ຂ່າວສານຈາກຝ່າຍປະທານສູງສຸດ, ເດືອນກໍລະກົດ 2017
ລາງວັນສຳລັບ ການອົດທົນໄດ້ດີ
ຕອນຂ້າພະເຈົ້າເປັນໜຸ່ມ, ຂ້າພະເຈົ້າໄດ້ຮັບໃຊ້ ໃນສາດສະໜາຈັກ ໃນຖານະທີ່ເປັນ ທີ່ປຶກສາຂອງປະທານທ້ອງຖິ່ນທີ່ສະຫລາດຄົນໜຶ່ງ. ເພິ່ນມັກພະຍາຍາມສອນຂ້າພະເຈົ້າຢູ່ສະເໝີ. ຂ້າພະເຈົ້າຈື່ຄຳແນະນຳທີ່ເພິ່ນໄດ້ມອບໃຫ້ຂ້າພະເຈົ້າໃນຄັ້ງໜຶ່ງ ທີ່ວ່າ: “ເມື່ອເຈົ້າພົບພໍ້ບາງຄົນ, ຈົ່ງປະຕິບັດກັບເຂົາເຈົ້າ ຄືກັບວ່າເຂົາເຈົ້າມີບັນຫາອັນໜັກໜ່ວງ, ແລະ ເຈົ້າຈະຖືກຫລາຍກວ່າເຄິ່ງໜຶ່ງ.” ໃນເວລານັ້ນ ຂ້າພະເຈົ້າຄິດວ່າ ເພິ່ນເບິ່ງໂລກໃນແງ່ຮ້າຍ. ບັດນີ້, ຫລາຍກວ່າ 50 ປີຜ່ານໄປ, ຂ້າພະເຈົ້າສາມາດເຫັນວ່າ ເພິ່ນໄດ້ເຂົ້າໃຈໂລກ ແລະ ຊີວິດຫລາຍຂະໜາດໃດ.
ເຮົາທຸກຄົນກໍມີການທົດລອງທີ່ຈະປະເຊີນ—ບາງຄັ້ງ, ກໍເປັນການທົດລອງທີ່ໜັກໜ່ວງຫລາຍ. ເຮົາຮູ້ວ່າ ພຣະຜູ້ເປັນເຈົ້າອະນຸຍາດໃຫ້ເຮົາ ຜ່ານຜ່າການທົດລອງ ເພື່ອວ່າເຮົາຈະຖືກເຮັດໃຫ້ເຫລື້ອມເປັນເງົາ ແລະ ດີພ້ອມ ເພື່ອວ່າເຮົາຈະສາມາດຢູ່ກັບພຣະອົງໄດ້ ຊົ່ວນິລັນດອນ.
ພຣະຜູ້ເປັນເຈົ້າໄດ້ສອນສາດສະດາໂຈເຊັບ ສະມິດ ຢູ່ໃນຄຸກລີເບີຕີວ່າ ລາງວັນສຳລັບການອົດທົນກັບການທົດລອງຂອງເພິ່ນໄດ້ດີ ຈະຊ່ວຍເພິ່ນໃຫ້ເໝາະສົມກັບຊີວິດນິລັນດອນ.
ພຣະຜູ້ເປັນເຈົ້າໄດ້ສັນຍາກັບເພິ່ນວ່າ ພຣະອົງຈະປະທານຄວາມສະຫງົບໃຫ້ຈິດວິນຍານຂອງເພິ່ນ, ຄວາມທຸກຍາກລຳບາກ ແລະ ຄວາມທຸກທໍລະມານຂອງເພິ່ນ ຈະເປັນພຽງແຕ່ຊົ່ວໄລຍະໜຶ່ງເທົ່ານັ້ນ;
ແລະ ຖ້າຫາກເພິ່ນອົດທົນມັນໄດ້ດີ, ພຣະເຈົ້າຈະຍົກເພິ່ນຂຶ້ນສູ່ເບື້ອງບົນ, ເພິ່ນຈະມີໄຊເໜືອສັດຕູທັງໝົດຂອງເພິ່ນ (ເບິ່ງ D&C 121:7–8).
