Mensahe sang Unang Panguluhan, Abril 2017
Ang Matarong Magapangabuhi nga May Pagtuo
Ang Rabi kag ang Manughimo sang Habon
May dumaan nga istorya ang mga Hudio parte sa manughimo sang habon nga wala nagapati sa Dios. Isa ka adlaw samtang nagalakat sia kaupod ang isa ka rabi, nagsiling sia, “May isa ka bagay nga indi ko mahangpan. May relihiyon na kita sa linibo na ka tuig. Pero bisan diin ka magtulok may kalautan, korapsyon, binutig, inhustisya, kasakit, gutom, kag kasingki. Daw wala gid napauswag sang relihiyon ang kalibutan. Gani mamangkot ako sa imo, ano bala ang pulos sini?”
Wala gilayon magsabat ang rabi sa iya pero nagpadayon sa paglakat upod sa manughimo sang habon. Sang ulihi naghinampot sila sa duog nga ginahampangan kon sa diin ang kabataan, nga bulit sang yab-ok, nagahinampang sa duta.
“May isa ka bagay ako nga indi mahangpan,” siling sang rabi. “Tan-awa ang mga bata nga ina. May habon na kita sa sulod sang linibo na ka tuig, pero mahigko gihapon ang mga bata nga ina. Ano ang pulos sang habon?”
Nagsabat ang manughimo sang habon, “Pero rabi, indi man husto nga ibasol mo sa habon kay mahigko ining mga bata. Dapat gamiton anay ang habon bag-o pa sini matuman ang iya katuyuan.”
Nagyuhum ang rabi kag nagsiling, “Husto.”
Paano Bala Kita Magpangabuhi?
Si Apostoles Pablo, nga nagasambit sang isa ka propeta sa Daan ng Katipan, nagpalip-ot sang buot silingon sang pagka-tumuluo sang magsulat sia, “Ang matarong magakabuhi paagi sa pagtuo” (Mga Taga-Roma 1:17).
Ayhan sa sining simple nga pulong mahangpan naton ang kinalain sang relihiyon nga mahuyang kag wala epekto sa isa nga may gahum nga magbag-o sang mga kabuhi.
Pero agud mahangpan ang kahulugan sang magkabuhi nga may pagtuo, kinahanglan naton mahangpan kon ano ang pagtuo.
Ang pagtuo labaw pa sangsa pagpati. Amo ini ang lubos nga pagsalig sa Dios nga naupdan sang buhat.
Labaw pa ini sangsa paghandum.
Labaw pa ini sangsa pagpungko, pagtango sang ulo, kag pagsiling nga nagakumporme kita. Kon magsiling kita nga “ang matarong magakabuhi nga may pagtuo,” nagakahulugan ini nga ginagiyahan kita kag ginapangunahan sang aton pagtuo. Kita nagaakto sa paagi nga suno sa aton pagtuo—indi tungod sang bulag nga pagtuman kundi tungod sa kompiyansa kag sinsero nga pagpalangga sa aton Dios kag sa bilidhon nga kaalam nga Iya ginpahayag sa Iya mga anak.
Ang pagtuo kinahanglan gid nga updan sang buhat; kon indi, wala ini sing kabuhi (tan-awa sa Santiago 2:17). Indi amo sini ang pagtuo. Wala ini sang gahum agud bag-uhon ang isa ka indibidwal, labi na gid ang kalibutan.
Ang mga lalaki kag mga babayi nga may pagtuo nagasalig sa ila maluluy-on nga Amay nga Langitnon—bisan pa sa tion sang wala kapat-uran, bisan sa tion sang pagpangduha-duha kag kabudlayan kon sa diin mahimo nga indi sila makakita sing lubos o makahangop sing maathag.
Ang mga lalaki kag mga babayi nga may pagtuo matutom nga nagausoy sa dalan sang pagkadisipulo kag nagatinguha sa pagsunod sang halimbawa sang ila pinalangga nga Manluluwas nga si Jesucristo. Ang pagtuo ang nagatulod sa aton kag, sa matuod, nagainspirar sa aton nga i-uyon ang aton tagipusuon sa langit kag sa aktibo nga pagdab-ot, pag-alsa, kag pagbugay sang aton isigkatawo.
Ang relihiyon kon wala sing aksyon pareho lang sang habon nga nagapabilin sa karton. Maayo ang potensyal sini, pero sa kamatuoran diutay lang ang gahum sini para magtuga sang kinalain kon indi sini matuman ang iya natalana nga katuyuan. Ang ginpanumbalik nga ebanghelyo ni Jesucristo isa ka ebanghelyo sang aksyon. Ang Simbahan ni Jesucristo nagatudlo sang matuod-tuod nga relihiyon bilang isa ka mensahe sang paglaum, pagtuo, kag pagpalangga sa isigkatawo, lakip na ang pagbulig sa iban sa espirituhanon kag temporal nga mga pamaagi.
Pila ka bulan ang nagligad, ako kag ang akon asawa nga si Harriet nagbakasyon upod ang amon kabataan sa Mediterranean. Nagbisita kami sang pila ka refugee camp kag nangilala sa mga pamilya halin sa mga pungsod nga ginwasak sang giyera. Ining mga tawo indi naton kaupod sa pagtuo, pero mga kauturan naton sila kag nagakinahanglan sang insigida nga bulig. Natandog gid ang amon mga tagipusuon sang maeksperiyensyahan namon mismo kon paano ang aktibo nga mga miyembro sang aton Simbahan nagadala sang bulig, ayuda, kag paglaum sa aton isigkatawo nga nagakinahanglan, wala sapayan sang ila relihiyon, nasyunalidad, ukon iniskwelahan.
Ang pagtuo nga naupdan sang tayuyon nga aksyon nagapuno sang tagipusuon sang kaayo, sang aton hunahuna sang kaalam kag paghangop, kag sang kalag sang kalinong kag pagpalangga.
Ang aton pagtuo sarang magbugay kag mag-impluwensya sing matarong sadtong yara sa aton palibot kag sa aton.
Ang aton pagtuo sarang magpuno sang kalibutan sang kaayo kag kalinong.
Ang aton pagtuo sarang magbaylo sang kaugot sa pagpalangga kag sang mga kaaway sa mga abyan.
Ang mga matarong gali, nagapangabuhi paagi sa pag-aksyon nga may pagtuo; nagakabuhi sila nga nagasalig sa Dios kag nagalakat sa Iya dalan.
Kag amo ina ang klase sang pagtuo nga sarang magbag-o sang mga indibidwal, pamilya, pungsod, kag sang kalibutan.
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, April 2017. Hiligaynon. 97924 861