Klumech er a First Presidency, Ongelolem el buil 2017
Mlokedong el mo er tia el Ureor
A Profet Joseph Smith er a lokedongii a Elder Heber C. Kimball(1801–68) el mo “omok er a chesmerel osebelir a rechad” el mlo misionari el mo er a England, e a Elder Kimball a ulemelchesiu el metitur e olngesonges.
Ng milluches el kmo, “Ea Rubak,” “Ngak a kokong, me ng diak el sebechek el mo er tia el ureor.”
E ng di a Elder Kimball a di kilengei er tia el okedong, e millemolem el melekoi el kmo: “Aika el kulmelchesiu me a mla er a uldesuek a dimlak el simengak er a ngerchelek; le se er a bo el bleketakl er a uldesuek sel ngii a soal a Demak er a Babeluades, e ak tilbir el mo er sel tkul er bab el sebechek, loumerang el kmo Ngii a mo ngosukak lokiu a mesisiich el Klisichel, e mo omekngeltengat er ngak er a ike el rokui el kusbech.”1
Kemiu a rengeasek el rodam me a rodos er ngak el mla mokedong el mo mesiou el misionari, kemiu a mla mokedong el mo er tia el ureor, e uaia Elder Kimball, “el semeriar el mesiou er a Dios” (D&C 4:3) le kemiu el kldmokl e klikiid.
Kemiu el remechuodel el obekel, a mla mokedong er a osisiu el moktek. Kemiu, a diak, di moba sel klemeriar reng el mesiou kom dirrek el mo mui er a llomes er a ikel taem el meringel el oureor, loba beltik el reng, me a teletael el Demmiu er a Babeluades a sebechel ousbech el remutech a rengrir a Rengelekel sechal me a redil el tir osiik er a klemerang. Ng klemera el tekoi el bla msubii el kmo ng meral diak el sebeched el mo betik a rengud er a Rubak a lak dosiou er Ngii lokiu omesiunged el mo er a rebebil.
Sel klemeriar reng er kemiu el mo mesiou el misionari, e kom dochelii a klaumerang me a olisiich, duch el reng me a blekebek, blak el reng me a mesisiich el reng, klisiich me a telkangel. A re blak a rengrir el misionari a sebechir el mo uchul ongasireng el teletael er a mision er tir.
A President John Taylor(1808–87) a silaod aikel meklou a belkul blekeradel er a remisionari el kmo: “Tirkel sechal [me a redil me a remechuodel lobekel] el tir a soad a bo lomerk er a klemechel ebangkelio a tirkel klaumerang er tir a ultuil er a Dios; tirkel loba klaumerang er a klechelid er tir; me a rsechal mengull er a priesthood; lobang; me a tirkel chad el Dios a oumerang … e ansing el kirir. … Ng soad a rsechal mui er a Chedaol Reng me a klisichel a Dios[,] …chetengakl el sechal, el mui er a klemerang, kldung me a klikiid.”2
A Rubak a mla melekoi el kmo:
“Ng mla mo taem er a omeridm; me ngike el kldmokl loba blak el reng, a diak el bo el ngemed, e bai mo suobel e ruriul;
“Me ngike loba klaumerang, urungulel, bliochel el beltik el reng, me a klebkall el mo er a Dios, a sebechel el mo er tia el ureor” (D&C 4:4–5).
A okedongem a mle lultuil er a ulekrael el uldasou. A kuuchais el kmo ngike el ngii a lokedongii a Dios, a ngii el Dios a mo obengkel. Ko mo ngmai a ngeso er a babeluades sel multuil er a nglunguuch e moruul a urerel a Rubak.
Sel klebokel el yaksok el Rubak a milsterir tirkel mle misionari er ngii ruchelel chelechal taem, el ngara chelsel a Doctrine and Covenants, a mo er kemiu: “Ak mo okiu medemiu. Ngii a mo ngara kadikm me a katur kid, e a Reng er Ngii a mo er a chelsel a rengud, e a re anghel er Ngii a iliuekel er kid, el mo sobecheklid” (DC 84:88).
Me sel mosiou, e kom toketekii a diak a ulebengelel ungil uldasou me a klausechelei. Ng diak kudengelii a ngii di el ureor el meskemiu a betok el klungiaol me a deureng el uaia urerel a klemisionari.
Chelecha, e ak mengedecheduch el mo er tirkel elders, me a rodos, me a remechuodel el obekel, el tir a mo diak, el sebechir rokir a temir er a mision, el ngii di el ngera uchul: A Rubak a betik a rengul er kemiu. Ngii a dmeu a rengul er a ikel bla mruul. Ngii a medengleii a kngitl a rengmiu. Bo modengei el kmo ng dirk ngarngii a Urerel el kiriu. Lak becherei a Diablong me lengodech a uldesuiu. Lak bo el moualech a rengmiu; lak bo el merat a rengmiu; e lak bo el mekngit a rengmiu.
El uaia ikel kdilung er a klou el ongdibel ruriul er a kmokedong el mo mengeteklel a Ikelesia: “Lak ko medakt. Bo lungil a rengmiu. A klukuk a dmiich el uaia klaumera er kemiu.”3 Tial yaksok a kmal kelmerang le ko er kemiu. Maleuaisei e lak moridii a klaumera er kemiu, le Rubak a dirkak el riid a klaumera er ngii er kemiu. Moltirakl a telbilem e momakes el bedul uchei.
A beluulechad ousbech er a ebangkelio er a Jesus Kristo. A Rubak bo lomekngeltengat er a rokui el Santo—er Ngii el diak el iior er a basio el dosiou—er ngii alsekum e kede mesiou loba reng er a klemisionari.
© 2017 lokiu a Intellectual Reserve, Inc. Urrekodel a rokui el klisiich. Milluches er a USA. English approval: 6/16. Kengei ra oidel: 6/16. Oidel a First Presidency Message, June 2017. Palauan. 97926 881