iTukutuku ni Mataveiliutaki Taumada, Maji 2017

Vakayaragi ena Yalododonu

Mai vei Peresitedi Henry B. Eyring

Matai ni Daunivakasala ena Mataveiliutaki Taumada

Peresitedi Henry B. Eyring

Sa cauraka na parofita ni Kalou e vuravura, o Peresitedi Thomas S. Monson, “Nikua, eda sa wavoliti tu ena ivakarau ni ivalavala ca, vakacaca, kei na itovo vakasisila levu duadua era qai bau tuvani e matada.”¹

O na kurabui li ni ko qai kila ni a tukuna na veika oqori o Peresitedi Monson ena 50 na yabaki sa oti? Kevaka eda sa wavoliti tu ena dua na ivakarau tawadodonu ka vou ena gauna oya, sa na qai wacava sara na noda domobula nikua ena itovo vakasisila? Ena inaki vinaka, sa kaya na Turaga me baleta na noda tabagauna, “Raica, era sa cokovata mai na meca” (V&V 38:12).

Na ivalu eda a “lewena vakataucoko”² a tekivu ni bera na noda sucu mai ki vuravura. E a tekivu ni se bera mada ga ni buli na vuravura. E a tekivu ena vuqa na udolu na yabaki sa oti ena itikotiko taumada, ka veivorati kina o Setani ka “segata me voroka na galala ni digidigi ni tamata” (Mosese 4:3).

A druka o Setani ena ivalu oya ka “sa biu ki vuravura” (Ai Vakatakila 12:9), na vanua e sa tomana tiko kina o koya na nona ivalu nikua. Ena vuravura oqo “e sa valuti ira na yalododonu ni Kalou, io sa viribaiti ira ka vakavolivoliti ira” (V&V 76:29) ena lasu, veidabui, kei na veitemaki.

Sa valuti ira na parofita kei na iapositolo o koya. Sa valuta o koya na lawa ni tiko savasava kei na vakamareqeti ni bula vakawati. Sa valuta o koya na matavuvale kei na valetabu. Sa valuta o koya na ka sa vinaka, rokovi, ka vakatabui.

Meda valuta vakacava na meca vakaoqo? Meda vorata vakacava na veika tawadodonu sa vaka me viribaita voli na noda vuravura? Na cava na noda iyaragi? O cei soti na noda ito?

Na Kaukauwa ni Lami

A vakatavulica na Parofita o Josefa Simici ni sa dau rawai keda duadua ga o Setani ena ivakatagedegede eda vakatarai koya kina.³

Ni raici tu na noda gauna, o Nifai a “raica na kaukauwa ni Lami ni Kalou, ni sa curumi ira na lewe ni lotu ni Lami, kei ira talega na nona tamata ni veiyalayalati na Turaga ka ra sa veiseyaki tu e dela i vuravura; ia era sa vakaiyaragi ena yalododonu kei na lagilagi ni nona kaukauwa na Kalou” (1 Nifai 14:14; vakamatatataki).

Meda na vakayaragitaki keda vakacava ena yalododonu kei na kaukauwa? Eda vakatabuya na Siga ni Vakacecegu ka doka na matabete. Eda cakava ka maroroya na veiyalayalati tabu, qarava na noda tuva kawa, ka tiko ena valetabu. Eda saga voli meda veivutuni ka vakamasuta na Turaga me “laiva me bokoca na [noda] ivalavala ca ka vakasavasavataki na [yaloda] ena dra ni isoro i Karisito” (Mosaia 4:2). Eda masu ka veiqaravi ka vakadinadina ka cakacakataka na vakabauti Jisu Karisito.

Eda vakayaragitaki keda talega ena yalododonu kei na kaukauwa ni da “vulica ka nanuma matua tiko na [nona] ivakavuvuli” (V&V 84:85). Eda vulica na veivosa oya ena noda vakaogai keda ena ivolanikalou tabu kei na nodra vosa na italai digitaki ni Turaga, ka ra na wasea na Lomana, Nona nanuma, kei na Domona (raica na V&V 68:4) donuya na koniferedi raraba ni vula mai oqo.

Ena noda veiraravui voli kei na veika tawadodonu, sa dodonu meda dau nanuma tikoga ni tiko na noda veivuke ena yasana ruarua ni ilati. Na noda ito e oka kina na Kalou na Tamada Tawamudu, na iVakabula o Jisu Karisito, kei na Yalo Tabu.

Na noda ito era oka talega kina na mataivalu tawaraici ni lomalagi. “Kakua ni rere,” a kaya o Ilaisa vua na cauravou ka rere voli ni rau sa sotava e dua na mataivalu tawadodonu, “ni ra sa lewe vuqa era sa tiko kei kedaru ka lewe lailai era sa tiko kei ira” (raica na 2 Tui 6:15–16).

Me da kakua ni rere. Na Kalou sa lomani ira na Nona Yalododonu. Ena sega ni vakawaleni keda o Koya.

Au kila ni Kalou, ena isau ni masumasu, e sa vakataucokotaka na noqu vakatakekere me kauti au tani mai na veika tawadodonu. Au vakadinadinataka ni mai na veivuke ni Kalou na Tamada, na iVakabula kei vuravura, kei na Yalo Tabu, sa rawa ni da vakadeitaka ni na soli vei keda e levu cake tale na kaukauwa meda ra-wa kina na veilawalawa tawadodonu cavaga eda sotava.

Me da sa dau vakayaragitaki tu ga ena yalododonu me rawa ni da yalodei kina ena qaqa vakaidina.

© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/16. Vakadonui me vakadewa: 6/16. Vakadewa ni First Presidency Message, March 2017. Fijian. 97923 858

iDusidusi

1. Thomas S. Monson, “Correlation Brings Blessings,” Relief Society Magazine, Apr. 1967, 247.

2. “Meda Vala Tiko,” Sere ni Lotu, naba 150.

3. (Raica na Nodra iVakavuvuli na Peresitedi ni Lotu: Josefa Smith [2007], 243.

Veivakavulici mai na iTukutuku Oqo

E vakananumi keda o Peresitedi Eyring ni da sa veivaluvaluti tiko kei na veika tawadodonu. Sa rawa ni o tekivu ena lagati ni “Meda Vala Tiko” (Sere ni Lotu, naba 150) vata kei ira o vakatavulica. O na rairai sureti ira mera wasea na iwalewale era a taqomaki kina mai na nodra yalododonu ka yavutaka na sala e so ni kena taqomaki na nodra matavuvale mai vei Setani, me vaka na digitaki ni vakauitukutuku momona, tutaki ni matabose vakamatavuvale, se na vakayacori ni lotu vakamatavuvale ena veimacawa. O na rairai bolei ira mera vakasamataka ena masumasu na iwalewale mera taracake kina na nodra itataqomaki vakamatavuvale ka vakauqeti ira mera cakava e dua na ituvatuva me vakayacori kina na nodra nanuma.

• Au Sa Navuca Oti Tu

  Madison Thompson

• Vakayaragitaki Iko