Mensahe sa Visiting Teaching, Marso 2017
Ang Nagasakdag nga Gahum ni Jesucristo kag sang Iya Pagpasag-uli
Tun-i sing mainampuon ining materyal kag magpangayo sang inspirasyon agud mahibaloan kon ano ang ipaambit. Paano bala ang paghangop sa katuyuan sang Relief Society nagahanda sa mga anak nga babayi sang Dios para sa mga bugay sang kabuhi nga wala’y katapusan?
Pagtuo, Pamilya, Bulig
“Makahimo ako sang tanan nga butang paagi kay Cristo nga nagapabakod sa akon” (Mga Taga-Filipos 4:13). “Bisan pa tanan kita may mga kahuyang, mahimo naton madaug ang mga ini,” siling ni Pangulong Dieter F. Uchtdorf, Ika-duhang Manuglaygay sa Unang Panguluhan. “Matuod gid nga paagi sa grasya sang Dios, kon magpaubos kita kag magtuo, ang maluya nga mga butang sarang mangin mabaskog.”1
Ang aton Manluluwas nagasiling sa Doctrine and Covenants, “Magapanguna ako sa inyo atubangan. Mangin yara Ako sa inyo natuo nga kamot kag sa inyo nawala, kag ang akon Espiritu mangin yara sa inyo mga tagipusuon, kag ang akon mga anghel magapalibot sa inyo, sa pagtib-ong sa inyo” (DC 84:88).
“Si Nefi ehemplo sang isa nga nakahibalo, nakahangop, kag nagasalig sa nagasakdag nga gahum sang Manluluwas,” siling ni Elder David A. Bednar sang Korum sang Napulo’g Duha ka mga Apostoles. “Ang mga utod nga lalaki ni Nefi naggapos sa iya sang mga lubid kag nagplano sang iya kahalitan. Palihog tandai ang pangamuyo ni Nefi: ‘O Ginuo, suno sa akon pagtuo nga yara sa imo, itugot nga maluwas ako gikan sa mga kamot sang akon mga utod; huo, hatagi ako sing kusog agud akon mabugras ining mga lubid nga nagagapos sa akon’ (1 Nefi 7:17; pagdagmit gindugang).
“… Si Nefi wala nagpangamuyo nga kambyohon ang iya kahimtangan. Kundi, nagpangamuyo sia para sa kusog agud kambyohon ang iya kahimtangan. Kag nagapati ako nga nagpangamuyo sia sa sini nga paagi tungod pat-od gid nga iya nahibaloan, nahangpan kag naeksperiyensiahan ang nagasakdag nga gahum sang Pagpasag-uli.
“Wala ako nagapati nga ang mga lubid nga gingapos kay Nefi milagro lang nga nagkalahukas sa iya mga kamot kag mga pulso. Kundi, sa akon suspetso ginbugayan sia sing alangay kaukod kag personal nga kabakod nga sobra sangsa iya masarangan, agud nga sia ‘sa kusog sang Ginuo’ (Mosias 9:17) nagpangabudlay kag naglubag kag nagbutong sang mga lubid kag sang ulihi iya gid nasarangan nga bugtuon ang mga gapos.”2
Dugang nga Balaan nga mga Kasulatan kag Impormasyon
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, March 2017. Hiligaynon. 97923 861