2017
Bwe Ren Juon
July 2017

Naan in Katak an Kōrā, Juļae 2017

Bwe Ren Juon

Kanooj jar ilo am̧ ekkatak kōn katak in im pukōt n̄an jeļā ta eo kwonaaj kwaļo̧k. Ekōjkan ad naaj meļeļe unleplep eo an Doulul eo an Kōrā ro rej kōpooj leddik ro nejin Anij n̄an kōjeraam̧m̧an ko an mour indeeo?

Relief Society seal

Tōmak, Baam̧le, Deeor

“Jisōs ekar lukkuun bōro kuk ippān Jemān ilo An kar leļo̧k E make, jim̧or ilo kanniōk im jetōb, n̄an ankilaan Jemān,” Elder D. Todd Christofferson jān Doulul eo an Jon̄oulruo Rijilōk ro ekar katakin.

“… Em̧ool jej jāmin juon ippān Anij im Kraist m̧ae iien Ankilaer im ikdeelel ko aer rej ikdeelel ko ad reļļaptata. Kain wūjlepļo̧k rōt in ejjab maron̄ tōprak ilo juon raan, ak kōn Jetōb Kwojarjar eo, Irooj enaaj katakin kōj eļan̄n̄e jej m̧ōņōņō m̧ae iien, ilo tōre eo jej jerbal e, ejejjet kar kōnono kake bwe E ej ilo kōj āinwōt an Jemān pād ilo E.”1

Linda K. Burton, Būreejtōn eo Eutiej an Doulul eo an Kōrā ro, ekar katakin ewi wāween ad m̧am̧ōde jerbal in ippān doon: “Kōm̧m̧an im kōjparok bujen ko ad ej juon ad wūjlepļo̧k n̄an erom āinwōt Rilo̧mo̧o̧r eo. Unleplep eo ej n̄an kajjieon̄ m̧anit ko rem̧m̧antata me rej walok ilo juon iaan al in jar eo em̧m̧an: Inaj ilo̧k ijo kwōjkōņan bwe in ilo̧k. … Inaj ba ta eo kwōj kōņan bwe in ba. … Inaaj erom wōt juon eo kwoj kōnan.’”2

Elder Christofferson ekar barāinwōt kakeememej kōj bwe “ilo ad kijejeto raan n̄an raan im wiik n̄an wiik n̄an ļoor iaļ an Kraist, ad jetōb enaaj deļo̧n̄ ilo an kakkije, tariņae ko ie renaaj dikļo̧k, im kapo ko reban kainepata.”3

Neill F. Marriott, Rikakpilōklōk eo Kein Karuo ilo Būreejtōnji eo an Doulul eo an Jiron̄ ro, ej kwaļo̧k naan in kam̧ool eo an kōn kōjeraam̧m̧an ko ilo ad kajejjet ankilaad ippān ankilaan Anij: “Epen aō kar joļok kōnaan ko an laļ in n̄an kōņaan ko aō make, aaet kile bwe kōnaan ko aō relikjab, ewōr jon̄aer, im rejjab jejjet n̄an wāween eo an Jisōs Kraist. Wāween eo an [Jemedwōj Ilan̄] ej iaļ eo me ej tōl kōj n̄an mōņōņō ilo mour in im mour eo ej itok.’”4 Jen kajjieon̄ ilo ettā juon wōt ippān Jemedwōj Ilan̄ im Nejin, Jisōs Kraist.

Kakobaba in Eoon ko im Meļeļe ko

Jon 17:20–21; Epesōs 4:13; Katak im Bujen ko 38:27; reliefsociety.lds.org

© 2017 jān Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook an Visiting Teaching Message, July 2017. Marshallese. 97927 874

Kakeememej ko

  1. D. Todd Christofferson, “That They May Be One in Us,” Liahona, Nov. 2002, 72, 73.

  2. Linda K. Burton, “Kajoor, Lan̄lōn̄, im Iakwe n̄an Kōjparok Bujen,” Liaona, Oktoba. 2013, 111.

  3. D. Todd Christofferson, “That They May Be One in Us,” 71.

  4. Neill F. Marriott, “Kwaļo̧k Būruwōd n̄an Anij,” Kweilo̧k eo Eļap, Okt. 2015, 32.