Mensahe ti Umuna a Panguluen, Marso 2017
Naigaman iti Kinalinteg
Ni Presidente Henry B. Eyring
Umuna a Mammagbaga iti Umuna a Panguluen
Imbaga ti propeta ti Dios iti daga, ni Presidente Thomas S. Monson, “Iti agdama, napalawlawantayo iti kadakkelan a puersa ti basol, bisio, ken dakes a nagtitipon iti sanguanantayo.”1
Masdaawkayo kadi a maammuan nga insawang ni Presidente Monson dagitan a balikas 50 a tawenen ti napalabas? No napalawlawantayo iti awan kapadana a dakkel a puersa ti kinadangkes idi, kasano ti kadakkel ti peggad nga ited ti dakes kadatayo iti agdama? Para iti nasayaat a gapu, impakdaar ti Apo ti dispensasiontayo, “Adtoy, nagtitipon dagiti kabusor” (DkK 38:12).
Nangrugi ti gubat a “nakailistaantayo amin”2 sakbay a naipasngaytayo iti rabaw ti daga. Nangrugi daytoy uray sakbay pay a naparsua ti daga. Nagrugi daytoy rinibribun a tawen ti napalabas iti biag sakbay daytoy a biag, nga immalsaan idi ni Satanas ken “pinanggepna a dadaelen ti kinawaya ti tao nga agpili” (Moises 4:3).
Naabak ni Satanas iti dayta a gubat ket “naipuruak iti daga” (Apocalipsis 12:9), a pangituloyanna iti pannakigubatna iti agdama. Ditoy daga “nangparnuay iti gubat kadagiti santo ti Dios, ket inalikubkobna ida” (DkK 76:29) iti panagulbod, panangallilaw, ken pannulisog.
Makiranget a maibusor kadagiti propeta ken apostol. Makiranget a maibusor iti linteg ti kinadalus iti dayaw ken ti kinasagrado ti kallaysa. Makiranget a maibusor iti pamilia ken iti templo. Makiranget a maibusor iti nasayaat, nasantuan, ken nasagraduan.
Kasano a labanantayo ti kasta a kabusor? Kasano a labanantayo ti dakes a kasla nangpunnon iti lubongtayo? Ania ti kalasagtayo? Asino dagiti kaanibtayo?
Ti Bileg ti Kordero
Insuro ni Propeta Joseph Smith nga adda bileg ni Satanas kadatayo laeng no palubosantayo isuna.3
Iti panangkitatayo iti panawentayo, ni Nephi, “naimatangan[na] ti bileg ti Kordero ti Dios, a bimmaba kadagiti santo ti simbaan ti Kordero, ken kadagiti natulagan a tao ti Apo, a naiwaraswaras iti amin a dagdaga; ket igamda ti kinalinteg ken addaanda iti nadayag a bileg ti Dios” (1 Nephi 14:14; nainayon ti panangyunay-unay).
Kasano nga igamantayo ti bagbagitayo iti kinalinteg ken bileg? Ngilinentayo a nasantuan ti aldaw ti Sabbath ken dayawentayo ti priesthood. Agaramid ken agtungpaltayo kadagiti sagrado a katulagan, itrabahotayo ti pakasaritaan ti pamiliatayo, ken dumar-aytayo iti templo. Agtultuloy nga ikarigatantayo ti agbabawi ken idawat iti Apo nga “aramaten[na] ti pangsubbot a dara ni Cristo tapno magun-odmi ti pannakapakawan ti basolmi” (Mosiah 4:2). Agkararag ken agserbi ken agpaneknek ken aramatentayo ti pammati ken ni Jesucristo.
Igamantayo pay ti bagitayo iti kinalinteg ken bileg no “italimeng[tayo] iti panunot[tayo] a naynay dagiti balikas ti biag” (DkK 84:85). Italimengtayo dagita a balikas babaen ti panangiraremtayo iti bagitayo kadagiti nasantuan a kasuratan ken kadagiti balikas dagiti napili a katulongan ti Apo, a mangiburayto iti pagayatan, panunot, ken timekna (kitaen iti DkK 68:4) kabayatan ti sapasap a komperensia iti sumaruno a bulan.
Iti pannakibakaltayo a maibusor iti dakes, nasken a kanayon a laglagipentayo nga adda tulongtayo manipud iti agsumbangir ti belo. Mairaman kadagiti kaanibtayo ti Dios nga Agnanayon nga Ama, ni Apo Jesucristo, ken ti Espiritu Santo.
Mairaman pay kadagiti kaanibtayo dagiti saan a makita a buybuyot ti langit. “Dika agbuteng,” imbaga ni Elisha iti maysa a managbuteng a baro bayat ti panangsangoda iti buyot ti dakes, “gapu ta ad-aduda nga adda kadatayo ngem isuda nga adda kadakuada” (kitaen iti 2 Ar-ari 6:15–16).
Masapul a ditayo agbuteng. Ay-ayaten ti Dios dagiti Santona. Iti kaano man dinatayonto baybay-an.
Ammok a ti Dios, kas sungbat iti kararagko, tinungpalna dagiti ararawko nga isalakannak manipud iti dakes. Paneknekak a babaen ti tulong ti Dios Ama, ti Mangisalakan ti lubong, ken ti Espiritu Santo, maipanamnama kadatayo a maikkantayonto iti dakdakkel pay a bileg a mangsarked kadagiti ania man a puersa ti dakes a sanguentayo.
Maigamantayo koma a kanayon iti kinalinteg tapno maaddaantayo iti talek iti kamaudianan a panagballigi.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, March 2017. Ilokano. 97923 864