Poraus seni ewe Aewin Presetensi, June 2017
Kokko ngeni ewe Angang
Nupwen ewe Soufof Joseph Smith a kokkori Elter Heber C. Kimball (1801–68) an epwe “suki ewe asamen manaw” pwe epwe emon misineri non England, Elter Kimball a mefi pwe a nipwakingau.
“O, Samon,” a makkei, “Ngang emon aramas mi nipwakingaw ne kapas, o ren meinisin use fich ngeni ewe angang.”
Elter Kimball a etiwa ewe kokko iwe nge ren ena, a apachata: “Ekkei ekiek rese etipemwaramwaraeino seni ewe anen wis; ewe fansoun uwa weweiti mochenin Samach Kot won Nang, ngang uwa mefi ew auchean popun ai upwe feino ngeni sokkun efeiengaw meinisin, fiti ai nuku pwe I epwe anisiei ren an pochokunen manaman, me awora ngeniei meinisin tufich a murinno epwe wor rei.”1
Pwi me fefinei onuon me fopun ekkewe oua kokko ngeni ami oupwe fori angangen misineri, oua kokko ngeni ewe angang pokiten ami, ussun Elter Kimball, oua mochen oupwe angang ngeni Kot (D&C 4:3) me pokiten oua moneta me nimenimoch.
Ekkewe chinap misineri, oua kokko ngeni ewe angang ren chok pwan ena popun. Ami, ouse chok wato ew mochen ami oupwe angang nge pwan anapano mirit seni fansoun fangeno, tong, me sinei pwe Sememi won Nang a tongeni aea ne atapa netipen noun kewe at me nengin ekkewe ra kukkuta ewe ennet. Ese wor tipemwaramwaran oua fen kaeo pwe sise tongeni ennetin tongei ewe Samon tori ach sipwe anang ngeni ren ach angang ngeni ekkoch.
Ren om mochen kopwe angang ussun emon misineri, kopwe apachata nuku me pochokun, poracho me epinukunuk, sinei wewen me pochokunen tongeni, auchean popun me mochen fangeno. Misineri mi achocho ra tongeni wato manaman non ewe neni ra fori angangen misineri ie.
Preseten John Taylor (1808–87) a pwan apasa non pwan ekkoch kapas ussun namotan me auchean misineri non ei napanap: “Ewe sokkun mwan [me fefin pwan mi pupunu] sia mochen ussun chon atoura ei porousen ei kapas allim ekkewe mwan mi wor ar nuku non Kot; mwan mi wor ar nuku non ar mwichefen; mwan mi afona ar pristut; mwan ekkewe … a wor an Kot apinukunuk non. … Sia mochen ekkewe mwan mi ur ren ewe Ngun mi Fel me ewe manamanen Kot[,] … mwan mi amafen, ennet, namot me nimenimoch.”2
Ewe Samon a fen affata:
Nengeni ewe atake, uan kewe ra mau iwe a ochun epwene kinikin; o nengeni, i ewe a nuku non an ewe pisekin atake fiti an pochokun, ussun chok pwa an iseni non nenien iseis pwe i esap mano, nge epwe wato manau ngeni ngunun;
Me nuku, epinukunuk, angangen kirekiroch me tong, fiti om kopwe chok nenneno mwom ngeni ewe ningen Kot, a fich ngeni ewe angang ( D&C 4:4–5).
Om kokko a feitto seni ewe amemmefin mochen fori ewe angang. Uwa pwarata pwe ion Kot a kokori, Kot a finata. Kopwe angei aninis seni nang nupwen ka angang fiti iotek non ewe atake an ewe Samon.
Ewe murinon pwon ewe Samon a ngeni ekkewe misineri me akkom me non ei kinikinin fansoun, ussun a fen masoweni non ewe Doctrine and Covenants, epwe om: Upwe feinno mwen mesom. Upwe nom won penie mwanun me penie fefinom, me Nguni epwe nom non netipom, me nei kewe chon nang repwe nom unukum, ar repwe apochokunok (nengeni DC 84:88).
Nupwen ka angang, kopwe forata minen achem me echiechi mi murinno. Ese wor ew neni uwa sinei minne a awora chommong murinnon uwan pwapwa me nukun ewe nenien angangen misineri.
Iei, ew kapas fan iten ekkana elters, sisters, me misineri mi pupunu ion, meni resap tufichin ar repwe awesano ar fansoun mi finita non ewe nenien angangen misineri ren ese pwan nifinifin popun: Ewe Samon a tongekemi. A etiwa ami angangen asoren fangeno. A weweiti ami osukosuk. Kopwe sinei pwe mi chiwen wor an angang kopwe fori. Kosap mut ngengi Setan epwe fen wisen uronuk. Kosap netipengaw; kosap tipemwaramwar; kosap fangeta.
Nupwen uwa kakaton mwichenap ekis fansoun mwirin ai uwa kokko ngeni ai upwe emweni ewe Mwichefen: “ Kosap nuokus. Kopwe pwapwa. Ewe fansoun mwach a saram ussun om nuku.” Ewe pwon mi chok chiwen nom fan itom. Iwe kosap poutano om nuku, pokiten ewe Samon ese mwo poutano an nuku non en. Aponueta om pwon me feinno mwom.
Ewe fonufan mi mochen ewe kapas allimen Jises Kraist. Amo ewe Samon a efeiochu meinisin Noun Souneng— inamo ika ia sia angang—ian fiti ew netipen misineri.
© 2017 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/16. Kapungunon awewen: 6/16. Awewen First Presidency Message, June 2017. Chuukese. 97926 901