Mensahe ti Umuna a Panguluen, Abril 2017
Agbiagto dagiti Nalinteg babaen ti Pammati
Ti Rabbi ken ti Agar-aramid iti Sabon
Adda maysa a daan nga Estoria maipapan ti agar-aramid iti sabon a saan a mamati iti Dios. Maysa nga aldaw bayat ti pannagnana a kaduana ti maysa a rabbi, kinunana, “Adda diak maawatan. Adda relihiontayo iti uneg ti rinibu a tawen. Ngem iti amin a lugar adda dakes, panagbasol, kinaulbod, kinaawan hustisia, saem, panagbisin, ken kinaranggas. Makita a ti relihion ket saan a talaga nangpadur-as iti lubong. Isu a saludsodek kenka, ania ti nasayaat iti daytoy?”
Saan a simmungbat a dagus ti rabbi ngem intuloyna ti pannakipannagna iti agar-aramid iti sabon. Idi agangay nadanonda ti maysa playground, a pagay-ayaman dagiti nadungriten nga ubbing.
“Adda banag a diak maawatan,” kinuna ti rabbi “Kitaem dagita nga ubbing. Adda sabontayo iti uneg ti rinibribu a tawen, ngem narugit dagita nga ubbing. Ania ti nasayaat nga ited ti sabon?”
Insungbat ti agar-aramid iti sabon, “Ngem rabbi, saan a nainkalintegan nga ipabasol iti sabon dagitoy nadungrit nga ubbing. Nasken a mausar ti sabon sakbay a maipatungpalna ti panggepna.”
Immisem ti rabbi ket kinunana,“Agpayso.”
Kasano nga Agbiagtayonto?
Ni Apostol Pablo, iti panangadawna iti sao ti maysa a propeta iti Daan a Tulag, ket ginupugopna no ania ti kayat a sawen ti agbalin a mamatpati idi isuratna ti “Agbiagto ti nalinteg gapu iti pammati” (Taga Roma 1:17).
Nalabit iti daytoy a simple a binatog maawatantayo ti pagdumaan ti relihion a nakapuy ken saan a makaaring ken ti maysa nga addaan bileg a mangbalbaliw kadagiti biag.
Ngem tapno maawatan no ania ti kayat a sawen ti agbiag babaen ti pammati, nasken a maawatantayo no ania ti pammati.
Ti pammati ket ad-adda pay nga amang ngem iti panamati. Daytoy ti naan-anay a panagtalek iti Dios a buyogan ti panagaramid.
Ad-adda pay daytoy ngem iti panagtarigagay.
Ad-adda pay daytoy ngem iti panagtugaw, panagtung-ed, ken panangisao nga umanamongtayo. No kunatayo a “ti nalinteg agbiagto gapu iti pammati,” kayattayo a sawen a matarabay ken maiturongtayo gapu iti pammatitayo. Agtignaytayo iti wagas a maitunos iti pammatitayo—saan a gapu iti panagtungpal laeng a saan a pampanunoten ngem gapu iti panagtalek ken napudno nga ayat para iti Dios ken para iti di magatadan a pagsiriban nga impalgakna kadagiti annakna.
Ti pammati nasken a mabuyogan iti panagaramid; no saan awanan daytoy iti biag (kitaen iti Santiago 2:17). Saan a pudno a pammati daytoy. Awanan daytoy iti bileg a mangbalbaliw iti maysa a tao, bay-an nga agmaymaysa iti lubong.
Agtalek dagiti lallaki ken babbai iti naasi a Nailangitan nga Amada—uray kadagiti panawen ti kinaawan namnama, uray kadagiti panawen ti panagduadua ken panagrigat no saanda a naan-anay a makakita wenno dida maawatan.
Sipapasnek a magna iti dalan ti kinadisipulo dagiti lallaki ken babbai nga addaan pammati ken ikarigatanda ti sumurot iti pagwadan ti ay-ayatenda a Mangisalakan, ni Jesucristo. Ti pammati ket mangguyugoy, ken mangparegta kadatayo a mangiruknoy dagiti pusotayo iti langit ken sireregta a mangdanun, mangparegta, ken mangbendision kadagiti padatayo a tattao.
Ti relihion nga awan ti aramid ket kasla sabon nga agtalinaed iti kahon. Mabalin nga addaan daytoy iti nakaskasdaaw a potensial, ngem iti kinapudnona bassit ti bilegna a mangbalbaliw iti biag agingga a dina maipatungpal ti naisangrat a panggepna. Ti ebanghelio ni Jesucristo ket ebanghelio nga addaan iti aramid. Ti Simbaan ni Jesucristo ket mangisursuro iti pudno a relihion kas maysa a mensahe ti namnama, pammati, ken panangngaasi, agraman ti panangtulong iti dadduma iti naespirituan ken temporal a wagwagas.
Sumagmamano a bulan ti napalabas, nagbiahekami iti asawak a ni Harriet a kaduami ti sumagmamano nga annakmi iti lugar ti Mediterranea. Binisitami ti sumagmamano a refugee camp ken nakipagkita kadagiti pamilia a naggapu kadagiti pagilian a rinebba ti gubat. Saantayo a kapada ti pammati dagitoy a tattao, ngem kakabsattayo ida ken kasapulanda ti madagdagus a tulong. Nasagid unay ti puspusomi idi maimatanganmi no kasano a ti naregta a pammati dagiti miembro ti Simbaantayo ken nangisangbay iti tulong, gin-awa ken namnama iti padatayo a tattao nga agkasapulan, ania man ti relihion, nasionalidad, wenno adalda.
Ti pammati a nabuyogan iti agtultuloy nga aramid ket mangpunno iti puso iti kinaasi, ti panunot iti sirib ken pannakaawat, ken ti kararua iti talna ken ayat.
Ti pammatitayo ket mangbendision ken sililinteg a mangimpluensia kadatayo ken kadagiti adda iti aglawlawtayo.
Ti pammatitayo ket mangpunno iti lubong iti kinaimbag ken kinatalna.
Ti pammatitayo ket mamagbalin iti gura iti ayat ken dagiti kabusortayo iti gagayyem.
Kalpasanna, dagiti nalinteg a tao, nga agbiag babaen ti panagtignay a sipapammati; agbiagda babaen ti panagtalek iti Dios ken pannagna iti dalanna.
Ket dayta ti kita ti pammati a makapagbalbaliw iti tunggal tao, pamilia, nasion, ken ti lubong.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, April 2017. Ilokano. 97924 864