iVaqa ni Veisiko, Okosita 2017
Bulataka Tiko na Bula e Vakatabui
Vulica ena masumasu na itukutuku oqo ka vakasaqara na veivakauqeti vakayalo mo kila na ka mo wasea. Ena vakarautaki ira vakacava na luve ni Kalou yalewa ki na veivakalougatataki ni bula tawamudu na kena kilai deivaki na inaki ni iSoqosoqo ni Veivukei?
“Me vakatabui, o ya me vakatikitikitaki se vakatabui e dua na ka me tabu, me vagolei vakatabakidua ki na inaki savasava,” e kaya o Elder D. Todd Christofferson ena Kuoramu ni iApositolo Le Tinikarua. “Na rawa-ka dina ena bula oqo e lako mai ni da vakatabuya na noda bula—o ya na noda gauna kei na digidigi—ki na inaki ni Kalou.”1
E a kaya o Elder Neal A. Maxwell (1926–2004) ena Kuoramu ni iApositolo Le Tinikarua, “Eda dau vakasamataka ga na vakatabui ni bula me ka ga ni solibula, ia ni da dusimaki vakalou, eda na solia talega na iyau vakayago. Ia, na solibula sa vakatabui sa ikoya na noda soli keda vakataucoko vua na Kalou.”2
Ni da sa vakatabui keda ki na inaki ni Kalou, ena tubu cake na noda vakabauti Jisu Karisito kei na Nona Veisorovaki. Ni da bulataka na bula sa vakatabui, e rawa ni yaco meda vakalou ena ivakarau oqori.
E a kaya o Carole M. Stephens, Matai ni Daunivakasala ena Soqosoqo ni Veivukei: “E vakavuvulitaka o Elder Robert D. Hales, ‘Ni da vakayacora ka maroroya na veiyalayalati, eda vakatikitikitaki keda mai vuravura ka da goleva yani na matanitu ni Kalou.’
“Eda sa veisautaki. E duatani na keda irairai kei na noda itovo. Na veika eda rogoca ka wilika ka cavuta sa duatani sara, ka duatani na noda isulusulu baleta ni da sa yaco meda luvena yalewa na Kalou ka vauci Vua ena veiyalayalati.”3
Na vakatabui sai koya na veiyalayalati e vakayacora na Kalou “kei ira na mataqali ni Isireli; Ni sa oti na gauna ko ya, sa kaya ko Jiova, kau na tugana na noqu vunau ki na lomadra, kau na vola ki yalodra; ia kau na yaco meu nodra Kalou, ka ra na yaco ko ira me ra noqu tamata” (Jeremaia 31:33). Noda bulataka na bula sa vakatabui e sa duavata kina kei na nona ituvatuva na Kalou vei keda.
iKuri ni iVolanikalou
© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/17. Vakadonui me vakadewa: 6/17. Vakadewa ni Visiting Teaching Message, August 2017. Fijian 97928 858