ຂ່າວສານຈາກຝ່າຍປະທານສູງສຸດ, ເດືອນມິຖຸນາ 2017
ຖືກເອີ້ນສູ່ວຽກງານ
ເມື່ອສາດສະດາໂຈເຊັບ ສະມິດ ໄດ້ເອີ້ນແອວເດີ ຮີເບີ ຊີ ຄິມໂບ (1801–68) ໃຫ້ “ເປີດປະຕູແຫ່ງຄວາມລອດ” ໃນຖານະເປັນຜູ້ສອນສາດສະໜາ ຢູ່ປະເທດອັງກິດ, ແອວເດີ ຄິມໂບ ໄດ້ຮູ້ສຶກວ່າຕົນບໍ່ພຽບພ້ອມ.
“ໂອ້, ພຣະອົງເຈົ້າເອີຍ,” ເພິ່ນຂຽນ, “ຂ້ານ້ອຍເປັນຄົນເວົ້າພ່ຳ, ແລະ ບໍ່ເໝາະສົມເລີຍກັບວຽກງານເຊັ່ນນີ້.”
ເຖິງຢ່າງໃດກໍຕາມ, ແອວເດີ ຄິມໂບ ໄດ້ຮັບເອົາການເອີ້ນນັ້ນ, ພ້ອມກັບກ່າວຕື່ມວ່າ: “ການພິຈາລະນາກ່ຽວກັບເລື່ອງນີ້ ບໍ່ໄດ້ຍັບຍັ້ງຂ້າພະເຈົ້າຈາກໜ້າທີ່; ທັນທີທີ່ຂ້າພະເຈົ້າເຂົ້າໃຈພຣະປະສົງຂອງພຣະບິດາເທິງສະຫວັນຂອງຂ້າພະເຈົ້າ, ຂ້າພະເຈົ້າໄດ້ຮູ້ສຶກມີຄວາມມຸ້ງໝັ້ນທີ່ຈະໄປ ເຖິງແມ່ນຈະຫຍຸ້ງຍາກພຽງໃດກໍຕາມ, ໂດຍທີ່ເຊື່ອວ່າ ພຣະອົງຈະຊ່ວຍເຫລືອຂ້າພະເຈົ້າ ດ້ວຍອຳນາດອັນຍິ່ງໃຫຍ່ຂອງພຣະອົງ, ແລະ ປະທານຄວາມເໝາະສົມທຸກຢ່າງທີ່ຂ້າພະເຈົ້າຕ້ອງການ ໃຫ້ແກ່ຂ້າພະເຈົ້າ.”1
ເພື່ອນໜຸ່ມຊາຍຍິງທີ່ຮັກແພງຂອງຂ້າພະເຈົ້າ ຜູ້ໄດ້ຖືກເອີ້ນໃຫ້ຮັບໃຊ້ເຜີຍແຜ່ເຕັມເວລາ, ພວກເຈົ້າໄດ້ຖືກເອີ້ນສູ່ວຽກງານເພາະວ່າພວກເຈົ້າ, ເຊັ່ນດຽວກັບແອວເດີ ຄິມໂບ, ມີຄວາມປາດຖະໜາທີ່ຈະຮັບໃຊ້ພຣະເຈົ້າ (ເບິ່ງ D&C 4:3) ແລະ ເພາະວ່າພວກເຈົ້າພ້ອມແລ້ວ ແລະ ມີຄ່າຄວນ.
ຄູ່ອາວຸໂສ, ພວກທ່ານໄດ້ຖືກເອີ້ນສູ່ວຽກງານ ໃນເຫດຜົນທີ່ເໝືອນກັນນັ້ນ. ເຖິງຢ່າງໃດກໍຕາມ, ພວກທ່ານບໍ່ພຽງແຕ່ມີຄວາມປາດຖະໜາທີ່ຈະຮັບໃຊ້ເທົ່ານັ້ນ, ແຕ່ພວກທ່ານມີທັງປັນຍາ ຊຶ່ງມາຈາກການເສຍສະລະ, ການມີຄວາມຮັກ, ແລະ ປະສົບການອັນຍາວນານທີ່ພຣະບິດາຜູ້ສະຖິດຢູ່ໃນສະຫວັນຂອງພວກທ່ານ ຈະສາມາດໃຊ້ເພື່ອສຳພັດຫົວໃຈຂອງບຸດ ແລະ ທິດາຂອງພຣະອົງ ຜູ້ສະແຫວງຫາຄວາມຈິງ. ທ່ານໄດ້ຮຽນຮູ້ຢ່າງແນ່ນອນວ່າ ພວກເຮົາບໍ່ສາມາດຮັກພຣະຜູ້ເປັນເຈົ້າແທ້ໆ ຈົນກວ່າພວກເຮົາໄດ້ຮັບໃຊ້ພຣະອົງ ໂດຍການຮັບໃຊ້ຄົນອື່ນ.
