Agtutubo
Idi Pimmusay ti Gayyemko
Agnaed ti nagsurat iti Utah, USA.
Kabayatan ti maikatlo a tawenko iti haiskul, adda brain aneurism ti gayyemko ken pimmusay iti kabigatanna. Nupay miembroak ti Simbaan, narigattannak pay laeng. Nasuruanak iti unos ti biagko a makaasidegak iti Nailangitan nga ama ken iti Mangisalakan para iti ania man a banag, ngem diak kaano man napadasan ti kastoy a banag idi.
Nagsangitak iti napaut, a mangikarkarigatan a makasapul iti maysa a banag—ania man a banag—a mangted kaniak iti talna. Iti sardam kalpasan ti ipupusayna, linukibko ti hymnbook. Bayat ti pananglukibko kadagiti panid, naawis ti pasnekko iti “Abide with Me; ’Tis Eventide” (Hymns, no. 165). Naawis ti imatangko iti maikatlo a berso:
Agkaduata, ‘ta a sardam,
Rabii a naliday
No dika makasao man,
Ken dinak lawagan.
Sipnget ti lubong, pagamkak,
Agtalinaed pagtaengak.
O Apo, kadkaduaennak;
Adtoy, ‘ta a sardam.
Daytoy a berso ti nangpatalinaay unay kaniak. Ammok ngarud idin a saan laeng a makapagtalinaed ti Mangisalakan kaniak iti dayta a sardam no di ketdi ammona pay a husto no ania ti marikriknak. Ammok a ti ayat a nariknak babaen ti himno ket saan laeng a nangliwliwa kaniak no di ketdi nangpatibker pay kaniak nga agibtur iti adu a dadduma pay a pannubok nga inibturak.