Mensahe ti Umuna a Panguluen, Hulio 2017
Ti Gunggona ti Panagibtur a Nasayaat
Idi agtutuboak, nagserbiak iti Simbaan kas mammagbaga iti masirib a district president. Kanayon nga ikarkarigatanna ti mangisuro kaniak. Malagipko ti maysa a balakad nga intedna kaniak idi: “No adda maam-ammom a tao, tratuem ida a kasla nadagsen dagiti parikutda, ket hustokanto iti inaramidmo.” Impagarupko ngarud idi a negatibo dayta a saona. Itan, nasurok a 50 a tawenen kalpasanna, makitak no kasano ti panagawatna iti lubong ken ti biag.
Addaantayo amin iti pannubok a sarangten—no dadduma, dagiti nakarigrigat a pannubok. Ammotayo nga ipalubos ti Apo a maipasangotayo kadagiti pannubok tapno mapasayaat ken mamulitayo tapno makadennatayonto Isuna iti agananayon.
Insuro ti Apo ni Propeta Joseph Smith iti Liberty Jail a ti gunggona para iti panagibtur a nasayaat kadagiti pannubokna ket dayta ti mangitundanto kenkuana iti biag nga agnanayon.
“Anakko, pagtalnaem ti kararuam; saan nga agbayag ti rigatmo ken dagiti sagabaem;
“Ket kalpasanna, no agituredka, itan-oknakanto ti Dios iti ngato; agballigikanto kadagiti amin a kabusormo” (DkK 121:7–8).
Nakaad-adu dagiti bambanag a mangparigat kadatayo iti daytoy a biag a kasla narigat nga ibturan a nasayaat. Mabalin a kasta iti maysa a pamilia nga agdepdependar kadagiti mulmula ngemawan met tudo. Mabalin a panunotenda, “Kasano ti kapaut ti panagituredmi (nga awan ti tudo)?” Mabalin a kasta iti maysa nga agtutubo a naipasango no kasano a pagkedkedanna ti agsaknap a kinarugit ken pannulisog. Mabalin a kasta iti maysa nga agtutubo a lalaki a mangikarkarigatan a makagun-od iti adal wenno panagsanay a kasapulanna para iti trabaho tapno masuportaranna ti asawa ken pamilia. Mabalin a kasta iti maysa a tao a saan a makabirok iti pagtrabahuan wenno naikkat a naggigiddan dagiti trabahona gapu iti panagserra dagiti negosio. Mabalin a kasta kadagiti naipasango iti panagkapuy ti salun-at ken pigsa iti bagi, a mabalin a dumteng a nasapa wenno naladaw iti biagda wenno iti biag dagiti patpatgenna.
Ngem ti managayat a Dios ket saan a mangted iti kakasta a pannubok kadatayo tapno kitaenna laeng a kabaelantayo nga ibturan ti rigat ngem ketdi tapno kitaenna no maibturantayo dagitoy a nasayaat ken tapno agbalintayo a nasayaat.
Insuro ti Umuna a Panguluen ken ni Elder Parley P. Pratt (1807–57) idi kaaw-awag isuna a miembro ti Korum dagiti Sangapulo-ket-dua nga Apostol: “Nailistakayo iti maysa a panggep nga agkasapulan iti naan-anay nga atensionyo; … tapno agbalinkayo a napapino a teddek. … Nasken nga ibturanyo dagiti adu a panagbannog, adu a panagtrabaho, ken adu a kinarigat ken pannubok tapno agbalinkayo a naan-anay a napapino. … Kasapulan kadakayo ti Nailangitan nga Amayo daytoy; kukuana ti kataltalunan; ken Isunto ti … mangparagsak kadakayo … ken mangparegta kadakayo.”1
Iti libro ti Hebreo, isarita ni Pablo maipapan ti bunga ti panagibtur a nasayaat: “Awan ti dusa nga ita maipagarup a pagragsakan no di ket pagladingitan: ngem kalpasanna pataudenna ti natalna a bunga a maipaay kadagiti nairuam iti daytoy ” (Hebreo 12:11).
Dagiti pannubok ken rigrigattayo ti mangted iti gundaway kadatayo nga agsursuro ken dumur-as, ken dagitoy pay ti mangbalbaliw iti mismo nga ugalitayo. No makaasidegtayo iti Mangisalakan no adda dagiti karirigatan a pannuboktayo, mapapino dagiti kararuatayo no agibturtayo.
Ngarud, ti umuna a banag a laglagipen ket agkararag a kanayon (kitaen iti DkK 10:5; Alma 34:19–29).
Ti maikadua a banag ket agtultuloy a mangikagumaan nga agtungpal kadagiti bilin—ania man ti pagsusupadian, ania man ti pannulisog, wenno riribuk iti aglawlawtayo (kitaen iti Mosiah 4:30).
Ti maikatlo a nasken a banag nga aramiden ket agserbi iti Apo (kitaen iti DkK 4:2; 20:31).
Iti panagserbi iti Maestro, maam-ammo ken maayattayo Isuna. No agtultuloytayo iti panagkararag ken napudno a panagserbi, mangrugi a mailasintayo ti ima ti Mangisalakan ken ti impluensia ti Espiritu Santo iti panagbiagtayo. Iti sumagmamano a panawen adu kadatayo ti naikkan iti kasta a serbisio ken nakarikna iti dayta a panangkadkadua ti Espiritu Santo. No malagipyo dayta a panawen, malagipyonto nga adda dagiti panagbalbaliw kadakayo. Kasla bimmassit ti pannulisog nga agaramid iti dakes. Nanayunan ti tarigagay nga agaramid iti ad-adu pay a kinaimbag. Mabalin a kinuna dagiti makaam-ammo unay kadakayo ken mangay-ayat kadakayo: “Nagbalinka a nasingsingpet ken naan-anus. Kasla saan a dakayon daydi sigud a tao idi.”
Saan a dakayon daydi sigud a tao. Nagbalbaliwkayon babaen ti Panagbayad-basol ni Jesucristo gapu ta nagpannuraykayo Kenkuana iti panawen ti pannubokyo.
Ikarik kadakayo nga umayto ti Apo mangsaranay kadakayo kadagiti pannubokyo no agkalikagum ken agserbikayo Kenkuana ken mapapinonto ti kararuayo iti dayta a wagas. Karitenkayo nga agtalekkayo koma Kenkuana iti amin a rigrigat wenno sagabaenyo.
Ammok a sibibiag ti Dios nga Ama ken dengdenggen ken sungsungbatanna ti tunggal kararagtayo. Ammok a ti Anakna, ni Jesucristo, ket nagsagaba iti amin a basbasoltayo ken kayatna nga agsublitayo Kenkuana. Ammok a bambantayannatayo ti Ama ken ti Anak ken insaganadan ti maysa a wagas tapno makaibturtayo a nasayaat ken makaawidtayo manen iti nailangitan a pagtaengan.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti First Presidency Message, July 2017. Ilokano. 97927 864