Ennaan eo an Būreejtōnji eo Kein Kajuon, Juļae 2017
Tōprak Eo jān Kijejeto
Ke ikar juon likao, ikar jerbal ilo Kabun̄ in āinwōt juon rikakpilōklōk n̄an juon district būreejtōn eo emāletlet. Ekar kajjieon̄ aolep iien n̄an katakin eō. Ij keememej kapilōk eo juon iien ekar jiron̄ tok eō: “N̄e kwoj ioon juon armej, kōm̧m̧an n̄an e eļan̄n̄e ej pād ilo jorrāān ļapļap, im kwonaaj jim̧we eiten aolep iien.” Innām ikar ļōmņak bwe ekar juon eo me ejjeļo̧k kōjatdikdik ippān. Kiiō, elōn̄ļo̧k jān 50 iiō tokālik, imaron̄ lo jon̄an an meļeļe kōn laļ in im mour in.
Kōj aolep jej jelm̧ae mālijjon̄ ko—elōn̄ iien ko, mālijjon̄ ko reppen. Jejeļā bwe Irooj ej kōtļo̧k ad jelm̧ae mālijjon̄ ko n̄an kōj bwe jen karreo im wāppen bwe jen maron̄ pād Ippān n̄an indeeo.
Irooj ekar katakin Rikanaan Josep Smith ilo Jikin Kalbuuj Liberty bwe tōprak eo kōn kijejetoki mālijjon̄ ko an enaaj jipan̄ bwe en maron̄ ekkar n̄an bōk mour indeeo.
“Nejū m̧aan, aenōm̧m̧an en n̄an am; mennin jum̧ae kein am im en̄taan kein am renaaj n̄an jidik wōt iien;
“Innām, eļan̄n̄e kwo naaj kijejetoiki em̧m̧an, Anij enaaj kotak eok ijo eutiej; kwo naaj anjo̧ ioon aolep rijum̧ae ro am” (K&B 121:7–8).
Elōn̄ men ko rej joon tok kōj ilo mour in me remaron̄ pen ad kijenmeji. Wāween in emaron̄ waļo̧k n̄an juon baam̧le eo me rej pedped wōt ioon jikin kallib ko aer n̄e ejjeļo̧k wōt. Remaron̄ ba, “Ewi aitokan ad naaj jelm̧ae menin?” Wāween in emaron̄ waļo̧k n̄an juon jodikdik eo me ekar jelm̧ae ilo an jum̧ae ibebtok in men ko renana im kapo ko. Wāween in emaron̄ waļo̧k n̄an juon likao eo me ej kate bwe en bōk jeļāļo̧kjeņ ak kamminene eo ej aikuji n̄an juon jerbal n̄an jipan̄ kōrā eo pāleen im baam̧le eo an. Wāween in emaron̄ waļo̧k n̄an juon armej eo me ejjab maron̄ lo juon jerbal ak juon armej eo eluuji jerbal eo ak pejnej eo emōj an kilōk. Wāween in emaron̄ waļo̧k n̄an armej ro rej nan̄inmejmejļo̧k im m̧ōjņo̧ļo̧k ānbwinnier, eo me emaron̄ itok m̧okta ak tokālik ilo mour ko aer n̄an er ak n̄an ro rej iakwe.
Ak juon Anij eo ej iakwe ekar jab kōm̧m̧ani kain teej kein im̧aan mejād jab wōt n̄an lale n̄e jemaron̄ kijenmeji ilo aer eppen ak ijjelo̧kin n̄an lale n̄e enej em̧m̧an ad kijenmej kaki im bwe jen erom ro rereeo.
