Mensahe iti Visiting Teaching, Abril 2017
Sapata ken Katulagan ti Priesthood
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawattayo iti panggep ti Relief Society ket mangisagananto kadagiti annak a babbai ti Dios para kadagiti bendision ti agnanayon a biag?
Pammati, Pamilia, Tulong
Ti ad-adda a pannakaawattayo kas agkakabsat a babbai a ti sapata ken katulagan ti priesthood ket personal a mayaplikar kadatayo, ad-adda met a maawattayo dagiti bendision ken kari ti priesthood.
Kinuna ni Elder M. Russell Ballard ti Korum dagiti Sangapulo-ket-dua nga Apostol, “Amin a nagaramid kadagiti sagrado a katulagan iti Apo ken mangdayaw kadagita a katulagan ket maikari nga umawat iti personal a paltiing, tapno mabendisionan iti panagserserbi dagiti anghel, tapno makisarita iti Dios, tapno umawat ti pakabuklan ti ebanghelio, ken, kangrunaanna, tapno agbalin nga agtawid kas ken ni Jesucristo iti amin nga adda iti Amatayo.”1
Dagiti bendision ken kari ti sapata ken katulagan ti priesthood ket maipanggep iti agpada a lallaki ken babbai. Kinuna ni Sister Sheri L. Dew, sigud a mamagbaga iti Sapasap a Panguluen ti Relief Society, “Ti pakabuklan ti priesthood a naglaon kadagiti kangatuan nga ordinansa ti balay ti Apo ket maawat laeng ti lalaki ken babai a sangkamaysa.”2
Inted ni Sister Linda K. Burton, Sapasap a Presidente ti Relief Society daytoy nga awag, “Awisendakayo a mangyulo iti sapata ken katulagan ti priesthood, a masarakan iti Doktrina ken Katulagan 84:33–44. Babaen ti panangaramid iti daytoy, ikarik kadakayo a padakkelento ti Espiritu Santo ti pannakaawatyo iti priesthood ken paregtaen ken itag-aynakayo iti nakaskasdaaw a wagwagas.”3
Dagiti panangiturong ni Joseph Smith iti Relief Society ket naisangrat a mangisagana kadagiti babbai nga “umay nga agtagikua kadagiti pribilehio ken bendision ken sagut ti priesthood.” Maipatungpalto daytoy babaen dagiti ordinansa ti templo.
“Dagiti ordinansa iti templo [ket] dagiti ordinansa ti priesthood, ngem saanda a mangted iti saad nga ecclesiastical kadagiti lallaki wenno babbai. [Dagitoy nga ordinansa ti mangipatungpal] iti kari ti Apo a dagiti tattaona—babbai ken lallaki—ket maikkan iti bileg manipud iti ngato’ [DkK 38:32].”4
Dagiti Mainayon a Nasantuan a Kasuratan ken Impormasion
Doktrina ken Katulagan 84:19–40; 121:45–46; reliefsociety.lds.org
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti Visiting Teaching Message, April 2017. Ilokano. 97924 864