Mensahe iti Visiting Teaching, Hulio 2017
Tapno Makipagaysada
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawattayo iti panggep ti Relief Society ket mangisagananto kadagiti annak a babbai ti Dios para kadagiti bendision ti agnanayon a biag?
Pammati, Pamilia, Tulong
“Nagun-od ni Jesus ti naan-anay a kaykaysa iti Ama babaen ti panangiruknoyna ti Bagina, agpada a lasag ken espiritu, iti pagayatan ti Ama,” insuro ni Elder D. Todd Christofferson ti Korum dagiti Sangapulo-ket--dua nga Apostol.
“… Awan duadua a saantayo a makipagmaymaysa iti Dios ken ni Cristo agingga a ditayo aramiden a kangrunaan a tarigagaytayo ti pagayatan ken interesda. Ti kasta a panangiruknoy ket saan a matungpal iti maysa nga aldaw, ngem babaen ti Nasantuan nga Espiritu, suruannatayonto ti Apo no agtallugodtayo agingga nga iti panaglabas ti panawen, makunanto a husto nga adda kadatayo Isuna a kas ti kaadda ti Ama Kenkuana.”1
Ni Linda K. Burton, Relief Society General President, insurona no kasano nga itrabaho daytoy a panagkaykaysa: “Ti panagaramid ken panagtungpal kadagiti katulagantayo ken panangyebkas iti panagkumittayo nga agbalin a kas iti Mangisalakan. Ti kasayaatan ket panagkagumaan para iti ugali a kapintasan a maipeksa iti sumagmamano a binatog ti maysa a paborito a kanta: ‘Innakto kayatmo a papanak. … Sawekto kayatmo a sawek. … Agbalinakto kayatmo a pagbalinak.’”2
Impalagip pay kadatayo ni Elder Christofferson “no itrabahotayo iti inaldaw ken linawas a mangsurot iti dalan ni Cristo, ipatalged ti espiritu ti kinaindaklanna, tumalinaay ti dangadang iti kaunggan, ken agsardeng a mangriribuk dagiti pannulisog.”3
Ni Neill F. Marriott, Maikadua a Mamagbaga iti Young Women General Presidency, paneknekanna dagiti bendision ti panangkagumaan a mangitunos iti pagayatantayo iti pagayatan ti Dios: “Inkarigatak a mangikkat iti mortal a tarigagay a maaddaan kadagiti banag iti bukodko a wagas, idi agangay in-inut a naamirisko a ti wagasko ket agkurang, limitado, ken iti ruar ti wagas ni Jesucristo. ‘[Ti dalan ti Nailangitan nga Amatayo] isu ti dana nga agturong iti kinaragsak iti daytoy a biag ken agnanayon a biag iti umay a lubong.’”4 Sipapakumbabatayo koma a mangikarigatan ti makimaymaysa iti Nailangitan nga Amatayo ken iti Anakna, ni Jesucristo.
Dagiti Mainayon a Nasantuan a Kasuratan ken Impormasion
Juan 17:20–21; Taga Efeso 4:13; Doktrina ken Katulagan 38:27; reliefsociety.lds.org
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Visiting Teaching Message, July 2017. Ilokano. 97927 864