ນອກເໜືອໄປຈາກຄວາມປາດຖະໜາຂອງພວກທ່ານທີ່ຈະຮັບໃຊ້ ເປັນຜູ້ສອນສາດສະໜາແລ້ວ, ພວກທ່ານຍັງຈະມີສັດທາ ແລະ ຄວາມອົດທົນ, ຄວາມກ້າຫານ ແລະ ຄວາມໝັ້ນໃຈ, ຄວາມເດັດດ່ຽວ ແລະ ຄວາມຍືນຍົງ, ຄວາມຕັ້ງໃຈ ແລະ ຄວາມອຸທິດຕົນນຳອີກ. ຜູ້ສອນສາດສະໜາທີ່ອຸທິດຕົນ ສາມາດເຮັດໃຫ້ການມະຫັດສະຈັນ ເກີດຂຶ້ນໃນສະໜາມເຜີຍແຜ່ໄດ້.
ປະທານຈອນ ເທເລີ (1808–87) ໄດ້ສະຫລຸບຄຸນສົມບັດທີ່ສຳຄັນຂອງຜູ້ສອນສາດສະໜາ ໃນທາງນີ້ວ່າ: “ຊາຍ [ແລະ ຍິງ ແລະ ຄູ່ສາມີພັນລະຍາ] ທີ່ພວກເຮົາຢາກໃຫ້ເປັນຜູ້ປະກາດຂ່າວສານຂອງພຣະກິດຕິຄຸນນີ້ ຄືຜູ້ທີ່ມີສັດທາໃນພຣະເຈົ້າ, ຄືຜູ້ທີ່ມີສັດທາໃນສາດສະໜາຂອງຕົນ, ຄືຜູ້ທີ່ໃຫ້ກຽດແກ່ຖານະປະໂລຫິດຂອງເຂົາເຈົ້າ, ຄືຜູ້ທີ່ … ພຣະເຈົ້າມີຄວາມໝັ້ນໃຈ ໃນຕົວຂອງເຂົາເຈົ້າ. … ພວກເຮົາຢາກມີຄົນທີ່ເຕັມໄປດ້ວຍພຣະວິນຍານບໍລິສຸດ ແລະ ອຳນາດຂອງພຣະເຈົ້າ[,] … ຄົນທີ່ມີກຽດ, ຊື່ສັດ, ມີຄຸນນະທຳ ແລະ ຄວາມບໍລິສຸດ.”2
ພຣະຜູ້ເປັນເຈົ້າໄດ້ປະກາດວ່າ:
ທົ່ງນາກໍເຫລືອງພ້ອມແລ້ວທີ່ຈະເກັບກ່ຽວ, ແລະ ຄົນໃດທີ່ຍື່ນກ່ຽວຂອງເຂົາມາດ້ວຍເຫື່ອແຮງ, ຄົນໆນັ້ນຈະສະສົມມັນໄວ້ເພື່ອເຂົາຈະບໍ່ພິນາດ, ແຕ່ຈະນຳຄວາມລອດມາສູ່ຈິດວິນຍານຂອງຕົນ;
ແລະ ສັດທາ, ຄວາມຫວັງ, ຄວາມໃຈບຸນ, ແລະ ຄວາມຮັກ, ເພາະການທີ່ເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ, ຍ່ອມເຮັດໃຫ້ເຂົາເໝາະສົມກັບວຽກງານ (ເບິ່ງ D&C 4:4–5).
ການເອີ້ນຂອງທ່ານໄດ້ມາເຖິງ ຜ່ານທາງການດົນໃຈ. ຂ້າພະເຈົ້າເປັນພະຍານວ່າ ຜູ້ທີ່ພຣະເຈົ້າເອີ້ນ, ພຣະເຈົ້າຈະເຮັດໃຫ້ເໝາະສົມ. ທ່ານຈະໄດ້ຮັບຄວາມຊ່ວຍເຫລືອຈາກສະຫວັນ ໃນຂະນະທີ່ທ່ານອອກແຮງຢູ່ໃນສວນອະງຸ່ນຂອງພຣະຜູ້ເປັນເຈົ້າດ້ວຍການອະທິຖານ.
