Mensahe sa Visiting Teaching, Abril 2017

Pangako kag Kasugtanan sang Priesthood

Tun-i sing mainampuon ining materyal kag magpangamuyo agud mahibaloan kon ano ang ipaambit. Paano bala ang paghangop sang katuyuan sang Relief Society nagahanda sa mga anak nga babayi sang Dios para sa mga bugay sang kabuhi nga wala’y katapusan?

Pagtuo, Pamilya, Bulig

Kon mas mahangpan naton bilang kauturan nga babayi nga ang pangako kag kasugtanan sang priesthood magamit naton sing personal, mas mabaton naton ang mga bugay kag mga saad sang priesthood.

Si Elder M. Russell Ballard sang Korum sang Napulo’g Duha ka mga Apostoles nagsiling, “Ang tanan nga naghimo sang sagrado nga mga kasugtanan sa Ginuo kag nagatipig sinang mga kasugtanan nagakaangay sa pagbaton sang personal nga bugna, mabugayan sang pag-alagad sang mga anghel, mangin malapit sa Dios, magbaton sang kabug-osan sang ebanghelyo, kag sa ulihi, mangin mga manunubli upod ni Jesucristo sang tanan nga iya sang aton Amay.”¹

Ang mga bugay kag mga saad sang pangako kag kasugtanan sang priesthood napertineser sa pareho lalaki kag babayi. Si Sister Sheri L. Dew, anay manuglaygay sa Pangkabilugan nga Panguluhan sang Relief Society, nagsiling, “Ang kabug-osan sang priesthood nga yara sa pinakamataas nga mga ordinansa sa puluy-an sang Ginuo sarang lamang mabaton sang lalaki kag babayi nga magkaupod.”²

Si Sister Linda K. Burton, Pang-kabilugan nga Pangulo sang Relief Society, nagpalayag sang sini nga panawagan, “Ginaagda ko kamo nga sauluhon ang pangako kag kasugtanan sang priesthood, nga makita sa Doctrine and Covenants 84:33–44. Sa paghimo naton sini, ginasaad ko sa inyo nga ang Balaan nga Espiritu magapasangkad sang inyo paghangop sang priesthood kag magapadasig kag magatib-ong sa inyo sa manami nga mga paagi.”³

Ang mga panulin ni Joseph Smith sa Relief Society nagatuyo nga ihanda ang kababayin-an nga “magkari sa pag-angkon sang mga pribelihiyo kag bugay kag mga dulot sang priesthood.” Mahanabo ini paagi sa mga ordinansa sang templo.

“Ang mga ordinansa sang templo [mga] ordinansa sang priesthood, pero wala ang mga [ini] nagahatag sang palangakuan sa simbahan sa mga lalaki ukon babayi. [Ang ining mga ordinansa nagatuman] sang saad sang Ginuo nga ang iya katawhan—babayi kag lalaki—‘pagahatagan sang gahum gikan sa ibabaw’ [D&C 38:32].”⁴

Dugang nga Balaan nga mga Kasulatan kag Impormasyon

Doctrine and Covenants 84:19–40; 121:45–46; reliefsociety.lds.org

© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, Abril 2017. Hiligaynon. 97924 861