Parau poro’i nō te hāhaerera’a a te mau tuahine, tiurai 2017
’Ia riro rātou ’ei hō’ē
’A tuatāpapa nā roto i te pure i teie mātēria ’e ma te ’imi ’ia ’ite e aha te fa’a’ite atu. Nāhea te ta’a-maita’i-ra’a i te fā o te Sōtaiete Tauturu e fa’aineine i te mau tamari’i tamāhine a te Atua nō te mau ha’amaita’ira’a nō te ora mure ’ore ?
Fa’aro’o ’Utuāfare Tōtauturu
«’Ua rae’ahia ia Iesu te hō’ēra’a ’e te Metua nā roto i tōna aurarora’a, te tino ’e te vārua, i te hina’aro o te Metua », ’ua ha’api’i mai ’o Elder D. Todd Christofferson nō te pupu nō te Tino ’Ahuru Ma Piti ’āpōsetolo.
« … E mea pāpū roa ē, e’ita tātou e riro ’ei hō’ē i roto i te Atua ’e i te Mesia tae roa atu ē ’ua fa’ariro tātou i tō rāua hina’aro ’e tō rāua maita’i ’ei hia’ai rahi roa a’e nō tātou. E’ita teie aurarora’a e rae’ahia i roto i te hō’ē noa mahana, terā rā nā roto i te Vārua Maita’i, e riro te Fatu ’ei metua tīa’i nō tātou mai te mea e hina’aro tātou, ē tae roa atu, nā roto i te terera’a o te tau ’ia nehenehe ’ia parauhia ē tei roto ’oia ia tātou mai te Metua i roto Iāna ».1
’Ua ha’api’i mai Linda K. Burton, peresideni rahi nō te Sōtaiete Tauturu nāhea ’ia ’ohipa nā roto i teie hō’ēra’a : « Te ravera’a ’e te ha’apa’ora’a i tā tātou mau fafaura’a, ’o te hō’ē fa’a’itera’a ïa o tō tātou fafaura’a ’ia riro mai te Fa’aora te huru. Te mea hanahana roa a’e, ’o te tūtavara’a ïa ’ia roa’a te huru tei fa’ahitihia i roto i te mau ’īrava o te himene : « E pe’e au ia ’oe i te vāhi ’ua hina’aro ’oe… E parau vau i tā ’oe e ani mai… E riro vau mai tā ’oe i hina’aro ».2
’Ua fa’aha’amana’o ato’a mai ’o Elder Christofferson ia tātou ē « ’a tāmata ai tātou terā mahana ’e terā mahana, terā hepetoma ’e terā hepetoma i te pe’e i te ’ē’a o te Mesia, e pāuru tō tātou vārua i tōna hinuhinu, e hau te ’arora’a, e fa’aea te mau fa’ahemara’a i te ha’afifi mai ».3
’Ua fa’a’ite pāpū ’o Neill F. Marriott, taururu piti i roto i te peresidenira’a rahi o te Feiā ’Āpī Tamāhine nō te mau ha’amaita’ira’a nō te tūtavara’a ’ia pāna’i tō tātou hina’aro ’e te hina’aro o te Atua : « ’Ua ’aro noa na vau nō te tīahi i te hina’aro pae tino ’ia fa’atupu i te mau mea mai te au i tō’u haere’a e ’ere roa atu ïa i te mea hope, ’ua tā’ōti’ahia, ’e tei raro mai i te haere’a o Iesu Mesia. ’Ua riro te haere’a [o tō tātou Metua i te Ao ra] ’ei ’ē’a e arata’i i te ’oa’oa i roto i teie orara’a ’e i te orara’a mure ’ore a muri atu ».4 ’Aro ana’e ma te ha’eha’a ’ia riro ’ei hō’ē ’e tō tātou Metua i te Ao ra ’e tāna Tamaiti ’o Iesu Mesia.
Te tahi atu mau pāpa’ira’a mo’a ’e mau ha’amāramaramara’a
Ioane 17:20–21; Ephesia 4:13; Te Parau Ha’api’ira’a ’e te mau Parau Fafau 38:27; reliefsociety.lds.org
© 2017 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a no Visiting Teaching Message, July 2017. Tahitian. 97927 895