ຂ່າວສານການຢ້ຽມສອນ, ເດືອນກໍລະກົດ 2017

ເພື່ອວ່າເຂົາເຈົ້າຈະໄດ້ເປັນອັນໜຶ່ງດຽວກັນ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈຈຸດປະສົງຂອງສະມາຄົມສະຕີສົງເຄາະ ຕຽມທິດາຂອງພຣະເຈົ້າ ສຳລັບພອນແຫ່ງຊີວິດນິລັນດອນແນວໃດ?

ສັດທາ, ຄອບຄົວ, ສົງເຄາະ

“ພຣະເຢຊູໄດ້ບັນລຸຄວາມເປັນອັນໜຶ່ງດຽວກັນຢ່າງສົມບູນແບບ ກັບພຣະບິດາເທິງສະຫວັນ ໂດຍການຍອມຕົນ, ທັງທາງເນື້ອໜັງ ແລະ ທາງວິນຍານ, ເພື່ອເຮັດຕາມພຣະປະສົງຂອງພຣະບິດາ,” ແອວເດີ ດີ ທອດ ຄຣິສໂຕເຟີສັນ ແຫ່ງກຸ່ມອັກຄະສາວົກສິບສອງ ໄດ້ສອນ.

“… ແນ່ນອນວ່າ ເຮົາຈະບໍ່ໄດ້ເປັນອັນໜຶ່ງດຽວກັນກັບພຣະເຈົ້າ ແລະ ພຣະຄຣິດ ຈົນກວ່າເຮົາໄດ້ເຮັດໃຫ້ພຣະປະສົງ ແລະ ຄວາມສົນໃຈຂອງພວກພຣະອົງ ເປັນຄວາມປາດຖະໜາອັນຍິ່ງໃຫຍ່ຂອງເຮົາເສຍກ່ອນ. ການຍອມເຮັດຕາມເຊັ່ນນັ້ນ ຈະບັນລຸບໍ່ໄດ້ໃນພຽງມື້ໜຶ່ງວັນດຽວ, ແຕ່ຜ່ານທາງພຣະວິນຍານສັກສິດ, ພຣະຜູ້ເປັນເຈົ້າຈະສິດສອນເຮົາ ຖ້າຫາກເຮົາເຕັມໃຈ ຈົນກວ່າ, ເມື່ອເວລາຜ່ານໄປ, ມັນອາດຖືກກ່າວເຖິງຢ່າງຖືກຕ້ອງວ່າ ພຣະອົງສະຖິດຢູ່ໃນເຮົາ ດັ່ງທີ່ພຣະບິດາສະຖິດຢູ່ໃນພຣະອົງ.”¹

ລິນດາ ເຄ ເບີຕັນ, ປະທານສະມາຄົມສະຕີສົງເຄາະສາມັນ, ໄດ້ສອນວິທີທີ່ຈະບັນລຸຄວາມເປັນອັນໜຶ່ງດຽວກັນດັ່ງນີ້: “ການເຮັດ ແລະ ຮັກສາພັນທະສັນຍາຂອງເຮົາ ເປັນການສະແດງອອກເຖິງຄວາມຜູກມັດຂອງເຮົາທີ່ຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດ. ອຸດົມຄະຕິຄື ທີ່ຈະພະຍາຍາມໃຫ້ມີທັດສະນະທີ່ດີທີ່ສຸດຄືກັນກັບເນື້ອເພງສອງສາມຕອນໃນເພງສວດທີ່ມັກຊອບ ເພງນີ້: ‘ຂ້າຈະໄປທີ່ ພຣະອົງ ບັນຊາ. … ຂ້າຈະເວົ້າສິ່ງທີ່ ພຣະອົງ ບັນຊາ. … ຂ້າຈະເປັນດັ່ງທີ່ ພຣະອົງ ບັນຊາ.’”²

ແອວເດີ ຄຣິສໂຕເຟີສັນ ຍັງໄດ້ເຕືອນເຮົາອີກວ່າ “ເມື່ອເຮົາອົດທົນໄປແຕ່ລະວັນ ແລະ ແຕ່ລະອາທິດ ທີ່ຈະເດີນໄປໃນເສັ້ນທາງຂອງພຣະຄຣິດ, ແລ້ວວິນຍານຂອງເຮົາ ຈະຢືນຢັນເຖິງຄວາມດີເດັ່ນດັ້ງເດີມຂອງມັນ, ການຕໍ່ສູ້ພາຍໃນຈະເບົາບາງລົງ, ແລະ ການລໍ້ລວງກໍຈະລົດນ້ອຍຖອຍລົງ.”³

ແນວ ແອັຟ ແມຣິອອດ, ທີ່ປຶກສາທີສອງໃນຝ່າຍປະທານອົງການຍິງໜຸ່ມສາມັນ, ເປັນພະຍານເຖິງພອນຂອງການພະຍາຍາມທີ່ຈະເຮັດໃຫ້ຄວາມປະສົງຂອງເຮົາ ສອດຄ່ອງກັບພຣະປະສົງຂອງພຣະເຈົ້າ ດັ່ງນີ້: “ຂ້າພະເຈົ້າພະຍາຍາມແກ້ໄຂບັນຫາ ເລື່ອງການເອົາໃຈຕົນເອງ ຊຶ່ງໃນທີ່ສຸດໄດ້ຮູ້ວ່າ ທິດທາງ ຂອງຂ້າພະເຈົ້າ ຍັງຂາດຕົກບົກພ່ອງ, ແລະ ຕ່ຳຕ້ອຍກວ່າທິດທາງຂອງພຣະເຢຊູຄຣິດ. ‘ທິດທາງ [ຂອງພຣະບິດາເທິງສະຫວັນຂອງເຮົາ] ເປັນເສັ້ນທາງທີ່ນຳໄປສູ່ຄວາມສຸກ ໃນຊີວິດນີ້ ແລະ ໃນຊີວິດນິລັນດອນ ໃນໂລກທີ່ຈະມາເຖິງ.’”⁴ ຂໍໃຫ້ເຮົາຈົ່ງພະຍາຍາມດ້ວຍຄວາມຖ່ອມຕົວ ເພື່ອຈະກາຍເປັນອັນໜຶ່ງດຽວກັນກັບພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ.

ຂໍ້ພຣະຄຳພີ ແລະ ຂໍ້ມູນເພີ່ມເຕີມ

ໂຢຮັນ 17:20–21; ເອເຟໂຊ 4:13; Doctrine and Covenants 38:27; reliefsociety.lds.org

© 2017 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Visiting Teaching Message, July 2017. Laotian. 97927 331