Ennaan eo an Būreejtōnji eo Kein Kajuon, Juun 2017
Kar kūr n̄an Jerbal eo
Ke Rikanaan Josep Smith ekar kūr Elder Heber C. Kimball (1801–68) n̄an “kōpeļļo̧k iaļen lo̧mo̧o̧r” āinwōt kar juon mijinede n̄an England, Elder Kimball eaar en̄jake ke ejjab ekkar.
Eaar je, “O, Irooj,” “Ij juon em̧m̧aan eo ejjab jeļā kōnnaan, im men kein jim̧or rejjab ekkar n̄an jerbal in.”
Mekarta, Elder Kimball ekar bōk kūr in, eaar ba: “Kōļmenļo̧kjeņ in ekar jab kunōōrļo̧k eō jān iaļen jerbal in; jān tōre eo iaar jeļā ankilaan Jemedwōj Ilan̄, Iaar en̄jake ke ij aikuj in ilo̧k im dipļo̧ke jabdewōt kauwōtata, tōmak bwe Enaaj jipan̄ eō kōn kajoor eo An eļap, im kapelpel eō kōn jabdewōt men ekkar me ij aikuji.”1
Ro jeiū im jatū ro raar kūr n̄an jerbal in mijinede aolep raan, kom̧ kar kūr n̄an jerbal kōnke kom̧ij, āinwōt Elder Kimball, “ewōr ami ikdeelel n̄an jerbal n̄an Anij” (K&B 4:3) im kōnke kom̧ij pojak im erreo.
Rutto ro rej mijenede, kom̧ kar bar kūr kōn ejja jibadbad in wōt. Ijoke, kom̧ij, jab bōk wōt juon ikdeelel n̄an jerbal ak barāinwōt jeļāļo̧kjeņ kom̧ kar bōke jān jabdewōt wūjļepļo̧k, iakwe, im en̄jake bwe Jem̧ōmi Ilan̄ emaron̄ kōjerbale n̄an im̧we būruwōn ļaddik im leddik ro Nejin ro me rej pukot m̧ool eo. Ejjeļo̧k pere ke kom̧ jeļā bwe jeban lukkuun iakwe Irooj m̧ae iien jej jerbal n̄an E ilo ad jerbal n̄an ro jet.
N̄an ikdeelel eo ami n̄an jerbal āinwōt mijinede ro, kom̧ naaj bōk eļapļo̧k tōmak im jeraam̧m̧an, peran im lōke, kōjatdikdik im iakwe, kije im wūjļepļo̧k. Mijinede ro rej wūjļepļo̧k rej bōktok kabwilōn̄lōn̄ ko n̄an mijen eo.
Būreejtōn John Taylor (1808–87) eaar kwaļo̧k piktokin ko raorōk an mijinede ilo wāween in: “Kain em̧m̧aan [im kōrā im ripālele] jej kōnaan āinwōt armej in rikwaļo̧k ennaan eo an gospel in ro ewōr aer tōmak ilo Anij; armej ro ewōr tōmak ilo kabun̄ eo aer; armej eo ej kautiej priesthood eo an; armej eo me … Anij eaar lōke. … Jej kōņaan armej eo eobrak kōn Jetōb Kwojarjar im kajoor an Anij[,] … armej in kautiej, m̧ool, erreeo im kwojarjar.”2
Irooj eaar ba:
“Bwe lo meļaaj eo emouj epojak n̄an m̧adm̧ōd; im lo, eo ej bun̄raake sickle eo an kōn an maron̄, ejja in wōt ej likūt ilo im̧ōn kakkoņkoņ bwe en jab jorrāān, ak bōktok lo̧mo̧o̧r n̄an jetōb eo an;
“Im tōmak, kōjatdikdik, iakwe-em̧ool im iakwe, ippān erreļo̧k eo wōt n̄an aiboojoj eo an Anij, ej kwaļo̧k ekkar eo an n̄an jerbal in” (K&B 4:4–5).
Kūr eo am̧ eaar itok ilo im̧we. Ij kam̧ool bwe eo Anij ej kūr e, Anij ej kwaļo̧k ekkar eo an. Kom̧ naaj bōk jipan̄ an lan̄ ilo ami lukkuun jerbal ilo jikin kallib in an Irooj.
Kallim̧ur eo an Irooj kar leļo̧k n̄an mijinede ro m̧okta ilo epepen in, āinwōt an waļo̧k ilo Katak im Bujen ko, naaj ami: “Inaaj etal im̧aanļo̧k in mājāmi. ”Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧. (K&B 84:88).
Ilo ami jerbal, kom̧ naaj bōk eļap ememļo̧kjeņ im kalōk jem̧jerā ko. Ijjab jeļā jabdewōt jikin ej kwaļo̧k eļap m̧ōņōņō jān jikin mijen.
Kiiō, jidik ennaan n̄an elder ro, sister ro, im ripālele ro, kōn jabdewōt un, maron̄ in jab dedeļo̧k iien jerbal eo aer ilo jikin mijen: Irooj ej iakwe kom̧. Ej kam̧m̧oolol kom̧ kōn wūjļepļo̧k eo ami. Ejeļā kōn likjab eo ami. Jeļā bwe ej wōr wōt jerbal Ekōņaan bwe kom̧win kōm̧m̧ani. Jab kōtļo̧k bwe Setan en jiron̄ kom̧ ilo wāween eo juon. Jab eļļo̧k, jab ebweer; jab mijak.
Ke iaar etale kweilo̧k eo eļap ālkin aō kar kūr n̄an tōl Kabun̄ in: “Jab mijak. Komin m̧ōņōņō. Ilju im jekļaj ej romaak āinwōt tōmak eo am̧.”3 Kallim̧ur in ej m̧ool wōt n̄an eok. Kōn menin jab jerwaane tōmak eo ami, bwe Irooj ejjab jerwaane tōmak eo An ilo kom̧. Kōjparok kallim̧ur ko ami im wōnm̧aanļo̧k.
Laļ in eaikuji gospel eo an Jisōs Kraist. Kōm̧m̧an bwe Irooj en kōjeraam̧m̧an aolep An Rekwojarjar—jekdo̧o̧n ia eo jej jerbal ie—kōn juon būruwōn mijinede.
© 2017 jān Intellectual Reserve, Inc. Aolep jim̧we rej pād ippān. Kar jeje ilo USA. Kōmālim ilo Kajin English: 6/16. Kōmālim an ukook: 6/16. Ukook eo an First Presidency Message, June 2017. Marshallese. 97926 874