Pweng sin Prestuhnsi Se Met, Julahe 2017
Mwe Insewowo ma tuhkuh ke Muhtwacnglah
Ke nga tuh sie mukul fuhsr ah, nga kuhlwacnsap ke Alu uh ekihn mwet in kahsruh se met nuh sin tistrik prestuhn na lahlmwetmwet se. El kwacna srihke in lutiyuc. Nga esam kahs in kahsruh ma el tuh use nuh sihk ac: “Fin kom ohsun nuh sin sie mwet, oruh in nuh muh el oasr in elyah upac, na ac pwacye sum inkaiyacn pacl uh.” Nga tuh nuhnkuh muh el siyac na ma upac uh yohk. Ingena, puhs likina yac luhmngaul, nga kuh in liye lah el kahlwem ke facluh ac ohiyacn moul uh.
Kuht nuh kwewa oasr ma upac kuht sun—ke kuhtuh pacl, suc ma arlac upac. Kuht etuh lah Leum el lwelah kuht in sun ma upac kuht in muh eis etwacack ac suwohswohs kuht in muh muhta Yohrohl ma pahtpaht.
Leum el lotwel Mwet Pahluh Joseph ke Nien Srohoh Liberty lah mwe insewowo nuh ke muhtwacnglah lal ke ma upac nuh sel uh ac kahsrwel in fal in eis moul ma pahtpaht:
Nguhn lal enenuh in sesseslah ke mihslac. Mwe lokoalok ac mwe toasr lal fah mana nuh ke kihtin pacl.
Ac na, fin kom muhtwacnglah, God el fah sruhkkomyak nuh lucng; kom fah kuhtanglah mwe lokoalok lom nuh kwewa (liye D&C 121:7–8).
Ma pucspucs ke moul se inge tuhkuh fungul kuht oruh liyeyuck muh upac in muhtwacnglah. Kuh in liyeyuck ohingacn nuh sin sie sucu ma muhta epacl nuh ke fukun imac lalos a wacngihn af sikyak. Sahp elos ac nuhnkuh, “Kuh kuht ac muhta muhtweng ne ngac?” Kuh in liyeyuck ohingacn nuh sin sie mwet fuhsr ma puhtatyang in lain upaclah luhn ma fohkfohk ac mwe sruhf uh. Kuh in liyeyuck ohingacn ke sie mukul fuhsr ma srihke in eis lutlut kuh ahkpah ma el enenuh nuh ke sie orekma in katweack muhtwacn kiyacl ac sucu lal. Kuh in liyeyuck ohingacn ke sie mwet ma tiac kuh in sokwack orekma kuh ma fihlfihl in wacngihnlac orekma la ke nien orekma ingacn kaliyac sruhnguhl lalos nuh sel uh. Kuh in liyeyuck ohingacn nuh selos suc puhlakihn elyah ke mas in mahno, ma sahp sa na sikyak kuh sikyak tok in moul lalos kuh nuh selos suc elos luhngse.
Tuh God luhngse se inge tiac oakiyac ma upac inge in liye lah kuht kuh in muhtwacnglah ma upac tuhsruhk el oakiyac in liye lah kuht ac muhtwacnglah wo ac in eis kapkapwack kac.
Prestuhnsi Se Met lotwel Elder Parley P. Pratt (1807–57) ke sasuciyacn pahng lal nuh ke U luhn Mwet Sap Singucul Luo: “Kom oacwaclah nuh ke sie srihpac ma enenuh lohacng nuh kwewa lom uh; … eklac oacna soko osra fwel. … Kom enenuh in muhtwacnglah ma upac, orekma yohk, ac elyah ma tuhkuh ke wacngihn suhna luhn ma puhs ac eklac fas. … Pahpah tomom Inkuhsrao enenuh ohiyac sacn; ma Lal pa imac uh; ma Lal pa orekma uh; ac El fah … ahkenganye kom … ac sruhkkomyak.”1
Ke puk lal Hebrew, Paul el sramsram ke fahko luhn muhtwacnglah: “Ke pacl ma kaiyuk kut uh, kut ac liye oana in ma aksupwarye kut ke pacl sac, ac tia ma in akengankye kut. Tusruktu tok, elos su aksuwosyeyuk ke kain kaiyuk inge elos kosrani moul in misla luhn sie moul suwohs” (Hebrews 12:11).
Ma upac ac elyah lasr uh use pacl lasr in etwaclah ma uh ac kapkapwack, ac finne in ikihlkuhtlac sifacna. Fin kuht kuh in for nuh sin Mwet Lahngo ke pacl upac emet nuh sesr, nguhnasr kuh in ahksuwohsyeyuck ke kuht muhtwacnglah uh.
Ke ma inge, ma se emet in esam pa in sikalweni in pruhe (liye D&C 10:5; Alma 34:19–29).
Ma se ahkluo pa in tahfwelah in kwacfeacng in liyacacng masap—finne oasr mwe lain, mwe sruhf, kuh mwe ahktihkuclkucl ma raunikuhtlac uh (liye Mosiah 4:30).
Ma yohk srihpac ahktolu in oruh uh pa in kuhlwacnsuhpuh Leum (liye D&C 4:2; 20:31).
Ke kuhlwacnsap luhn Leum, kuht muhtwacwacack in etwacllah ac luhngse El. Kuht ac, fin kuht kwacfeacng in pruhe ac kuhlwacnsap pwacye, muhtwacwacack in akihlen orekma luhn Mwet Lahngo ac mokleyuck luhn Nguhn Muhtahl ke moul lasr uh. Puhkantwen sesr utuckuh pacl in kuhlwacnsap ac puhlakihn kain in kolyuck inge. Fin kom ngwetlah nuhnkuh ke kain pacl ingacn, kom ac esamwack lah tuh oasr eklac lom. Mwe sruhf in oruh ma koluk uh oacna in srihkeni. Kena in oruh ma wo uh yohkwaclihk. Elos suc etwekom yohk ac luhngse kom sahp tuh fahk: “Kom eklac kuhlwacng ac yohkwaclihk mongfihsracsr lom. Liyeyuck muh tiac kom met ah.”
Kom tiac oacna kom met ah. Kom eklac ke Iwaclah luhn Jisus Kraist mweyen kom fungyang nuh Sel ke pacl upac nuh sum uh.
Nga olwelah nuh sum lah Leum el ac kahsrwe kom ke pacl upac nuh sum fin kom sokol ac kuhlwacnsap nuh Sel ac nguhnum fah ahksuwohsyeyuck ke fuhfahsryucsr lom. Nga kwacfe kom in sang luhlahlfongi lom nuh Sel ke ma upac nuh kwewa lom.
Nga luhlahlfongi lah Pahpah God el moul ac lah el lohng ac topuk pruhe nuh kwewa lasr. Nga etuh lah Wen Nahtuhl, Jisus Kraist, el molwelah ma koluk lasr nuh kwewa ac lah El kena kuht in fahsr nuh Yohrohl. Nga etuh lah Pahpah ac Wen elos liye kuhtyang ac ahkolah sie inkacnek nuh sesr in muhtwacnglah ac in sifil fohlohk nuh ingoh.
© 2017 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn First Presidency Message, July 2017. Kosraean. 97927 868