Klumech er a Oldingel e Olischakl, Ongeua el Buil 2017
Yakosok me a Telbiil er a Priesthood
Mosuub er tial tekoi lokiu a nglunguuch e mosiik el mo medengelii a bo mobang lolisechakl. Ng mekerang a klemedengei er a moktek er a Relief Society a lekedmekelterir a rengelekel a Dios el redil el kirel a klengeltengat er a diak a ulebengelel klengar?
Klaumerang Telungalek Ngeseu
Kid a rodos sel dorael mo mui el medengei el kmo a yaksok me a telbiil er a priesthood a kmal melutk el kired, e ng sebeched el mo urrekodel aikel klengeltengat me a telbiil er a priesthood.
A Elder M. Russell Ballard er a Chelechad er a Teruich me a teru el Apostol a millekoi el kmo, “A rokui el chad el mla soiseb er a chedaol telbiil lobengkel a Rubak e mengull aikal telbiil a sebecherir el melai a ocholt el mo er tir, e mo mukngeltengat er a re oldingel el anghel, e mo mengedecheduch el mora Dios, e mo nguu a cherrengelel a ebangkelio, ea, ulebongel, e temo ngmai a daisang lobengkel a Jesus Kristo er a ikel rokui el lolab a Demad.”1
A klengeltengat me a yaksok er a chelsel a telbiil er a priesthood a melutk el kirir a rsechal me a redil. A Sister Sheri L. Dew, el ngii a mle counselor er a Cheldellel a Relief Society, a millekoi el kmo, “A cherrengelel a priesthood el ngii a ngara chelsel sel kot el ngarbab el chedaol ruoll er a blil a Rubak a di sebechel mengai er a rsechal me a redil el dmak.”2
A Sister Linda K. Burton, el Merredel er a Cheldellel a Relief Society, a mla otebedii tia el tekoi, “Ak siotai er kemiu el mo medengelii a yaksok me a telbiil er a priesthood, el ngii a debetik er ngii er a Doctrine and Covenants 84:33–44. Sel bom uasiei, e ak yaksok er kemiu el kmo a Chedaol Reng a mo dochel a klemedengei er kemiu el kirel a priesthood e mo omekrael e mesebechakl er kemiu er a ongasireng el teletael.”3
A moktek er a tekingel a Joseph Smith el mo er a Relief Society a kirel kudmekelterir a redil el “ngmai a techall me a klengeltengat me a sengk er a priesthood.” Tia mo mekedmokl lokiu a chedaol ruoll er a templo.
“A chedaol ruoll er a templo [a] chedaol ruoll er a priesthood, e ng di [diak] el besterir a rsechal me a redil a chetengakl el obis. [Aika el chedaol ruoll a kudmeklii] sel yaksok er a Rubak el kmo a rchedal—el redil me a rsechal—a mo ngmai a klengelterngat er a bab’ [D&C 38:32].”4
Bebil er a Chedaol Llechukl me a Omesodel
Doctrine and Covenants 84:19–40; 121:45–46; reliefsociety.lds.org
© 2017 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei er a oidel: 6/16. Oidel a Visiting Teaching Message, April 2017. Palauan. 97924 881