Messaġġ tal-Ewwel Presidenza, Ġunju 2017
Imsejħin għall-Ħidma
Meta l-Profeta Joseph Smith sejjaħ lill-Presbiteru Heber C. Kimball (1801–68) biex, bħala missjunarju, “jiftaħ il-bieb tas-salvazzjoni” għall-Ingilterra, il-Presbiteru Kimball ħass lilu nnifsu inadegwat li jagħmel dan.
“O, Mulej,” huwa kiteb, “Jiena bniedem li ntemtem u kompletament mhux kapaċi għal din il-ħidma.”
Madankollu il-Presbiteru Kimball xorta waħda aċċetta s-sejħa, billi kompla jgħid: “Dawn ir-raġunijiet ma żammewnix milli nwettaq id-dmir tiegħi; il-mument li fih fhemt ir-rieda ta’ Missierna tas-Smewwiet, jiena ħassejt determinazzjoni li mmur, ikunu xi jkunu l-problemi jew id-diffikultajiet, għax kont nemmen li Huwa kien se jissapportjani bil-qawwa kbira Tiegħu, u kien se jagħtini kull kwalifika li kont neħtieġ.”1
Ħuti żgħażagħ li intom imsejħin għas-servizz missjunarju full-time, intom ġejtu msejħin għall-ħidma għaliex intom, bħall-Presbiteru Kimball, “għandkom ix-xewqa li sservu lil Alla” (D&C 4:3) u għaliex intom tinsabu lesti u denji.
Intom il-koppji anzjani ġejtu msejħin għall-ħidma għall-istess raġunijiet. Intom, madankollu, mhux biss tieħdu magħkom ix-xewqa li sservu iżda wkoll l-għerf li ksibtu minn żmien twil ta’ sagrifiċċju, imħabba u esperjenza li Missierkom tas-Smewwiet jista’ juża biex imiss il-qlub ta’ wliedu li jinsabu jfittxu l-verità. M’hemmx dubju li intom tgħallimtu li aħna ma nistgħux verament inħobbu lill-Mulej jekk aħna ma nservuhx billi nservu lill-oħrajn.
Flimkien max-xewqa tagħkom li sservu bħala missjunarji, intom għandkom ukoll il-fidi u l-ħeġġa, il-kuraġġ u l-kunfidenza, ir-riżoluzzjoni u l-qawwa, id-determinazzjon u d-dedikazzjoni. Il-missjunarji ddedikati jistgħu jġibu fis-seħħ numru ta’ mirakli fl-għalqa tal-missjoni.
Il-President John Taylor (1808–87) iddeskriva fil-qosor il-kwalitajiet tal-missjunarji b’ dan il-mod: “It-tip ta’ rġiel u nisa u koppji li aħna neħtieġu biex iwasslu l-messaġġ tal-evanġelju huma nies li għandhom il-fidi f’ Alla; nies li għandhom il-fidi fir-reliġjon tagħhom; nies li jonoraw is-saċerdozju tagħhom; nies li … Alla jafda fihom. … Neħtieġu nies mimlijin bl-Ispirtu s-Santu u bil-qawwa ta’ Alla[,] … nies ta’ unur, integrità, virtù u safa.”2
Il-Mulej iddikjara:
“Għax araw l-għalqa bajda lesta għall-ħsad; u min ixejjer il-minġel tiegħu b’ qawwa, dan hu dak li jaħżen biex ma jinqeridx, iżda jwassal is-salvazzjoni għar-ruħu;
“U l-fidi, it-tama, il-karità u l-imħabba, b’ ħarstu fissa lejn il-glorja ta’ Alla, tikkwalifikah għall-ħidma” (D&C 4:4–5).
Is-sejħa tagħkom waslet permezz tal-ispirazzjoni. Jiena nixhed li lil dak li Alla jsejjaħ, Alla jikkwalifika. Intom tirċievu l-għajnuna divina hekk kif bl-għajnuna tat-talb intom taħdmu fl-għalqa tad-dwieli tal-Mulej.
Il-wegħda sabiħa li l-Mulej ta lill-missjunarji fil-bidu ta’ din id-dispensazzjoni, kif naqraw fid-Duttrina u Patti, tista’ tkun tagħkom ukoll: “Jiena nkun ninsab quddiemkom. Jiena se nkun fuq il-lemin u fuq ix-xellug tagħkom, u l-Ispirtu tiegħi se jkun f’ qalbkom, u l-anġli tiegħi jduru magħkom, biex jgħinukom.” (D&C 84:88).
Hekk kif intom isservu, intom tibnu memorji u ħbiberiji eterni mill-aktar prezzjużi. Ma naf bl-ebda għalqa oħra li tipproduċi ħsad ta’ ferħ daqstant ġeneruż aktar mill-għalqa tal-missjoni.
Issa, se ngħid xi ħaġa lil dawk il-presbiteri, is-sisters u l-koppji li, għal xi raġuni jew oħra, ma jirnexxilhomx itemmu ż-żmien assenjat lilhom fl-għalqa tal-missjoni: Il-Mulej iħobbkom. Huwa japprezza s-sagrifiċċju tagħkom. Huwa konxju tad-diżappunt tagħkom. Kunu afu li Huwa għad għandu ħidma għalikom xi twettqu. Tħallux lil Satana jgħidilkom li mhux hekk. Tagħmlux dwejjaq; taqtgħux qalbkom; tiddisprawx.
Kif jien semmejt waqt il-konferenza ġenerali ftit wara li ġejt imsejjaħ biex immexxi l-Knisja: “Tibżgħux. Agħmlu l-qalb. Il-futur se jiddi skont kemm se tiddi l-fidi tagħkom.”3 Dik il-wegħda għadha tgħodd sal-lum. Għalhekk titilfux il-fidi tagħkom, għaliex il-Mulej ma tilifx il-fidi fikom. Żommu l-patti tagħkom u ibqgħu mexjin ’il quddiem.
Id-dinja teħtieġ l-evanġelju ta’ Ġesù Kristu. Jalla l-Mulej ibierek il-Qaddisin kollha Tiegħu—irrilevanti fejn inservu—b’ qalb missjunarja.
© 2017 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/16. Approvazzjoni tat-traduzzjoni: 6/16. Traduzzjoni ta’ First Presidency Message, June 2017. Maltese. 97926 159