Mensahe iti Visiting Teaching, Marso 2017
Ti Mangpabael a Bileg ni Jesucristo ken ti Pannubbotna
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawat iti panggep ti Relief Society ket mangisagana kadagiti annak a babbai ti Dios para kadagiti bendision ti agnanayon a biag?
Pammati, Pamilia,Tulong
“Maaramidko ti amin a banag babaen ken Cristo a mangpapigsa kaniak” (Taga Filipos 4:13). “Nupay addaantayo amin kadagiti pagkapsutan, marimbawantayo dagitoy,” kuna ni Presidente Dieter F. Uchtdorf, Maikadua a Mammagbaga iti Umuna a Panguluen. “Agpayso a babaen ti parabur ti Dios a, no ipakumbabatayo ti bagbagitayo ken maaddaantayo iti pammati, makapagbalin a napigsa dagiti nakapsut a banag.”1
Kuna ti Mangisalakan iti Doktrina ken Katulagan, “Addaakto iti sangoyo. Addaakto iti makanawanyo ken iti makanigidyo, ket addanto ti Espirituk iti puspusoyo, ket likmutendakayonto dagiti anghelko, a mangtarabay kadakayo” (DkK 84:88).
“Ni Nephi ti maysa a pagwadan ti maysa a nakaammo, nakaawat, ken nagpannuray iti mangpabael a bileg ti Mangisalakan,” kuna ni Elder David A. Bednar ti Korum dagiti Sangapulo-ket-dua nga Apostol. “Pinungo isuna dagiti kakabsat ni Nephi ket plinanoda ti pannakadadaelna. Basaen koma ti kararag ni Nephi: ‘O Apo, gapu iti pammatik kenka, isalakannak manipud kadagiti ima dagiti kabsatko; wen, ikkannak iti pigsa a mangruk-at iti daytoy a tali a naireppet kaniak’ (1 Nephi 7:17; nainayon ti panangyunay-unay).
“… Saan a nagkararag ni Nephi tapno agbalbaliw ti kasasaadna. Ketdi, nagkararag para iti pigsa a mangbalbaliw kadagiti kasasaadna. Ken namatiak a nagkararag isuna iti kastoy a wagas a sipupudno gapu ta ammona, naawatanna, ken napadasanna ti mangpabael a bileg ti Pannubbot.
“Panagkunak dagiti tali a nangreppet ken ni Nephi ket saan a kasla mahika a naikkat kadagiti ima ken pungupunguanna. No di ketdi, panagkunak isu ket naparaburan iti agpada a panagkagumaan ken bukod a pigsa iti labes ti gagangay a kabaelanna, nga isu ‘babaen ti bileg ti Apo’ (Mosiah 9:17) nawarwar, nalukayan, ken naruk-atanna dagiti reppet, ket iti kamaudiananna nabaelanna a naikkat dagiti tali.”2
Dagiti Mainayon a Nasantuan a Kasuratan ken Impormasion
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti Visiting Teaching Message, March 2017. Ilokano. 97923 864