iTukutuku ni Mataveiliutaki Taumada, Julai 2017
Na iSau ni Vosota Vakavinaka
Gauna au se cauravou kina, au a veiqaravi voli ena lotu vakadaunivakasala vua e dua na peresitedi ni tikina vuku. E dau saga voli ena veigauna me dau vakavulici au. A soli vakasala vei au o koya ena dua na gauna: “Gauna o sotava kina e dua, qaravi ira me vaka era sotava tiko na dredre bibi, o na donu tu ga ena vuqa na gauna.” Au nanuma na gauna ya de daubukana tikoga na leqa na nona rai. Oqo, ni oti e 50 na yabaki sa oti, au qai raica na nona kila vinaka na vuravura kei na bula.
Eda sotava na dredre—ena veigauna, so sa dredre saraga. E vakatara tu na Turaga meda curuma na dredre me rawa ni da vakavinakataki ka vakataucokotaki me rawa ni da na tiko vata kei koya ka tawamudu.
Na Kalou e vakavulica na Parofita o Josefa Simici mai na vale ni veiveisu mai Liberty ni sau ni nona vosota vakavinaka na nona dredre ena curu kina bula tawamudu:
“Ia na luvequ, me vakacegu na yalomu; raica sa lekaleka wale ga na gauna ni nomu rarawa kei na vutugu;
“Ia, kevaka ko sa vosota rawa, ena vakacerecerei iko cake na Kalou; raica ko na vakamalumalumutaki ira kecega na nomu meca” (V&V 121:7–8).
E levu na ka e tarai keda ena lomani noda bula sa vakavuna na dredre ni noda vosota kina vakavinaka. E rawa ni vakaoqo ki na dua na vuvale e vakararavi tiko ki na iteitei ni sega tu na uca. Era na vakananuma, “Ena vacava beka na balavu ni nodatou na wawa tiko?” E rawa ni vakaoqo vua e dua na tabagone me vorata na kena sa tubu ka sinai na veitemaki kei na vakasisila. E rawa ni vakaoqo vua e dua na cauravou e sotava tiko na dredre ni vuli kei na sasaga me rawa kina ni cakacaka ka qarava na watina kei na nona vuvale. E rawa ni vakaoqo vua e dua e sega ni kune cakacaka se vakayalia veitaravi na nona cakacaka oti na kena mai sogo na bisinisi e cakacaka voli kina. E rawa ni vakaoqo vei ira era sotava tiko na torosobu ni nona bulabula vinaka kei na kaukauwa vakayago, ka rawa ni yacovi ira sara tikoga oqo se dua na gauna ena nodra bula mai muri se o ira nodra daulomani.
Ia na Kalou dauloloma oqo e sega ni vakatovolei keda me rawa ni raica noda vosota na vei dredre ia e vakatovolei keda me rawa ni raica o koya na noda vosota vakavinaka na dredre ka vakavoui mai kina.
Na Mataveiliutaki Taumada e vakavulici Elder Parley P. Pratt (1807–57) na gauna e kacivi vou kina me mai lewena na Kuoramu ni Apositolo Le Tinikarua: “O sa digitaki mo mai lewena e dua na igolegole ena gadrevi kina mo ni na vakarorogo mai na yalomu taucoko; … mo vaka na moto makomakoaliliva. … Mo na vosota e levu na dredre, levu na cakacaka, kei na levu na veivatovolei ka mo vakavinataki ka vakavoui. … Na Tamada Vakalomalagi e gadreva; na rara e Nona; na cakacaka e Nona; o Koya ena … kailavaki iko … ka na tabei iko cake.”1
Ena vola i Iperiu, e vosa tiko kina o Paula me baleta na vua ni vosata vakavinaka: “Ia ka sega ni ka ni marau na dauveicudruvi ni sa ia tiko, a ka rarawa ga: ia emuri sa qai vuataka na vua ni yalododonu era sa vakacegui kina ko ira sa caka vei ira” (Iperiu 12:11).
Na noda veivakatovolei kei na dredre e solia vei keda e dua na isolisoli e rawa ni vakayagataki meda vuli ka tubu mai kina, ka na rawa ni veisautaka na noda draki ni bula. Kevaka eda vuki vua na noda iVakabula ena gauna ni veivaka tovolei dredre, na yaloda ena vakavoui ena gauna eda vosota kina.
Ia, na matai ni ka mo nanuma mo masu ena veigauna (raica V&V 10:5; Alama 34:19–29).
Na ikarua ni ka mo sasaga vakaukauwa mo maroroya na ivunau—se vakacava sara na veisaqasaqa, na veitemaki, se na cava ga e tu wavoliti keda (raica na Mosaia 4:30).
Na ikatolu ni ka bibi mo qarava na Kalou (raica na V&V 4:2; 20:31).
Ni da veiqaravi ena vukui noda iVakavuvuli, ena yaco meda kilai ka lomani Koya. Ena yaco, meda gugumatua ena masu kei na veiqaravi ena yalodina, o na tekivu mo na kila mai na ligana na noda iVakabula vata kei na kaukauwa ni Yalo Tabu ena noda bula. E levu vei keda ena lomani dua na gauna eda veiqaravi voli kina ka da vakila na nona veitokani voli. Kevaka o vakasamataka lesu na gauna oya, o na nanuma eso na veisau e yacovi iko. Na veitemaki ni caka ivalavala ca e lailai sobu. Na gagadre mo caka vinaka ena toso cake. O ira na kilai iko vinaka ka lomani iko era na kaya vei iko: “Kemuni sa yalovinaka ka yalomalua. O sega ni vaka na tamata keimami a kila tu.”
O sega ni vaka na tamata oya. O veisau ena Veisorovaki nei Jisu Karisito baleta ni o vakararavi voli Vua ena gauna ni dredre.
Au yalataka vei iko na Turaga ena vukei iko ena gauna ni dredre kevaka o vakasaqara ka qaravi Koya, na yalomu ena vakavoui ena gauna o vakayacora tiko kina. Au bolei kemuni mo ni vakabauti Koya ena nomuni sasaga kece.
Au kila ni Kalou na Tamada e bula, ka rogoca, ka sauma na noda masu kece. Au kila ni sa mai sauma na iVakabula na isau ni noda ivalavala ca kece, ka vinakata meda lako mai Vua. Au kila ni Tamada kei na Luvena e raici keda yadua ka vakarautaka tiko e dua na sala meda vosota vakavinaka ka meda lesu tale vua.
© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi 6/17. Vakadonui me vakadewa: 6/17. Vakadewa ni First Presidency Message, July 2017. Fijian. 97927 858