ມີຫລາຍສິ່ງທີ່ໂຫມກະໜ່ຳເຮົາ ໃນຊີວິດ ຈົນເບິ່ງຄືວ່າ ຍາກຫລາຍທີ່ຈະອົດທົນກັບມັນໄດ້ດີ. ມັນສາມາດເປັນເຊັ່ນນັ້ນ ກັບຄອບຄົວທີ່ເພິ່ງອາໄສຜົນລະປູກ ເມື່ອບໍ່ມີຝົນ. ເຂົາເຈົ້າອາດສົງໄສວ່າ, “ເຮົາຊິສາມາດອົດທົນໄປໄດ້ດົນປານໃດ?” ມັນສາມາດເປັນເຊັ່ນນັ້ນ ກັບຄົນໄວລຸ້ນ ທີ່ປະເຊີນກັບຄວາມສົກກະປົກ ແລະ ການລໍ້ລວງ ທີ່ຫລັ່ງໄຫລມາຫາເຂົາຢ່າງຫລວງຫລາຍ. ມັນສາມາດເປັນເຊັ່ນນັ້ນ ກັບຊາຍໜຸ່ມທີ່ພະຍາຍາມສຶກສາ ຫລື ເຝິກຝົນຕົນເອງ ສຳລັບການງານ ເພື່ອຫາລ້ຽງລູກເມຍ. ມັນສາມາດເປັນເຊັ່ນນັ້ນ ກັບບຸກຄົນຜູ້ຫາວຽກເຮັດງານທຳບໍ່ໄດ້ ຫລື ຜູ້ທີ່ຕົກງານ ຫລັງຈາກທຸລະກິດເລີກລົ້ມ. ມັນສາມາດເປັນເຊັ່ນນັ້ນ ກັບຄົນທີ່ປະເຊີນກັບບັນຫາເລື່ອງສຸຂະພາບ, ຊຶ່ງອາດມາເຖິງຕອນຍັງໜຸ່ມ ຫລື ຕອນແກ່ ໃນຊີວິດ ຫລື ມາເຖິງຄົນທີ່ເຂົາເຈົ້າຮັກ.
ແຕ່ພຣະເຈົ້າທີ່ຊົງຮັກ ບໍ່ໄດ້ຕັ້ງການທົດສອບເຊັ່ນນັ້ນໄວ້ຢູ່ຕໍ່ໜ້າເຮົາ ເພື່ອຈະເບິ່ງວ່າ ເຮົາຈະສາມາດອົດທົນກັບຄວາມຫຍຸ້ງຍາກນັ້ນໄດ້ຫລືບໍ່ ແຕ່ເພື່ອເບິ່ງວ່າ ເຮົາຈະສາມາດທົນກັບມັນໄດ້ດີພຽງໃດ ແລະ ເພື່ອຈະຖືກເຮັດໃຫ້ເຫລື້ອມເປັນເງົາ.
