’o tāmau noa tātou ē e noa’a ia tātou te tauturu i nā pae e piti o te pāruru. I roto i tō tātou mau hoa tā’ati tē vai ra te Atua te Metua Mure ’Ore, te Fatu ra ’o Iesu Mesia, ’e te Vārua Maita’i.
Tei roto ato’a tō tātou mau hoa tā’ati te mau nu’u ’ite-’ore-hia o te ra’i. « ’Eiaha e mata’u », ’ua parau ’o Elisaia i te hō’ē taure’are’a hanohano ’a fa’aruru ai rātou i te nu’u o te ’ino, « e rahi tō tātou, e iti tō rātou » (hi’o 2 Te mau ari’i 6:15–16).
’Eiaha tātou e mata’u. ’Ua here te Atua i tāna feiā mo’a. E’ita roa ’oia e fa’aru’e ia tātou.
’Ua ’ite au ē, ’ei pāhonora’a i ta’u pure, ’ua fa’atupu te Atua i tā’u mau anira’a nō te fa’aora iā’u i te ’ino. Tē fa’a’ite pāpū nei au ē nā roto i te tauturu a te Atua te Metua, te Fa’aora o te ao nei, ’e te Vārua Maita’i, e nehenehe tātou e pāpū ē e hōro’ahia ia tātou te mana hau atu i te nava’i nō te ’aro atu i te mau mana o te ’ino ’o tā tātou e fa’aruru atu.
’Ia fa’atara tāmau noa tātou ia tātou i te parau ti’a ’ia ti’a ia tātou ’ia ti’aturi i te upo’oti’ara’a hope’a.
© 2017 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’Īritira’a nō First Presidency Message, March 2017. Tahitian. 97923 895