Mensahe sang Unang Panguluhan, Marso 2017
Armado sang Pagkamatarong
Ni Pangulong Henry B. Eyring
Unang Manuglaygay sa Unang Panguluhan
Ang propeta sang Dios sa duta, si Pangulong Thomas S. Monson, nagpahayag, “Sa karon nga panahon, nagapangatubang kita sang pinakadaku nga sari sang sala, bisyo, kag kalautan nga natipon sa atubang sang aton mga panulok.”1
Makibot bala kamo kon inyo mahibal-an nga ginmitlang ni Pangulong Monson inang mga pulong 50 katuig na ang nagligad? Kon nagpangatubang kita sang indi matupungan nga sari sang kalautan sadto, ano pa gid ayhan kadaku ang nagahana nga kalautan sa aton sa karon? Sa maayo nga rason, ang Ginuo nagpahayag sa aton dispensasyon, “Tan-awa, ang kaaway natingob” (D&C 38:12).
Ang giyera sa diin “tanan kita nagapasakup”2 nagsugod antes pa kita natawo sa sining kalibutan. Nagsugod ini bisan antes pa gintuga ang kalibutan. Nagsugod ini madamo nga milenya ang nagligad sa ginharian antes sang kabuhi sa duta, sa diin si Satanas nagrebelde kag nagtinguha sa pagdula sang pagbulut-an sang tawo” (Moses 4:3).
Napierde si Satanas sa amo nga inaway kag “ginhulog sia sa duta” (Bugna 12:9), sa diin ginapadayon niya ang iya giyera sa karon. Diri sa duta “nagapakig-away sia sa mga santos sang Dios, kag ginapalibutan sila” (D&C 76:29) sang mga binutig, pagpatalang, kag mga tentasyon.
Nagaaway sia kontra sa mga propeta kag mga apostoles. Nagaaway sia kontra sa layi sang kaputli kag kasagrado sang kasal. Nagaaway sia kontra sa pamilya kag sa templo. Nagaaway sia kontra sa kon ano ang maayo, balaan, kag sagrado.
Paano kita magbato sa amo sina nga kaaway? Paano kita mag-away kontra sa kalainan nga dawsa nagalamon sang aton kalibutan? Ano ang aton taming? Sin-o ang aton mga kadampig?
Ang Gahum sang Cordero
Ang Propetang si Joseph Smith nagpanudlo nga si Satanas may gahum sa aton tubtub lamang sa punto nga ginatugutan naton sia.3
Nga napanan-aw ang aton panahon, si Nefi “nakakita sang gahum sang Cordero sang Dios, nga nagpanaog ini sa mga santos sang simbahan sang Cordero, kag sa katawhan sang kasugtanan sang Ginuo, nga nag-alaplaag sa bug-os nga kadaygan sang duta; kag ang ila hinganiban amo ang pagkamatarong kag kaupod ang gahum sang Dios sa daku nga himaya” (1 Nefi 14:14; pagdagmit gindugang).
Paano naton maarmasan ang aton mga kaugalingon sang pagkamatarong kag gahum? Ginatipigan naton ang Adlaw sang Pagsimba nga balaan kag ginatahud ang priesthood. Nagahimo kita kag nagatipig sang sagrado nga mga kasugtanan, nagahikot sang aton family history, kag nagatambong sa templo. Nagatinguha kita pirme nga maghinulsol kag nagaampo sa Ginuo nga “gamiton ang nagapasag-uli nga dugo ni Cristo agud nga makabaton kita sang kapatawaran sang aton mga sala” (Mosias 4:2). Nagapangamuyo kita kag nagaalagad kag nagasaksi kag nagagamit sang pagtuo kay Jesucristo.
Ginaarmasan man naton ang aton mga kaugalingon sang pagkamatarong kag gahum sa aton “dalayon nga paghatag bili sa [aton] mga hunahuna sang mga pulong sang kabuhi” (D&C 84:85). Ginahatagan naton bili inang mga pulong paagi sa aton pagpamalandong sa balaan nga mga kasulatan kag sa mga pulong sang pinili nga mga alagad sang Ginuo, nga magapaambit sang Iya pagbuot, hunahuna, kag tingog (tan-awa sa D&C 68:4) sa tion sang pangkabilugan nga komperensya sa madason nga bulan.
Sa aton away kontra sa kalainan, dapat gid naton pirme dumdumon nga may bulig kita halin sa pihak kag pihak sang tabon. Ang aton mga kadampig amo ang Dios, ang Wala’y Katapusan nga Amay, ang Ginuong Jesucristo, kag ang Balaan nga Espiritu.
Ang aton mga kadampig nagalakip man sang indi makit-an nga kasuldadohan sang langit. “Dili ka magkahadlok,” siling ni Eliseo sa nahadlok nga lamharon nga lalaki sang sila nagapangatubang sang kasuldadohan sang kalainan, “kay ang mga nagaupod sa aton madamo pa sa mga nagaupod sa ila” (tan-awa sa 2 Mga Hari 6:15–16).
Indi kita kinahanglan magkahadlok. Ang Dios nagapalangga sa Iya mga Santos. Indi gid Niya kita pagtalikdan.
Nakahibalo ako nga ang Dios, sa pagsabat sang pangamuyo, nagtuman sang akon mga pag-ampo nga luwason ako sa kalainan. Nagasaksi ako nga sa bulig sang Dios nga Amay, sang Manluluwas sang kalibutan, kag sang Balaan nga Espiritu, makasalig kita nga hatagan kita sang sobra sa nagakaigo nga gahum agud mabatuan ang kon ano man nga malain nga mga puwersa ang aton ginaatubang.
Kabay nga pirme kita mangin armado sang pagkamatarong agud nga makaangkon kita sang pagsalig sa kadalag-an sa katapusan.
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, March 2017. Hiligaynon. 97923 861