iTukutuku ni Mataveiliutaki Taumada, Okosita 2017
Na Bula ni Dua na Tisaipeli
Rauta ni tolusagavulu na yabaki sa oti mai Ghana, e dua na gonevuli ena koronivuli torocake ka yacana o Doe e curuma yani ena matai ni gauna e dua na valenisoqo ni YDE. E a sureti Doe e dua na nona itokani me rau lako vata, ka via kila o Doe me baleta na Lotu.
O ira na tamata e a sotava o koya e kea, era a tamata vinaka ka veikauwaitaki sara ka sa vakananuma o koya, “Na Lotu vakacava beka oqo?”
E vakila kina o Doe ni dodonu me vulica vakalevu tale o koya me baleta na Lotu kei ira na kena tamata, era vakasinaiti tu ena reki. Ia, ena gauna ga a tekivu kina, o ira na nona itokani kei na matavuvale era sega ni duavata kei koya ena veisasaga kece sara. Era vosataka vakacaca na Lotu ka ra vakayacora na veika kece sara me ra vakayalolailaitaki koya.
Ia, a sa ciqoma o Doe e dua na ivakadinadina.
E lomana o koya na kosipeli, ka sa vakasinaita tiko na nona bula ena reki, ka vakabauta talega. Ka mai, sobuta kina o koya na wai ni papitaiso.
Ni oti oya, a mai vakayagataka vakalevu na nona gauna ena vuli kei na masumasu. A lolo ka vasaqara na veivakauqeti ni Yalo Tabu ena nona bula. Ka kena isoqoni, ni a mai tubu ka titobu na ivakadinadina kei na vakabauta nei Doe. E muri, a qai vakatulewataka o koya me nona daukaulotu na Turaga.
Nona suka mai na kaulotu, e rau a qai veitau ka mai vakamautaka e dua na lesu mai na kaulotu—o koya ka a papitaisotaki koya e vica na yabaki sa oti—ka rau a qai vauci vata vakamalua ena valetabu e Johannesburg Sauca Aferika.
Sa mai sivi yani e vica na yabaki mai na imatai ni gauna a vakila kina o Doe Kaku na reki ni kosipeli i Jisu Karisito. Me tekivu mai na gauna oya, e a sega ni dau kamikamica tu ga vua na bula. E sa vosota mai o koya e dua na iwasewase ni rarawa kei na mosi ni yalo, e wili kina nodrau mai kacivi e rua na luvena—na yaluma ni veika e sotava oya e bika tu na yalona.
Ia o koya kei na watina, o Anthony, e rau sasaga tiko vakaukauwa me rau veivolekati vakairau kei na Tamadrau Vakalomalagi, o koya rau sa lomana ena yalodrau taucoko.
Nikua, ni sivia e 30 na yabaki mai na nona a sobuta na wai ni veipapitaisotaki, e sa qai vakacavara wale tiko ga oqo o Sister Kaku e dua tale na ilesilesi vakadaukaulotu—kei watina, ena ilesilesi vaka peresitedi ni tabana ni kaulotu e Nigeria.
O ira na kilai Sister Kaku era kaya e dua na ka e uasivi baleti koya. E ramase. E sega ni rawa ni da tiko vata kei koya ka o sega ni vakila na marau.
E dei tu na nona ivakadinadina: “Au kila ni raici au na iVakabula niu Luvena yalewa ka dua na itokani (raica na Mosaia 5:7; Ica 3:14),” e kaya o koya. “Au sa vulica ka saga tiko ena noqu igu meu Nona itokani—sega walega ena vosa ia ena ivalavala talega.”
Eda Sa Tisaipeli
E vuqa tale tu na italanoa me vaka na nei Sister Kaku. E a tu vua na gagadre me kila na dina, e sauma o koya na isau me rawata kina na rarama vakayalo, ka vakaraitaka o koya na nona lomana na Kalou kei ira na wekana, ena sala oya e sotava kina o koya na veika dredre ka mosimosi.
Ia, veitalia ga na veisaqasaqa, na veika mosimosi, e toso tu ga ki liu o koya. Me vaka talega ni bibi, e vakila tiko ga o koya na reki. E kunea o koya na sala me sega walega ni vosota na veika dredre ia me tubu ka vuavuai vinaka kina!
Na kena italanoa e via tautauvata kina na nomu kei na noqu.
E tutu yadua sara me makare na ilakolako ka sega kina na veivakatovolei.
E tu na noda gauna ni vakamosiyalo, na noda gauna ni druka, kei na rarawa.
E rawa ni da vakila ena so na gauna na yalolailai kei na kidroa.
Ia, o ira era bulataka na bula vakatisaipeli—ka ra yalodina tiko ga ka toso tiko ga ena vakabauta; era nuitaka na Kalou ka muria na Nona ivunau;1 ka bulataka ena veisiga kei na veiauwa yadua; ka ra veiqaravi vakarisito vei ira era wavoliti ira, ena caka vinaka—sai ira oqo era vakayaco veisau tiko ena caka vinaka lalai.
O ira era vakaraitaka vakavinaka cake na veikauwaitaki, veivosoti, kei na loloma era na lomani.2 O ira na tamata era cakacaka ena kena vakavinakataki na vuravura oqo, ena itovo ni veikauwaitaki kei na loloma, yadudua ena dua na gauna, ka ra sasaga tiko ga me ra bulataka na bula ni kalougata, kei na vakacegu vakatisaipeli i Jisu Karisito sai ira oqo era na qai kunea na reki.
Era na kila ni “sai koya na loloma ni Kalou sa sovaraki koya yani ki na yalodra na luve ni tamata … ka gadrevi vakalevu duadua kina mai vei ira na ka kecega … sa ka rekitaki duadua ki na yalo.”3
© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/17. Vakadonui me vakadewa: 6/17. Vakadewa ni First Presidency Message, August 2017. Fijian 97928 858