Mensahe sang Unang Panguluhan, Hulyo 2017
Ang Premyo sang Pagbatas sing Maayo
Sang bataon pa ako, nag-alagad ako sa Simbahan bilang manuglaygay sa isa ka maalam nga district president. Wala untat ang iya pagtinguha nga tudloan ako. Madumduman ko ang laygay nga ginhatag niya sa akon sadto: “Kon may makilala ka nga tawo, kabiga nga may seryoso sia nga problema, kag laban gid sa tunga nga mangin husto ka.” Naghunahuna ako sadto nga kanegatibo lang gid sang iya panulok sa kabuhi. Karon, masobra 50 katuig ang nagligad, makita ko kon ano kahusto sang iya paghangop sa kalibutan kag sa kabuhi.
Tanan kita may mga pagtilaw nga atubangon—kon kaisa, sobra kabudlay nga mga pagtilaw. Nakahibalo kita nga ang Ginuo nagatugot nga maagyan naton ang mga pagtilaw agud nga mas mapaayo kag mahimpit kita sa katuyuan nga makaupod Niya kita sa wala’y katubtuban.
Ang Ginuo nagtudlo sa Propetang si Joseph Smith sa Liberty Jail nga ang premyo sa pagbatas sing maayo sang iya mga pagtilaw magabulig sa iya nga mangin takos sa kabuhi nga wala’y katapusan:
“Anak ko, ang paghidaet mangin yara sa imong kalag; ang imong kabudlayan kag imong mga kasakit mangin sa malip-ot lamang nga tion;
“Kag dayon, kon batason mo ini sing maayo, ang Dios magapakahimaya sa imo; magamadinalag-on ka sa tanan mo nga mga kaaway” (D&C 121:7–8).
Madamo kaayo nga mga butang ang nagahampak sa aton sa kabug-osan sang kabuhi nga dawsa mabudlay ang magbatas sing maayo. Mahimo nga daw amo sina sa isa ka pamilya nga nagasalig sa patubas kon wala sang ulan. Ayhan nagapamangkot sila, “Asta san-o kami makapadayon?” Mahimo nga daw amo sina sa isa ka lamharon nga ginahangkat sa iya pagpakigbato sa nagataas nga baha sang kahigko kag tentasyon. Mahimo nga amo sina sa isa ka bataon nga lalaki nga nagahimulat sa pag-angkon sang edukasyon ukon paghanas nga iya kinahanglanon para sa isa ka obra nga makasuporta sang isa ka asawa kag pamilya. Mahimo nga amo sina sa isa ka tawo nga indi makakita sang obra ukon kapila na madulaan sang obra pagkatapos nga nagsira ang mga ulobrahan. Mahimo nga amo sina sa sinang nagapangatubang sang amat-amat nga pagkadula sang ikaayong lawas kag kapagsik, nga mahimo mag-abot sing temprano pa ukon ulihi na sa ila kabuhi ukon sa ila mga pinalangga.
Pero ang isa ka mapinalanggaon nga Dios wala nagpahamtang sang amo nga mga pagtilaw sa aton agud lang makita kon mabatas naton ang mga kabudlayan kundi agud makita kon mabatas naton ang mga ini sing maayo kag gani mangin mas mapaayo.
Ang Unang Pangulohan nagpanudlo kay Elder Parley P. Pratt (1807–57) sang bag-o pa lang sia natawag nga miyembro sang Korum sang Napulo‘g Duha ka mga Apostoles: “Nagpasakop ka sa kawsa nga nagakinahanglan sang imo bug-os nga igtalupangod; … mangin isa ka baslay nga mahining. … Kinahanglan mo magbatas sang madamo nga kabudlayan, madamo nga paghimud-os, kag madamo nga mga kawad-on agud mas mapaayo sing himpit. Ang imo Langitnon nga Amay nagapangayo sini; ang talamnan Iya; ang buluhaton Iya; kag Iya ka nga … lipayon … kag paisugon.”1
Sa libro sang Mga Hebreo, si Pablo nagahambal parte sa bunga sang pagbatas sing maayo: “Ang tanan nga pagdisiplina sa malip-ot nga tion daw masakit sa baylo nga makalipay; sa ulihi nagapatubas ini sing madaiton nga bunga sang pagkamatarung sa mga nahanas sa sini” (Mga Hebreo 12:11).
Ang aton mga pagtilaw kag aton mga kabudlayan nagahatag sa aton sang oportunidad nga magtuon kag magtubo, kag mahimo nila gani mabag-o ang aton mismo kinaugali. Kon magdangop kita sa Manluluwas sa aton kalisdanan, ang aton mga kalag matinloan samtang kita nagabatas.
Gani, ang una nga butang nga dumdumon amo ang magpangamuyo pirme (tan-awa sa D&C 10:5; Alma 34:19–29).
Ang ikaduha nga butang amo ang magpadayon sa pagtinguha nga tumanon ang mga kasuguan—ano pa man ang pagpamatok, ang mga tentasyon, ukon ang kagamo sa palibot naton (tan-awa sa Mosias 4:30).
Ang ikatatlo nga importante nga butang nga himuon amo ang mag-alagad sa Ginuo (tan-awa sa D&C 4:2; 20:31).
Sa pag-alagad sa Manunudlo, makilala naton kag mahigugma Sia. Kon magpadayon kita sa pagpangamuyo kag sa tampad nga pag-alagad, amat-amat naton nga makita ang kamot sang Manluluwas kag ang impluwensya sang Balaan nga Espiritu sa aton kabuhi. Madamo sa aton ang nakahatag sang amo nga pag-alagad sa isa ka tion kag nakabatyag sinang pagpakig-upod. Kon panumdumon ninyo inang tion, madumduman ninyo nga may mga pagbag-o sa inyo. Ang tentasyon nga maghimo sang kalainan dawsa nagbuhin. Ang kaluyag nga maghimo sang maayo nagdugang. Inang mga nakakilala kag nagapalangga gid sa imo ayhan nakasiling: “Nangin mas maayo kag mas pasensyoso ka karon. Daw indi na ikaw ang tawo nga nakilala ko sang una.”
Indi ka na pareho sang una. Nabag-o ka paagi sa Pagpasag-uli ni Jesucristo tungod nagsalig ka sa Iya sa tion sang imo pagtilaw.
Ginapromisa ko sa inyo nga ang Ginuo magabulig sa inyo sa inyo mga pagtilaw kon pangitaon kag alagaran ninyo Sia kag ang inyo mga kalag mas mapaayo sa paghimo ninyo sini. Ginahangkat ko kamo sa pagsalig sa Iya sa tanan sang inyo mga pagtilaw.
Nakahibalo ako nga ang Dios nga Amay buhi kag ginapamatian kag ginasabat Niya ang tagsa naton ka pangamuyo. Nakahibao ako nga ang Iya Anak nga si Jesucristo, nagbayad sang bili sang tanan naton nga mga sala kag luyag Niya nga magkari kita sa Iya. Nakahibalo ako nga ang Amay kag ang Anak nagabantay sa aton kag naghanda sang alagyan agud kita makabatas sing maayo kag makapauli sa liwat.
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang First Presidency Message, July 2017. Hiligaynon. 97927 861