President a Odzi Kan na n’Apamfo Amandzɛɛbɔ, Obiradzi 2017
Wɔafrɛ hom wɔ Edwuma no ho
Ber a Nkɔnhyɛnyi Joseph Smith frɛɛ Elder Heber C. Kimball (1801–68) dɛ ɔnkɔ Ngyiresi Aborɔkyir dɛ asɛmpasomafo na “onkobue nkwagye abow no,” nkã tse bi kitsaa Elder Kimball dɛ onnkotum ayɛ.
Ɔkyerɛɛw dɛ, “O, Ewuradze, meyɛ banyin a mowɔ adodowpofo gyirama, na mennsɛ mmfata edwuma a ɔtse dɛm no koraa.”
Naaso Elder Kimball gyee ɔfrɛ no too mu, ɔdze sɔɔw do dɛ: “Iyinom ho adwendwen anntwe me emmfi m’asodzii kwan ho, ber noara a menyaa mo Ɔsor Egya Ne pɛ ho ntseasee no, metsee nkã enyimpi mu dɛ mobɔkɔ akɔsɔw no mu esian biara, a megye dzi dɛ Ɔdze No tum kokoroko no bɛgye me abamba, na Ɔdze asɛdze biara a mehia no behyira me.”1
Mo nuambanyin na nkyerɛbaa kumaa a wɔafrɛ hom dɛ etuhoakyɛ asɛmpasomafo, wɔafrɛ hom wɔ edwuma no ho osiandɛ, tse dɛ Elder Kimball no, hom, “wɔ pɛ dɛ hom som Nyame” (N&A 4:4–5) na osiandɛ hom ayɛ krado na hom fata.
Awarfo mpanyimfo, wɔafrɛ hom edwuma yi ho wɔ sianstir yinom ara ho ntsi. Hom no, nnyɛ ɔpɛ dɛ hom bɔsom nko, mbom ɔnam nyansa a hom enya efi mfe pii afɔrbɔ, ɔdɔ, na sũahu dɛ hom Egya a ɔwɔ Sor botum dze akã Ne mbabanyin na mbabaa a wɔrohwehwɛ nokwar no hɔn akoma. Ekyingye biara nnyi ho dɛ hom ehu dɛ yennkotum adɔ Ewuradze nokwar mu gyedɛ yɛsom binom dze som No.
Hom pɛ dɛ hom bɔsom dɛ asɛmpasomafo no yi, hom mfa gyedzi na pisi, akokodur na awerɛhyɛmu, adwenpɔwbɔ na enyimia, enyimpi na etuhoakyɛ nkã ho. Asɛmpasomafo a wotu hɔnho kyɛ no botum ayɛ anwanwadze wɔ asɛmpakã mbewdo.
President John Taylor (1808–87) twaa asɛmpasomafo su etsitsir no tsia wɔ kwan yi do: “Mbanyin (na mbaa nye awarfo) saso a yɛrohwehwɛ ma wɔasoa asɛmpa amandzɛɛbɔ yi nye mbanyin a wɔwɔ gyedzi wɔ Nyame mu; mbanyin a wɔwɔ gyedzi wɔ hɔn nyamesom mu; mbanyin a wodzi hɔn asɔfodzi no nyi; mbanyin a … Nyame wɔ awerɛhyɛmu wɔ hɔn mu. … Yɛrohwehwɛ mbanyin a Sunsum Krɔnkrɔn no na Nyame No tum ahyɛ hɔn mã[,] … mbanyin a wɔsɛ enyidzi, nokwardzi, ɔbrapa na ahotsew.”2
Ewuradze apaamu akã dɛ:
“Na hwɛ haban no ahoa dada na twaber no asõ; na hwɛ nyia ɔdze ahoɔdzen tow ne kantankrankye no, ɔnoara na ɔbɔboa ano ama noho aama ɔaannhera, mbom ɔdze nkwagye abrɛ ne kra;
“Na nyia n’enyiwa bɛyɛ kor wɔ Nyame n’enyimnyam nko do, na ɔwɔ gyedzi, enyidado, ayamuyie na ɔdɔ no, na ɔfata edwuma no ne yɛ” (N&A 4:4–5).
Wo frɛ edua nkenyan do aba. Megye dase dɛ nyia a Nyame afrɛ no no, Nyame ma ɔfata. Ibenya ɔsor mboa ber a idzi dwuma mpaabɔ mu ara wɔ Ewuradze No wenyin ture no mu no.
Anohoba dɛɛdɛw a Ewuradze dze maa berano yi asɛmpasomafo abɔasefo no, dɛ ma ɔwɔ Nkyerɛkyer na Ahyɛmudzi no mu no bɛyɛ hom dze: “Mibedzi hom enyim. Mibedzi hom nyimfa na hom bankum, na mo sunsum bɛhɛn hom akoma mu, na m’abɔfoe etwa hom ho ehyia, na wɔasoa hom” (N&A 84:88).
Ber a hom rosom no, hom besie onnyiewiei nkaadze na anyɛnkoyɛ. Minnyim mbewdo biara a oyi enyigye ndɔbaa mbordo kyɛn asɛmpakã mbewdo.
Afei, menkã nsɛmfua kor bi nkyerɛ elderfo, nkyerɛbaa, nye awarfo a, ɔnam siantsir bi ntsi, bi a woenntum ennwie hɔn ber a wɔdze hyɛɛ hɔn wɔ asɛmpakã mbewdo no: Ewuradze dɔ hom. N’enyi sɔ hom afɔrbɔ no. Onyim w’abawgura. Hu dɛ Ɔda ho ara wɔ edwuma ma wo dɛ ebɛyɛ. Mma mma Satan nnkã biribi nsesã. Mma nndwendwen, mma nnya abagura, mma mmpa abaw.
Dɛ mbrɛ mehyɛɛ no nsew wɔ wiadze mfɛndzanan ehyiadzi a wɔfrɛɛ me dɛ mindzi Asɔr no bano nna ɔnnkyɛree no, “Mma hom nnsuro. Hom mma hom enyi ngye. “Ndaamba no hyerɛn dɛ mbrɛ wo gyedzi tse3 Dɛm anohoba no da ho tsim hɔ ma hom. Dɛm ntsi mma nnyew wo gyedzi, osiandɛ Ewuradze nnyew Ne gyedzi wɔ wo mu. Sie w’ahyɛmudzi no na kɔ kan.
Wiadze mba hia Jesus Christ asɛmpa no. Ewuradze mfa asɛmpasomafo akoma —nhyira N’Ahotseweefo nyina—a bea a wɔrosom no mmfa ho.
© 2017 by Intellectual Reserve, Inc. Wɔakora do tumdzi nyina. USA na wotsintsimii. English approval: 6/16. Translation approval: 6/16. First Presidency Message, June 2017. ne nkyerɛasee Fante 97926 502