ຝ່າຍປະທານສູງສຸດໄດ້ສອນແອວເດີ ພາລີ ພີ ພະແຣັດ (1807–57) ຕອນເພິ່ນໄດ້ຖືກເອີ້ນໃໝ່ໆ ໃຫ້ເປັນສະມາຊິກຂອງກຸ່ມອັກຄະສາວົກສິບສອງວ່າ: “ທ່ານໄດ້ຖືກເກນເຂົ້າສູ່ອຸດົມການ ທີ່ຮຽກຮ້ອງຄວາມສົນໃຈທັງໝົດຂອງທ່ານ; … ກາຍເປັນຫອກຫລາວທີ່ເຫລື້ອມເປັນເງົາ. … ທ່ານຕ້ອງອົດທົນກັບວຽກງານທີ່ໜັກໜ່ວງ, ກັບການອອກແຮງທີ່ໜັກໜ່ວງ, ແລະ ຄວາມຂາດແຄນຫລາຍຢ່າງ ເພື່ອຈະເຫລື້ອມເປັນເງົາທີ່ດີພ້ອມ. … ພຣະບິດາເທິງສະຫວັນຂອງທ່ານ ຮຽກຮ້ອງມັນ; ທົ່ງເປັນຂອງພຣະອົງ; ວຽກງານເປັນຂອງພຣະອົງ; ແລະ ພຣະອົງຈະ … ຮ້ອງເຊຍທ່ານ … ແລະ ໃຫ້ກຳລັງໃຈທ່ານ.”1
ໃນພຣະທຳເຮັບເຣີ, ໂປໂລກ່າວເຖິງຜົນຂອງການອົດທົນໄດ້ດີ ທີ່ວ່າ: “ໃນຂະນະທີ່ມີການຕີສອນນັ້ນ ບໍ່ເປັນໜ້າຊື່ນໃຈເລີຍ ມີແຕ່ເລື່ອງເສົ້າໃຈ ແຕ່ຕໍ່ມາພາຍຫລັງຈະກໍ່ໃຫ້ເກີດຜົນ ຄືຄວາມສຸກສຳລານ ແລະ ຄວາມຊອບທຳແກ່ບັນດາຄົນທີ່ຖືກແອບສອນແລ້ວນັ້ນ” (ເຮັບເຣີ 12:11).
ການທົດລອງ ແລະ ຄວາມຫຍຸ້ງຍາກຂອງເຮົາ ໄດ້ໃຫ້ໂອກາດເຮົາ ທີ່ຈະຮຽນຮູ້ ແລະ ເຕີບໂຕ, ແລະ ມັນຈະປ່ຽນ ແມ່ນແຕ່ທຳມະຊາດຂອງເຮົາ. ຖ້າຫາກເຮົາສາມາດຫັນໄປຫາພຣະຜູ້ຊ່ວຍໃຫ້ລອດ ໃນຄວາມຍາກລຳບາກຂອງເຮົາ, ແລ້ວຈິດວິນຍານຂອງເຮົາ ຈະສາມາດຖືກເຮັດໃຫ້ເຫລື້ອມເປັນເງົາໄດ້ ໃນຂະນະທີ່ເຮົາອົດທົນ.
ດັ່ງນັ້ນ, ສິ່ງທຳອິດທີ່ຕ້ອງຈື່ຈຳຄື ການອະທິຖານສະເໝີ (ເບິ່ງ D&C 10:5; ແອວມາ 34:19–29).
ສິ່ງທີສອງຄືຄວາມພະຍາຍາມສະເໝີ ທີ່ຈະຮັກສາພຣະບັນຍັດ—ບໍ່ວ່າການກົງກັນຂ້າມ, ການລໍ້ລວງ, ຫລື ຄວາມວຸ້ນວາຍ ຈະເປັນແນວໃດກໍຕາມ (ເບິ່ງ ໂມໄຊຢາ 4:30).
ສິ່ງທີສາມທີ່ສຳຄັນຄື ການຮັບໃຊ້ພຣະຜູ້ເປັນເຈົ້າ (ເບິ່ງ D&C 4:2; 20:31).