ຄຳສັນຍາທີ່ສວຍງາມຂອງພຣະຜູ້ເປັນເຈົ້າ ຕໍ່ຜູ້ສອນສາດສະໜາ ໃນຕອນຕົ້ນຂອງສະໄໝນີ້, ທີ່ມີບັນຈຸຢູ່ໃນພຣະຄຳພີ Doctrine and Covenants, ຈະເປັນຂອງທ່ານ ທີ່ວ່າ ພຣະອົງຈະອອກໜ້າເຮົາ. ພຣະອົງຈະຢູ່ທາງຂວາມືເຮົາ ແລະ ທາງຊ້າຍມືເຮົາ, ແລະ ວິນຍານຂອງພຣະອົງຈະຢູ່ໃນໃຈຂອງເຮົາ, ແລະ ທູດຂອງພຣະອົງຈະອ້ອມຮອບເຮົາໄວ້, ເພື່ອຄ້ຳຊູເຮົາ (ເບິ່ງ D&C 84:88).
ໃນຂະນະທີ່ທ່ານຮັບໃຊ້, ທ່ານຈະສ້າງຄວາມຊົງຈຳ ແລະ ມິດຕະພາບນິລັນດອນ ອັນງົດງາມ. ຂ້າພະເຈົ້າບໍ່ຮູ້ຈັກສະໜາມໃດ ທີ່ສາມາດຜະລິດຜົນແຫ່ງຄວາມສຸກຢ່າງງອກງາມໄດ້ ຫລາຍໄປກວ່າສະໜາມເຜີຍແຜ່.
ບັດນີ້, ຂໍ້ຄວາມສຳລັບແອວເດີ, ຊິດສະເຕີ, ແລະ ຄູ່ສາມີພັນລະຍາ ຜູ້ທີ່, ບໍ່ວ່າຈະເປັນດ້ວຍເຫດຜົນໃດກໍຕາມ, ບໍ່ສາມາດບັນລຸການເຜີຍແຜ່ຕາມເວລາທີ່ໄດ້ກຳນົດໄວ້ໃຫ້ ໃນສະໜາມເຜີຍແຜ່ ແມ່ນວ່າ: ພຣະຜູ້ເປັນເຈົ້າຮັກທ່ານ. ພຣະອົງປາບປື້ມກັບການເສຍສະລະຂອງທ່ານ. ພຣະອົງຮູ້ຈັກເຖິງຄວາມຜິດຫວັງຂອງທ່ານ. ຈົ່ງຮູ້ໄວ້ວ່າ ພຣະອົງຍັງມີວຽກງານໃຫ້ທ່ານເຮັດຢູ່. ຢ່າເຊື່ອຟັງຄຳຂອງຊາຕານ. ຢ່ານ້ອຍໃຈ, ຢ່າທໍ້ຖອຍໃຈ, ຢ່າໝົດຫວັງ.
ດັ່ງທີ່ຂ້າພະເຈົ້າໄດ້ກ່າວ ຢູ່ໃນກອງປະຊຸມໃຫຍ່ສາມັນ ບໍ່ດົນຫລັງຈາກທີ່ຂ້າພະເຈົ້າໄດ້ຖືກເອີ້ນໃຫ້ນຳພາສາດສະໜາຈັກວ່າ: “ຢ່າສູ່ຢ້ານ. ຈົ່ງລື້ນເລີງເຖີດ. ອະນາຄົດແມ່ນຮຸ່ງເຫລື້ອມ ເທົ່າທຽມກັບສັດທາຂອງທ່ານ.”3 ຄຳສັນຍານັ້ນ ຍັງເປັນຄວາມຈິງຢູ່ ສຳລັບທ່ານ. ສະນັ້ນ ຈົ່ງຢ່າສູນເສຍສັດທາຂອງທ່ານໄປ, ເພາະພຣະຜູ້ເປັນເຈົ້າ ບໍ່ເຄີຍສູນເສຍສັດທາໃນຕົວທ່ານເລີຍ. ຈົ່ງຮັກສາພັນທະສັນຍາຂອງທ່ານ ແລະ ດຳເນີນໄປໜ້າ.
ຊາວໂລກຕ້ອງການພຣະກິດຕິຄຸນຂອງພຣະເຢຊູຄຣິດ. ຂໍໃຫ້ພຣະຜູ້ເປັນເຈົ້າຈົ່ງປະທານພອນໃຫ້ແກ່ໄພ່ພົນທັງໝົດຂອງພຣະອົງດ້ວຍເທີ້ນ—ບໍ່ວ່າ ເຮົາຈະຮັບໃຊ້ຢູ່ບ່ອນໃດກໍຕາມ—ດ້ວຍໃຈຂອງຜູ້ສອນສາດສະໜາ.
©2017 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ First Presidency Message, June 2017. Laotian. 97926 331