Būreejtōnji eo Kein Kajuon ekar katakin Elder Parley P. Pratt (1807–57) ke kar kūri āinwōt juon membōr ekāāl ilo Doulul eo an Jon̄oulruo Rijilōk ro: “Kwoj bōk koņaam̧ ilo juon jekjek eo me enaaj aikuji aolepān am̧; … erom̧ juon jābe erreo. … Kwoj aikuj kijenmej kōn jerbal ko reppen, reļļap, im elōn̄ wōt mālijjon̄ ko renaaj erom̧ kajoor. … Jemedwōj Ilan̄ ej aikuji; jikin kallib in ej An; jerbal in ej An; Enaaj pinniki eok … im kotak lōn̄ļo̧k eok.”1
Ilo bok in Hibru, Paul ej kōnono kōn leen kijejeto: “Jabdewōt kaje, ilo iien in e jab men in m̧ōņōņō, a men in būrom̧ōj; ijoke tokālik ej jebar leen kwōjarjar e aenōm̧man n̄an ro em̧ōj kajeik er kake” (Hibru 12:11).
Mālijjon̄ ko ad im men ko reppen rej letok n̄an kōj iien ko rem̧m̧an n̄an ad katak im eddōkļo̧k, im aaet remaron̄ ukōt paaktokid. Eļan̄n̄e jemaron̄ oktakļo̧k n̄an Rilo̧mo̧o̧r eo ilo iien ko reppentata ilo mour ko ad, jetōb ko ad remaron̄ ej jatōltōlļo̧k eļan̄n̄e jej kijenmej.
Kōn menin, men eo jinointata n̄an keememej ej bwe jen jar aolep iien (lale K&B 10:5; Alma 34:19–29).
Men eo kein karuo ej bwe jen wōnm̧aanļo̧k im pokake kien ko—mekarta jum̧ae ko, kapo ko, ak aen̄wān̄wā ko ipeļaakid (lale Mosaia 4:30).
Men eo kein kajilu epen n̄an kōm̧m̧ane ej n̄an jerbal n̄an Irooj (lale K&B 4:2; 20:31).
Jān ad jerbal ilo jerbal in an Irooj, jej jeļāļo̧k wōn E im iakwe E. Jenaaj, eļan̄n̄e jej kajjieon̄ wōt ilo jar im tiljek ilo jerbal, jej jino loe pein Rilo̧mo̧o̧r eo im kareel ko an Jetōb Kwojarjar ilo mour ko ad. Elōn̄ iaadwōj rekar kōm̧m̧an kain jerbal rot in ilo juon iien im jekar en̄jake jem̧jerā in. Eļan̄n̄e kwonej rielikļo̧k im ļōmņak kōn iien ņe, kwonaaj keememej bwe ekar wōr oktak ko ilo kwe. Kapo ko n̄an kōm̧m̧an men ko nana rej dikļo̧k. Kōņaan eo n̄an kōm̧m̧an em̧m̧an ej ļapļo̧k. Ro me relukkuun jeļā kōn kwe im rej iakwe eok remaron̄ kar ba: “Em̧ōj am̧ oktakļo̧k im joujļo̧k im ļapļo̧k am̧ jeļā kemmaanwa. Āinwōt iļak lale kwe, kwoj juon armej eoktakļo̧k.
Āinwōt ejjab kwe ņe. Kwaar oktak kōn Pinmuur eo an Jisōs Kraist kōnke kwaar pedped wōt ilo E ilo iien mālijjon̄ ko am̧.
Ij kallim̧uri eok bwe Irooj enaaj itok im jipan̄ eok ilo mālijjon̄ ko am̧ eļan̄n̄e kwoj pukōt im jerbal n̄an E im bwe jetōb eo am̧ enej jino jatōltōlļo̧k. Ij kajjitōk ippam̧ bwe kwōn likūt am̧ lōke ilo E ilo aolep apan̄ ko am̧.
Ijeļā bwe Anij Jemed ej mour im bwe E ej ron̄jake im uwaaki jar ko ad aolep. Ijeļā bwe Nejin, Jisōs Kraist, ekar kōļļaik wōņāān aolep jerawiwi ko ad im bwe E ekōņaan bwe jen itok n̄an E. Ijeļā bwe Jemed im Nejin rej emejrake kōj im rekar kōpooje juon iaļ bwe jen kijejeto im bwe jen bar rooltok n̄an kapijuknen eo ad.
© 2017 jān Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an First Presidency Message, July 2017. Marshallese 97927 874