iVaqa ni Veisiko, Maji 2017
Na Kaukauwa Vakaveiwekani i Jisu Karisito kei na Nona Veisorovaki
Vulica ena masumasu na itukutuku oqo ka vakasaqara na veivakauqeti mo kila na ka me wasei. Ena vakarautaki ira vakacava na luve ni Kalou yalewa ki na veivakalougatataki ni bula tawamudu na kena kilai deivaki na inaki ni iSoqosoqo ni Veivukei?
Vakabauta, Matavuvale, Veivukei
“Au sa rawata na ka kecega ena vuku i Karisito o koya sa vakaukauwataki au” (Filipai 4:13). “Dina ga ni sa tu na noda dui malumalumu, eda na rawa ni vorati ira,” e kaya o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada. “Io ena loloma cecere ni Kalou, kevaka eda vakamalumalumutaki keda ka vakabauta, eda na vakaukauwataki ena noda malumalumu.”1
Sa kaya na noda iVakabula ena Vunau kei na Veiyalayalati, “[Au] sa lako vata tiko kei kemudou. Au na tiko e yasamudou imatau ka tiko talega e yasamudou imawi, ia na noqu Yalo Tabu ena tiko e yalomudou; era na vakavolivoliti kemudou na noqu agilosi ka laveti kemudou cake” (V&V 84:88).
“O Nifai sa ivakaraitaki ni dua e kila, kila deivaki, ka vakararavi ki na kaukauwa vakaveiwekani ni iVakabula,” e kaya o Elder David A. Bednar ena Kuoramu ni iApositolo Le Tinikarua. “Rau a vesuki Nifai ena dali na tuakana ka navuca me vakarusai. Yalovinaka vakasamataka mada na masu nei Nifai: ‘Oi kemuni na Turaga, me vaka na noqu vakabauti kemuni, mo ni sereki au mada mai na ligadrau na tuakaqu; io, mo ni solia vei au na kaukauwa me’u drutia rawa na ivesu au sa vesuki tu kina oqo‘ (1 Nifai 7:17; vakamatatataki).
“… e sega ni masuta o Nifai me veisautaki na nona ituvaki. Ia, a masuta o koya na kaukauwa me veisautaki kina na nona ituvaki. Kau vakabauta ni a masu vakaidina o koya ena ivalavala oqo baleta ni sa kila, kila deivaki, ka sa vakila na kaukauwa vakaveiwekani ni Veisorovaki.
“Au sega ni nanuma ni a lutu vakaisausau na dali a vesu tu kina o Nifai mai na ligana kei na kena ilokiloki. Ia, au vakabauta ni a vakalougatataki o koya ena sasaga kei na kaukauwa e sega ni rawata rawa o koya, ka yaco kina ‘ena kaukauwa ni Turaga’ (Mosaia 9:17) me yavala ka veimoiyaki ka drutia laivi na dali, ka yaco sara me tasere laivi na ivesu o ya.”2
iKuri ni iVolanikalou kei na iTukutuku
© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/16. Vakadonui me vakadewa: 6/16. Vakadewa ni Visiting Teaching Message, March 2017. Fijian. 97923 858