Mensahe sa Visiting Teaching, Hulyo 2017
Agud nga Mag-isa Sila
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano bala ang paghangop sang katuyuan sang Relief Society nagahanda sa mga anak nga babayi sang Dios para sa mga bugay sang kabuhi nga wala’y katapusan?
Pagtuo, Pamilya, Bulig
“Natigayon ni Jesus and himpit nga pag-isa sa Amay paagi sa pagpaidalom sang Iya Kaugalingon, alangay sa lawas kag espiritu, sa pagbuot sang Amay,” panudlo ni Elder D. Todd Christofferson sang Korum sang Napulo’g Duha ka mga Apostoles.
“… Sa pagkamatuod indi kita mangin isa sa Dios kag kay Cristo tubtob nga mahimo naton ang Ila pagbuot kag kaayuhan nga aton pinakadaku nga handum. Inang pagpakaubos indi matigayon sa isa lang ka adlaw, kundi nga paagi sa Balaan nga Espiritu, ang Ginuo magautitid sa pagtudlo sa aton kon handa kita hasta nga, sa pagligad sang panahon, mahimo masiling sing pat-od nga yara Sia sa aton pareho nga ang Amay yara sa Iya.”1
Si Linda K. Burton, Pangkabilugan nga Pangulo sang Relief Society, nagpanudlo kon paano hikuton ining pag-isa: “Ang paghimo kag pagtuman sang aton mga kasugtanan isa ka pagpahayag sang aton saad nga mangin pareho sa Manluluwas. Ang nagakadapat amo ang maghimulat nga maangkon ang panan-awon nga ginapabutyag sang mga pulong sang paborito nga himno: ‘Makadto ako kon diin luyag mo nga magkadto ako. … Ihambal ko kon ano ang luyag mo nga ihambal ko. … Mangin amo ako kon ano ang luyag mo nga mangin amo ako.’”2
Si Elder Christofferson nagpahanumdum man sa aton nga “sa aton pagtinguha sa kada adlaw kag kada semana nga sundon ang banas ni Cristo, ang aton espiritu nagapahayag sang iya pagkahalangdon, ang away sa aton kaugalingon nagatahaw, kag ang mga tentasyon nagauntat sa pagtublag.”3
Si Neill F. Marriot, Ikaduhang Manuglaygay sa Pangkabilugan nga Pangulohan sang Young Women, naghatag sang iya panaksihon parte sa mga bugay sang paghimakas nga ipabagay ang aton pagbuot sa pagbuot sang Dios: “Naghimulat ako nga dulaon ang tawhanon nga handum nga ang mga butang mangin suno sa akon pamaagi, sang ulihi akon nahangpan nga ang akon pamaagi tuman gid kakulang, limitado, kag kubos sangsa paagi ni Jesucristo. ‘Ang pamaagi sang [aton Amay nga Langitnon] amo ang banas nga nagapadulong sa kalipayan sa sining kabuhi kag kabuhi nga wala’y katapusan sa kalibutan nga magaabot.’”4 Magtinguha kita sing mapainubuson nga mag-isa sa aton Langitnon nga Amay kag sa Iya Anak nga si Jesucristo.
Dugang nga Balaan nga mga Kasulatan kag Impormasyon
Juan 17:20-21; Mga Taga-Efeso 4:13; Doctrine and Covenants 38:27; reliefsociety.lds.org
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang Visiting Teaching Message, July 2017. Hiligaynon. 97927 861