Lamharon
Sang ang Akon Abyan Napatay
Ang tagsulat nagaistar sa Utah, Estados Unidos sang Amerika.
Sang sa ikatatlo nga tuig ako sa akon pag-eskwela sa high school, ang akon abyan nakaangkon sang aneurysm (paglupok sang ugat) sa utok kag napatay pagkadason nga adlaw. Bisan pa nga miyembro ako sang Simbahan, ginbudlayan ako sa gihapon. Natudloan ako sa bilog ko nga kabuhi nga makadangop ako sa Amay nga Langitnon kag sa Manluluwas para sa bisan ano, pero wala pa gid ako nakaagi sang pareho sini halin sang una.
Naghibi ako sing inoras, nga nagahimud-os nga masalapoan ang—bisan ano lang—nga makahatag sa akon sang katawhayan. Sang gab-i pagkatapos sang iya pagtaliwan, nagdangop ako sa hymnbook. Sa akon pagtuki sang mga pamihak, nabukaran ko ang “Abide with Me; ’Tis Eventide,” (Hymns, no. 165). Ang ika-tatlo nga berso nagkuha gid sang akon igtalupangod:
Updi ako; sa pagsirum,
Ang gab-i masubo
Kon indi ka makaupod,
o masanagan mo.
Nahadlok ‘ko ang kadulom,
Sa akon magpuyo.
O Ginuo, updi ko
Sini nga pagsirum.
Ini nga berso nagpuno sa akon sang tuman nga katawhay. Nahibaloan ko sadto mismo nga indi lamang ako pag-updan sang Manluluwas sadto nga gab-i kundi nga nakahibalo man Sia sang akon ginabatyag. Nakahibalo ako nga ang pagpalangga nga akon nabatyagan paagi sa himno wala lang nagbulig sa akon nga malampuwasan ato nga gab-i kundi nga nagbulig man sa akon nga malampuwasan ang iban pa nga mga pagtilaw nga akon naagyan.