ໃນການຮັບໃຊ້ຂອງພຣະອາຈານ, ເຮົາມາຮູ້ຈັກ ແລະ ຮັກພຣະອົງ. ຖ້າຫາກເຮົາພາກພຽນໃນການອະທິຖານ ແລະ ໃນການຮັບໃຊ້ຢ່າງຊື່ສັດ, ເຮົາຈະຮັບຮູ້ພຣະຫັດຂອງພຣະຜູ້ຊ່ວຍໃຫ້ລອດ ແລະ ອິດທິພົນຂອງພຣະວິນຍານບໍລິສຸດ ໃນຊີວິດຂອງເຮົາ. ຫລາຍຄົນພວກເຮົາມີໄລຍະທີ່ໄດ້ຮັບໃຊ້ເຊັ່ນນັ້ນ ແລະ ຮູ້ສຶກເຖິງການເປັນເພື່ອນນັ້ນ. ຖ້າຫາກທ່ານຄິດເຖິງເວລາດັ່ງກ່າວ, ທ່ານຈະຈື່ຈຳວ່າ ມັນມີການປ່ຽນແປງໃນຕົວທ່ານ. ການລໍ້ລວງໃຫ້ເຮັດສິ່ງຊົ່ວຮ້າຍ ເບິ່ງຄືວ່າ ມີໜ້ອຍລົງ. ຄວາມປາດຖະໜາທີ່ຈະເຮັດສິ່ງທີ່ດີ ຈະເພີ່ມທະວີຫລາຍຂຶ້ນ. ຄົນທີ່ໄດ້ຮູ້ຈັກທ່ານ ແລະ ຮັກທ່ານ ຄົງເວົ້າວ່າ: “ເຈົ້າໄດ້ກາຍເປັນຄົນມີເມດຕາຫລາຍກວ່າເກົ່າ ແລະ ອົດທົນຫລາຍກວ່າເກົ່າ. ເຈົ້າເບິ່ງບໍ່ຄືເກົ່າ.”
ເຈົ້າບໍ່ຄືເກົ່າ. ເຈົ້າໄດ້ປ່ຽນໄປ ຜ່ານທາງການຊົດໃຊ້ຂອງພຣະເຢຊູຄຣິດ ເພາະເຈົ້າໄດ້ເພິ່ງພຣະອົງ ໃນເວລາທີ່ເຈົ້າໄດ້ຮັບການທົດລອງ.
ຂ້າພະເຈົ້າສັນຍາກັບທ່ານວ່າ ພຣະຜູ້ເປັນເຈົ້າຈະມາຊ່ວຍເຫລືອທ່ານ ໃນເວລາທີ່ທ່ານໄດ້ຮັບການທົດລອງ ຖ້າຫາກທ່ານສະແຫວງຫາ ແລະ ຮັບໃຊ້ພຣະອົງ ແລະ ວ່າຈິດວິນຍານຂອງທ່ານຈະຖືກເຮັດໃຫ້ເຫລື້ອມເປັນເງົາ ໃນຂັ້ນຕອນ. ຂ້າພະເຈົ້າຂໍທ້າທາຍທ່ານ ໃຫ້ໄວ້ວາງໃຈໃນພຣະອົງ ໃນຄວາມຍາກລຳບາກທັງໝົດຂອງທ່ານ.
ຂ້າພະເຈົ້າຮູ້ວ່າ ພຣະເຈົ້າອົງເປັນພຣະບິດາ ຊົງພຣະຊົນຢູ່ ແລະ ວ່າພຣະອົງໄດ້ຍິນ ແລະ ຕອບຄຳອະທິຖານທັງໝົດຂອງເຮົາ. ຂ້າພະເຈົ້າຮູ້ວ່າ ພຣະບຸດຂອງພຣະອົງ, ພຣະເຢຊູຄຣິດ, ໄດ້ໃຊ້ແທນບາບທັງໝົດຂອງເຮົາ ແລະ ວ່າພຣະອົງປະສົງໃຫ້ເຮົາມາຫາພຣະອົງ. ຂ້າພະເຈົ້າຮູ້ວ່າ ພຣະບິດາ ແລະ ພຣະບຸດ ດູແລເຮົາ ແລະ ໄດ້ຕຽມທາງໃຫ້ເຮົາ ເພື່ອຈະໄດ້ອົດທົນໄດ້ດີ ແລະ ກັບຄືນບ້ານອີກເທື່ອໜຶ່ງ.
© 2017 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ First Presidency Message, July 2017. Laotian. 97927 331