Poraus seni ewe Aewin Presetensi, March 2017
Afout ren Wenechar
Seni Preseten Henry B. Eyring
Aemonun Chon Aninis non ewe Aewin Presetensi
Noun Kot soufos won fonufan, Preseten Thomas S. Monson, a affata, “Ikenai, sia nonnom ach sipwe ungeni ewe wachemuken tettenin tipis, oreni mi ngau, me mettoch mi ngaw ir mi nom me mwen mesach.”1
Kopwe mairu om sinei pwe Preseten Monson a apasa ekkena kapas 50 ier a no? Ika kich mi nom ne ungeni ew sokkun tettenin ngau sise sinei usun me akkom, ifa usun napenon ngau epwe aosukosuka kich ikenai? Ren popun mi och, ewe Samon a fen afanafana usun ach ei kinikinin fansoun, Nengeni, ewe chon ungenikich a achufengen (D&C 38:12).
Ewe maun minne “kich mi fiti”2 a fen poputa me mwen sia uputiw won fonufan. A fen poputa me mwen ewe fonufan a foruta. A poputa chommong ngrowun ier a no me non ewe muu me mwen ei fonufan, ikewe Setan a ungeni me kutta an epwe atano ewe pwisin finata an aramas (Moses 4:3).
Setan a kuf non ena maun me “a katurutiw won fonufan” (Pwarata 12:9), ikewe a sopweno an maun ikenai. Ikei won fonufan a maun ngeni ekkewe sounengin Kot, me a rokopwanireno (D&C 76:29) ren chofona, nikatuputup, me sossot.
A maun ngeni ekkewe soufos me aposel. A maun ngeni ewe annukun nimenimoch me nimenimochun pupunu. A maun ngeni ewe famini me ewe tempel. A maun ngeni met mi och, pin, me monomon.
Ifa usun sipwe fiu ngeni ena sokkun chon ungenikich? Ifa usun sipwe fiu ngeni ewe mettoch mi ngaw ewe usun a fen pwonueno ach we fonufan? Met ach fouten eppet? Ion kewe chiechiach?
Ewe Manamanen ewe Nam
Ewe Soufos Joseph Smith a aitikich pwe a chok wor an Setan manaman woch ren ukukun sia mut ngeni i.3
Nifai a kuna ach fansoun, “ua kuna ewe manamanen ewe Namen Kot, pwe a feitiw won ekkewe sounengin ewe mwichefenin ewe Nam, me won ekkewe aramas pwon noun ewe Samon, ekkewe ra toropas fetan won ewe unusen ewe fonufan; iwe ra fotata wenechar me ren ewe manamanen Kot non ning mi napanap” (1 Nifai 14:14; auchean mi kapacheta).
Ifa usun sia afouta pwisin inisich ren wenechar me manaman? Sipwe pinini ewe ranin Sabbath me asamonu ewe pristut. Sia fori me apwonueta pwon mi pin, angang won uruon ach famini, me feino non ewe tempel. Sia soposopono ne achocho ngeni ach sipwe aier me sio ngeni ewe Samon ach sipwe aea ewe cha a surutiw pwe osoren tipis an Kraist pwe sipwe tongeni angei omusomusen ach kewe tipis (Mosaia 4:2). Sia iotek me angang ngeni ekkoch me pwarata me awora nuku non Jises Kraist.
Sia pwan afouta kich pwisin ren wenechar me manaman nupwen sia sopweno ne episekisekano non [ach] ekiek ren ekkewe kapasen manau (D&C 84:85). Sia episekisekieno ekkena kapas ren ach ammono kich non ekkewe pukefel me non ekkewe kapasen noun ewe Samon kewe chon angang mi kefinita, ekkewe repwe atora An mochen, ekiekin, me mongungun (nengeni D&C 68:4) fansoun ewe mwichenapen mwichefen non ewe maram epwe feito.
Non ach fiu ngeni ngau, mi auchea sipwe chok chechemeni pwe mi wor ach aninis seni ir me ruepek ewe pwonupwon. Chiechiach mi pachenong Kot ewe Sam Esemuch, ewe Samon Jises Kraist, me ewe Ngun mi Fel.
Chiechiach mi pwan pachenong ekkewe sounfiun chon nang sise kuner ren mesach. “Kosap nuokus,” Elisha a ureni emon anuon mi nuokus nupwen ra mesengeni ew mwichen sounfiun ngau, “pwe a chommong chon peni kich nap seni chon penir.” (nengeni 2 Kings 6:15–16).
Sisap nuokus. Kot a tongei Noun Souneng. I esap tongeni nikitakicheno.
Ngang mi sinei pwe Kot, ren ponuwen iotek, a fen apwonueta ai tingor an epwe angasaeino seni mi ngau. Ua pwarata pwe ren ewe aninis an Kot ewe Sam, ewe Chon Amanauen ewe fonufan, me ewe Ngun mi Fel, sia tongeni apinukunuk pwe epwe kawor ngenikich nap seni chommong manaman ne ungeni met chok mi ngau sipwe weri.
Amwo sipwe chok afoutakich ngeni wenechar fansoun meinisin pwe epwe tongeni wor ach apinukunuk non ewe amuchunon win.
© 2017 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/16 Kapungunon awewen: 6/16. Chiakun First Presidency Message, March 2017. Chuukese (Trukese). 97923 901