Parau poro’i nā te mau tuahine hāhaere, Māti 2017
Te mana ha’amana o Iesu Mesia ʼe tāna tāra’ehara
’A tuatāpapa nā roto i te pure i teie mātēria ma te ’imi ’ia ’ite e aha te fa’a’ite atu. Nāhea te ta’a-maita’i-ra’a i te fā o te Sōtaiete Tauturu e fa’aineine i te mau tamari’i tamāhine a te Atua nō te mau ha’amaita’ira’a o te ora mure ’ore ?
Fa’aro’o, ’Utuāfare, Tōtauturu
« E ti’a iā’u te mau mea ato’a nei i te Mesia, tei tauturu mai iā’u ra » (Philipi 4:13). « Noa atu e paruparu tō tātou pā’āto’a, e nehenehe tātou e upo’oti’a « ’Oia mau, nā roto i te aroha mau o te Atua, mai te mea ē, e fa’aha’eha’a tātou ia tātou iho ’e ’ia fa’aro’o, e riro te mau mea paruparu ’ei mau mea ’eta’eta ».1
’Ua parau tō tātou Fa’aora i roto i te Parau Ha’api’ira’a ’e te mau Parau Fafau : « E haere au nā mua i tō ’outou mata. E vai ho’i au i tō ’outou pae ’atau ’e i tō ’outou pae ’aui, ’e ’ei roto ho’i tō’u Vārua i tō ’outou mau ’ā’au, ’e ta’u mau melahi ho’i e ’ati noa a’e ia ’outou na, ’ia ha’amara’a mai ia ’outou i ni’a » (PH&PF 84:88).
« ’O Nephi te hō’ē hi’ora’a nō te hō’ē ta’ata tei ’ite, tei māramarama, ’e tei ti’aturi i ni’a i te mana [ha’amana] o te Fa’aora », ’ua parau ’o Elder David A. Bednar nō te pupu nō te Tino ’Ahuru Ma Piti ’āpōsetolo. « I taua taime ra o tō rātou tere, ’ua tā’amu’amu te mau taea’e o Nephi iāna i te taura ’e ’ua ’ōpua e ha’apohe iāna. ’A hi’o na i te pure a Nephi : ‘E te Fatu ē, mai te au i tō’u fa’aro’o, ’o tei roto ia ’oe ra, e fa’aora ’oe iā’u i te rima o tō’u nā tua’ana ; ’oia ïa, ’a hōro’a mai ho’i ’oe i te pūai iā’u ’ia tātara i teie nei taura i ru’uru’uhia ai au nei ra » (1 Nephi 7:17 ; reta tei fa’ahuru-’ē-hia).
« … ’aita ’o Nephi i pure nō te ani ’ia tauihia tōna vaira’a. ’Ua pure rā ’oia nō te ani i te pūai nō te taui i tōna vaira’a. ’E tē ti’aturi nei au ē, i nā reira ’oia i te pure nō te mea ’ua ’ite ’oia, ’ua māramarama ’oia ’e ’ua fāri’i a’ena ’oia i taua mana [ha’amana] ra nō te tāra’ehara.
« ’Aita vau e mana’o nei ē, ’ua topa te mau taura i ru’uru’uhia ai ’o Nephi i tōna rima ’e i tōna fatira’a rima, nā roto i te hō’ē huru manamana. Tē feruri nei ra vau ē, ’ua hōro’ahia mai te pūai ta’a ’ē iāna hau atu i te pūai o te nātura ta’ata, i ti’a ai iāna, ‘nā roto i te pūai o te Fatu’ (Mosia 9:17) ’ia tātara, ’ia tāviri ’e ’ia huti, ’e ’ia tūmutu i te mau taura ».2
Te tahi atu mau ’īrava pāpa’ira’a mo’a ’e mau ha’amāramaramara’a
© 2017 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’Īritira’a nō Visiting Teaching Message, March 2017. Tahitian. 97923 895