Klumech er a First Presidency, Ongeua el Buil 2017
A Remelemalt a mo Kiei el Ngara Klemerang
Rabbi me a Meruul a Sob
Ngarngii a chuodel el cheldecheduch el chelid er a re Jew el kirel a tal meruul a sob el chad el dimlak loumerang er a Dios. A ta er a klebesei er a lororael lobengkel a tal rabbi, e ng millekoi el kmo, “Ngarngii a tal tekoi el diak el selmechokl er a uldesuek. Ng mla mo telael el rak el dolab a tekoi er a klechelid. E ng di ngii di el ker e kede mes a mekngit, chelbirukel, cheleblad, diak el melemalt lomeruul, ringel, sengerenger, me a odechelakl. Ng sebeched el kmo a klechelid a dirkak a ngera el relii er a beluulechad. Me a kuker kau, ngera klungiolel?”
Ngika el rabbi a dimlak longer e millemolem el merael lobengkel ngika el meruul a sob el chad. Te mocha er a oililaol el tirkal ngalek el mililil a di, mui er a chebechab, le te milil er a chutem.
“Ngarngii a tal tekoi el diak el selmechokl er a uldesuek,” ngika el rabbi a melkingang. “Ka momes er tirkel ngalek. Ng mla mo telael el rak el dousbech a sob, e ng di tirkel ngalek a di dechudech. Ngera klungiolel a sob?”
Ngika el meruul a sob a dula el kmo, “Rabbi, ng diak el melemalt a moltelechakl el kmo a sob a uchul e tirkal ngalek a dechudech. Ng kired el ousbech er a sob el kudmeklii sel ngii a moktek er ngii.”
Ngika el rabbi a mlo klikmechur e dula el kmo, “Ng meral tekoi.”
Kede Kiei el Uangerang?
A Apostol Paulus, er a loluches, eng dilu tekingel a profet er a Uodel Renged, e silodii a belkul sel bo doumerang el kmo, “A remelemalt a mo kiei el ngara klaumerang” (Rom 1:17).
Chelsel tiaikid el tekoi e ng locha sebeched el mo mtebengar a klekakerous er a klechelid el mechitechut e diak a klisichel er sel ngii a mesisiich el klechelid el meral sebechel lomult a klengar.
E ng di a bo dodengelii a belkul sel de kiei el ngara klaumerang, e ng kired el dirrek el mo medengelii a belkul a klaumerang.
A klaumernag a lmuut el dmolech a belkul er a di oumerang. Ng sel mui el klaumerang er kid er a Dios lobengkel omerelled.
Ng lmuut el ngaruchei er a di oureng.
Ngaruchei er a di dengchokl, e mengitengtik a bdelud, el kmo kede kongei. Sel de du el kmo a “remelemalt a mo kiei el ngara klaumerang,” e ng belkul a kmo kede ulekrael lokiu a klaumera er kid. A omerelled a chatter er a klaumera—er kid el diak di lak er a uldesued olngesenges ng bai okiu sel meral ngara rengud el beltik el reng er kid el mo er a Dios me a ikel diak el mochar el llomes el Ngii a mla ocholt el mo er a Rengelekel.
A klaumerang a kirel lobengkel omeruul; le lak e ng diak a ultutelel (mesa Jakobus 2:17). Ng diak a ta me le klaumerang. Ng diak a klisichel el meltii a tal chad, me a beluulechad.
A rsechal me a redil el urrekodel er a klaumerang a ultuil er a chubechub el Chedam er a Babeluades—luldimukl aikel taem er a bkaischemrungel, me a ikel taem er a rraureng me a cherarou el ngii a diak el cherrungel osenged el kirel me a diak de mui el medengei a uchul.
A rsechal me a redil loba klaumerang a blak a rengrir el merael er a rolir a roltirakl e melasm loltirakl okesiul a betik er a rengrir el Osobel, el Jesus Kristo. A klaumerang a mengesuseu, e meral, omekrael er kid lodars a rengud el bedul babeluades e mo mui el olngeseu, e mesebechakl, e omekngeltengat er a rebebil.
A klechelid el diak lulecholt er a omeruul a uaia a sob el dirk ngara chelsel a blil. Ng betok a sebechel remuul, e ng di a mera er ngii ng diak a klisichel a lak el kedmeklii sel ngii a moktek er ngii. A mla moluut el ebangkelio er a Jesus Kristo a ebangkelio er a omeruul. A Ikelesia er a Jesus Kristo a olisechakl a meral tekingel a klechlid el ngii a klumech er a urunguled, klaumerang, me a bliochel el beltik el reng, luldimukl er a olngeseu er a rebebil er a tekingel a reng me a klechad.
Sesei el buil er a memong, e a bechik, er a Harriet, me a ngak a mla er a omerael lobengterir a rengelekam el mo er a Mediterranean. Aki mlo oldingel a bebil er a basio le kiei er ngii a remechebuul e mlo kebetech lobengterir a retelungalek er a ikel telemall er a mekemad el beluu. Tirka el chad a dimlak el chedal a klechelid er kid, e ng di te mle odam e odos er kid e kmal ulusbech a ngeso. Ng mlo serrechokl a rengmam er a ki mesterir a remesisiich el chedal a Ikelesia er kid luldars a ngeso, me a ungil omeruul, el mo er tirkal ngesool el chad, el diak el iior er a kmo te chad er a ta el klechelid, ta el beluu, malechub e losisiu a llemesir.
A klaumerang el rrengodel er a blechebech lomeruul a mekeek a reng er a blekokeuii, me a llomes er a uldasou me a klemedengei, me a reng lobengkel a budech me a beltik el reng.
A klaumera er kid a sebechel omekngeltengat e uchul a klungiaol el mo er tirkel ngara bita er kid me a kid el dirrek.
A klaumera er kid a sebechel mekekii a beluulechad er a klungiaol me a budech.
A klaumera er kid a sebechel mtechei a reng er a klauketui el mo beltik el reng me a re kaucherarou el mo sechelei.
A remelemalt, el tir, a kiei lultuil er a klaumerang; a kiei loumerang er a Dios e merael er a Rolel.
A tiaikid a teletael er a klaumerang el ngii a sebechel ngodechii a chad, telungalek, beluu, me a beluulechad.
© 2017 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei er a oidel: 6/16. Oidel a First Presidency Message, April 2017. Palauan. 97924 881